UDUB: “Kani Galbay, Ku kale Mooyee”

1. Hordhac:
Akhriste, weli ma aragtay ama ma maqashayba xisbi siyaasi ah oo talada dalkiisa haya (xisbul-xaakim) isla markaana uu jiro Wasiir Arrimo Dibadeed oo xisbigaa ka tirsan, oo haddana magacaaba xilka Xoghayaha Arrimaha Dibedda ee isla Xisbigaasi ?
Haddaba Xisbiga UDUB ayey arrintani ka suurto gashay, waana dhacdo ku cusub saaxada iyo goleyaasha lagu gorfeeyo siyaasadda!
Arrintan waxa la odhan karaa waa ifa-faale lagaga sii saadaalin karo in Xisbiga UDUB dhexdiisa ay durba ka bilaabantay dil-dillaac iyo loollan awoodeed oo loogu kala dheeraynayo hoggaanka Xisbiga, haddii lagaga adkaado doorashada madaxtooyada ee inagu soo fool leh. In kasta oo dad badani ay aad uga dayrinayaan aayaha dambe ee jiritaanka UDUB doorashada ka dib, haddana waxaa guud ahaanba la isku raacsanyahay in ay jiraan calaamado tilmaamaya sida ay Xisbiga UDUB dhexdiisa uga jirto herdan iyo loollan adag oo awoodeed oo beelnimo iyo isbaahaysi salka ku haya. Waxa muuqata inuu Xisbiga UDUB cagta saaray dariiqii bur-burka ee Xisbiyada Cunsuriga ahi hortii mareen.

2. Taariikhda mugdiga ah ee Xisbiyada Cunsuriga ah:
Waxa ka jira Dalal badan oo dunida ka mid ah Xisbiyo xag jir ah ama Cunsuri ah. Dalalka ay ka dhisan yihiin waxaa ka mid ah: Ingiriiska, Holland, Belgium, Denmark, Switzerland, Austeria iwm. Xisbiyadan xag jira ama cunsuriga ah (rightwing / extremist political parties) waxa lagu yaqaannaa inay ka soo unkamaan salkana ku hayaan caaddifad,colaad iyo nacayb fog oo ay u qabaan qaybo bulshadooda ka mid ah. Waxayna si joogto ah ugu hawlan yihiin una faafiyaan olole huwan naxli, nacayb, belo-carin iyo iska horkeenka bulshada iyo bah-wadaagta nabadda ku wada nool. Haddaba, haddiiba ay dhacdo in Xisbiyadaa xag-jirka ahi ay talada dalkaa ku guulaystaan ama ay kuraasba ku yeeshaan goleyaasha sharci dejinta(parliament), waxay muddo aad u kooban gudaheed ku guuldarraystaan inay la yimaaddaan nidaam iyo qorshe wacan oo ay dalka ku hoggaaminayaan.
Xumaantii, xag-xagashadii, nacaybkii iyo hanjabaadii ayey halkii ka sii wadaan maadaama ayna haynin bernaamij iyo qorshe siyaasadeed oo ay bulshada ka iibin karaan. Marka xisbiyada cunsuriga ah lagu yidhaa: “sidani idinka socon maysee la yimaadda caqli kale oo kan dhaama”, inta ay qaylo iyo beer-laxawsi bulsho ku dhuftaan ayey yidhaahdaan: “dalkeenu khatar buu ku jiraa, dalka waa la inaga qaadayaa oo waa la inagu soo duulay, nabadgelyadii dadkeenna ayaa halis ku jirta.”
Dabadeed waxa dhacda in bulshadu ay fahanto kana akhrisan weydo qaabka ay wax u wadaan. Kooxdii dulmiga, xumaanta iyo xiqdiga heshiiska ku ahayd ayaa iyagu iska hor yimaadda oo midba ka kale farta ku fiiqaa oo ceebayn iyo canbaarayn dusha uga tuuraa.
Hubkii sunta ahaa ee xagga dibedda ku jeeday ayaa xisbiga gudihiisa ka qarxa oo lagu bur-buriyaa. Xumaantii, naxligii, nacaybkii iyo belo-carintii uu Xisbiga Cunsuriga ahi ku dhisnaa ayuunbaa marka dambe isaga dib u bur-burisa. Sidaas ayeyna u gaaban tahay sooyaalka taariikhda mugdiga ah ee Xisbiyada ku salaysan nacaybka iyo cunsurinimadu.



