Askarta Illaalada Madaxtooyada Somaliland Oo Mayd Ahaan Uga Tagay Siday U Garaacayeen Sawirqaade Ka Tirsan TV-ga Madaxa-banaan ee SSPC

Qaar ka mid ah Illaalada Madaxtooyada Somaliland ayaa maanta gelinkii hore siday u garaacayeen dhulka ugu tuuray Sawir-qaade Nuur Axmed Gaagaab oo ka mid ah Sawirqaadayaasha TV-ga Madaxa-banaan ee Somaliland Space Chanal. Isla markaana waxa ay u gaysteen nabarro badan oo aan muuqan iyo kuwo muuqdaba.

Sawirqaade Nuur Axmed Gaagaab, oo ka tirsan Sawirqaadayaasha TV-ga SSPC, ayaa abooro 1:000- tobankii subaxnimo ee maanta isaga oo u qalab-qaatay qabashada shaqadiisa, hase ahaatee, markaa aan ku guda jirin wax shaqo ah, balse si caadi ah u marayay dhinaca waddada Laamayga ah ee hormarta Qasriga Madaxtooyada Somaliland ee Magaaladda Hargeysa, ayay si xun oo xamaqnimo iyo naxariis-darro ah u garaaceen qaar ka mid ah Illaalada Madaxtooyadu.

“Anniga oo dar Illaahay u maraya waddada Laamiga ah ee Madaxtooyada hormarta dhinaca ay Kaabaduhu ka yaalaal ee xagga Madaxtooyada xigta, ayaa Midka mid ah Illaalada Madaxtooyadu inta uu Diintayda caayey igu amray inaan istaago, kana baydho waddada. Intaa ka dib, waxaan ugu jawaabay Askarigii ila hadlayay, ‘waddadi waatan oo Baabuur ayaa buuxdhaafisay ee halkii lugta dadku inay ku maraan loogu talagalay ayaan marayaaye xageed illeedahay u joog ee aan maraa?.” Sidaa waxa yidhi Sawirqaade Nuur Axmed Gaagaab.

Waxaanu Nuur isaga oo hadalkiisa sii wata intaa ku daray oo uu yidhi, “Intaasi markay afkayga ka soo baxday, ayaa Cir iyo dhul meel aan joogo iigu dambaysay, ka dib markii Raxan ka tirsan Askarta Illaalada Madaxtooyadu ay isugu kayteen, isla markaana igu garaaceen Qoyihii ay siteen dabadooda, Laad iyo Feedh, markay Dhulka iigu tuureena waxay igu karbaasheen Qoriga dabadiisa.Nabarro badan ayaanay ii gaysteen, waxaana iigu daran Nabarkan Luqunta igaga yaala oo Qoriga Afkiisa ay igaga dhufteen Anoo jiifa.” Ayuu yidhi Sawirqaade Nuur.

Ma jirin dhibaato uu Sawirqaaduhu u geystey ilaalada Madaxtooyada, hase ahaatee, sabab la’aan waxay u egtahay inay mar kale soo celiyeen dhaqamadii xumaa ee astaanta u ahaa ilaalada hogaamiyayaasha kali-taliska ah. “Inanka waanu is daba soconay oo meesha ayaanu wada maraynay, si aan ka yaabay oo bina-aadannimada ka baxsan ayay u garaaceen, waanu ku qaylinay oo aanu ku nidhi waar ka daaya sidaas oo kale qofaan waxba galbsan looma garaaco’e. laakiin Askartii Illaalada ee Sawirqaadaha garaacayay way na maqliwaayeen intaanu lahayn ka daaya, illaa iyo ay dhulka ugu tureen oo ay sidii Maska oo kale u tumeen isaga oo dhulka jiifa, iskood ayaanay mayd ahaan ugaga tageen markay in badan garaacayeen.” Sidaa waxa yidhi mid ka mid ah dadkii wakhtigan Askartu Sawirqaadaha ay garaacayeen marayay Madaxtooyada horteeda.

Xiligaa la garaacay Sawirqaaduhu wuxuu marayay barxadda hore ee Madaxtooyada oo intii ka dambaysay qaraxyadii 29-kii October 2008-dii ka dhacay Madaxtooyada iyo meela kale oo Hargeysa ka mid ah, la dhoobay Kaabado waaweyn oo loogu talagalay si aanay baabuurtu khasab ugu marin. Laakiin, waxaa ku dhacay waxaanu filayn. Waa dabeecadda Ilaalada Madaxtooyada inay mar kaliya Askartu isugu tagaan qofka, iyagoon eegin ama aan is weydiinin qofku muxuu sameeyay. Tani waa dhaqan jaahilnimo oo aanu lahayn Askariga Anshax ahaan iyo aqoon ahaanba u dhisan ilaalinta xuquuqda dadku. Kani wuxuu garanayaa oo kaliya qofka uu ilaalinayo, xitaa ma garanayo ciqaabta uu ka mudan doono falalka noocan oo kale ah, marka uu caddaalada soo hor-maro.

Maaha markii ugu horeysay ee ay Askarta Illaalada Madaxtooyada Somaliland sidan oo kale u garaacaan Sawirqaade ama Wariye ka tirsan qaybaha kala duwan ee Warbaahinta dalka, hase ahaatee, waxa mar walba soo noqnoqda tacadiyada iyo garaacista noocan ah ee ay u gaystaan hawl-wadeenada warbaahinta dalka, oo ay caadaysteen Illaalada Madaxtooyadu inay si xun oo arxan-darro ah u tumaan sabab la’aan.
 

Hadhwanaagnews