Haddaba;
• Wacnaan lahaydaa inuu Xisbiga UDUB sooyaalka taariikhda dahabka ah ku galo inuu ahaa hooyadii dimuqraadiyadda iyo hannaanka xisbiyada badan ee dalka Somaliland!
• Wacnaan lahaydaa in Xisbiga UDUB laga dhaxlo qorshe iyo raad-raac siyaasadeed oo qarniyada soo socda loo aayo waxna laga dheegto!
• Wacnaan lahaydaa in Xisbiga UDUB uu noqon lahaa barta lagu barbaariyo laguna kobciyo fikirka, aragtida siyaasiga ah iyo qaabka hoggaamineed ee da’yarta jiilalka/faca soo socda!
• Wacnaan lahaydaa in Xisbiga UDUB taajkii dahabka ahaa iyo sharaftii ummadda Somaliland huwisay uu xurmeeyo, qadariyo, aanu ka abaal ka dhicin!
• Wacnaan lahaydaa in Xisbiga UDUB uu ka midho dhaliyo himiladii iyo hammigii uu ka lahaa Marxuumkii aasaasay M.X.Ibraahim Cigaal (AHUN), taasoo ahayd ictiraaf iyo aqoonsi caalamiya oo ay Somaliland hesho!

Nasiib darro ma ay dhicin arrimahan kor ku xusani oo dhammi.
Waqti seegay, fursad soo maartay oo aanu UDUB ka faa’iidaysan dheh!

Siddeedii sanadood ee ay xilka dalka hayeen, Wanaag iyo Xumaan markay u gudboonaadeen, UDUB dariiqa xun ayey ka doorbideen.
Xil gudasho la’aan, xumaanta oo la alooso, xiqdi iyo nacayb la abuuro, bulshada oo la iska horkeeno, xadhig iyo xadgudub aan xaq ahayn, Musuq-maasuq, Xoolo urursi iyo hantidii danta guud oo la Xaraasho, Xeerka iyo sharciga oo la dacal maro, Xukuumad aan xilkeeda gudan oo intaa xumaanta uun u heellan,

• Xisbi uu hormuud u yahay ma Xaqsoore iyo Madaxweyne aan xeerka daryeelin oo xaqiraadda dadkiisa cidnaba uga horrayn!
• Dira-diraaga qabiilka iyo ku danaysiga danlaydana Madaxweyne u sita digrii aad u sarreeya.
• Denta beesha caalamku, Madaxweyne aanay ahayn dantiisa, oo Dubai iyo degello kaleba ka jeexday daaro dhaadheer.
• Madaxweyne lagu hongoobay oo diiddan horumarka dalka, ku yidhaahda hawshiinna maaha oo ka hinaasa ciddii la timaadda himilooyin wacan!
• Madaxweyne dadka uu codka ka doonayo kala masuugay inuu si saraaxad leh u horyimaaddo oo mar kale i doorta yidhaahdo.
• Madaxweyne mugdi iyo makeeki geliyey 18-ka May iyo taariikhdii mudnayd.
• Madaxweyne aan xilkas ahayn oo aysan dhibayn xumaanta ay wadaan kuwii umaddan xilka u qaaday iyo xaynta wasiiradiisa ee boobay hantidii ummadda.
• Madaxweyne wanaaggii iyo sharaftii ummaddu huwisay ku bedelay xumaan iyo danta guud oo uu xannibo!
• Xisbiga UDUB iyo Xukuumaddiisu xumaanta ay haatan wadaan: Kaadhadhka oo la xado, Guddida doorashooyinka oo la xag-xagto, markii la rabana la iska xidh-xidho.

Xisbi iyo xukuumad ku guul darraystay taladii iyo hoggaankii dalka, xisbi iyo xukuumad la ambaday masuuliyaddii loo igmaday, inuu haddana 8 sano ka dib yidhaahdo cod baan ka doonayaa bulshada Somaliland waa arrin gef, ceeb iyo maangadba ku ah mustaqbalka iyo aayaha dambe ee bulshada reer Somaliland.
In mar kale la doorto Xisbi iyo Xukuumad sidaas ah, waa arrin muuqaal qaldan ka bixinaysa macnaha dawladnimo, milgaha iyo habdhaqanka ummadnimo, himilooyinka ay ummaddu hiigsanayso iyo sumcadda ay Somaliland bulshada caalamka ku leedahay.

3. Yaa inkaaro ummadda ka galabsaday?
Kuwa haatan ummaddii ay hagradeen ee ay hantidooda boobeen, cod kaga raadinaya hebel iyo hebel baa marxuum Cigaal ka hor yimid oo inkaartiisii ayaa ku dhacday, waxaan ku odhan lahaa:
Cigaal (AHUN) wuxuu ahaa geesi ummaddiisa qiimo ku leh, dhaxal aayatiin wacan leh oo lagu xasuustona uga tagay. Wuxuu ahaa shaqsi fikirkiisa laga hor iman karo ama loo hoggaansami karo. Ragga ay marxuum Cigaal kala aragtida duwanaayeena, ma aha dembi inay fikirkooda iyo sida ay wax u arkayeenba cabbiraan.
Maxaad adigu taariikhda ku gelaysaa ee lagugu xasuusan doonaa?
Weli ma garwaaqsatay in Xisbiga Cunsuriga ah ee aad ka mid tahay UDUB uu waqtigiisii dhammaaday oo aad limiseen kalsoonidii iyo karaamadii umadda?

Adiga iyo xukuumaddaadu waxaad dacal marteen diintii, dastuurkii dalka u yaallay oo aad ku tumateen iyo dadweynihii oo aad khaayinteen.
Markaa inkaaraha aad galabsateen aakhiro iyo adduunkaba intee ayey baaxad le’eg yihiin?????

4. Naqdi caadifadaysan:
Guntii iyo gebo-gabadii, ragga ku caan baxay xinka iyo xag-xagashada Xisbiyada qaranka, isku daya inay naqdiyaan barnaamijka siyaasadeed ee Xisbiyada mucaaridka ah waxaan ku odhan lahaa: “Siyaasaddu Geddaa Maaha”.
Iyaga oo ka tirsan xisbi fadhiid ah (UDUB) oo aan lahayn gole dhexe, guddi fulineed, barnaamij siyaasadeed iyo qorshe cad oo wax qabad; waxaa habboonaan lahayd inay marka hore dhalliilahooda ay dersaan, dabadeedna ay la doodaan Xisbiyada mucaaridka ah ee si rasmi ah u taabbo galay, dalka iyo dadkana uga lexe-jeclo badan Xisbigaa Cunsuriga aah
Dabcan, wax waa la naqdiyi karaa ama la dhalliili karaa, balse waa ceeb haddii ay arrintu noqoto xiqdi, xumo ku naax iyo ayaan lagaa qaylo dheeraan: Xaashee nin libin kaa xisdiyey xumihii waa yaab.

Wa Billaahi Tawfiiq

Guul,Horumar iyo isbeddel Khayr leh oo dalka Somaliland ka dhaca

By: Architectural-Eng. Hussein Adan Igeh (Hussein Deyr) |UK & Holland|