Adduunka ama Kownka(Qaybtii 39aad)

Aayadaha Illaahay iyo ku cibro qaadashadooda.

Caqliga,maanka,miyirka,maskaxda,garaadka,damiirka,qalbiga,laabta:intaasi waxa ay keenaan garashada,fekerka,xiska,dareenka,fahanka,iyo go'aanka,ama qaraarka. Manhajka iyo diinta Islaamku,waxa ay ku salaysan yihiin,wax caqliga Insaanku garan karo,oo la dhaqmi karo,awoodda iyo garashada Insaanku waa mid xaddidan,oo Alle subxaana watacaalaa,u yeelay,xad aanay dhaafi karin,oo wax ka sarreeya,intaa loo qoondeeyey aanay fahmi karin,oo garan karin,markaa Aayadaha Alle waxa iyagoo,la hadlaya garaadka Insaanka,ay u soo bandhigaan, waxyaalaha ku xeeran,ee uu fahmi karo,kuna fekeri karo,ee ku cibro,iyo waano qaadan karo.
Qofku waxa uu dhashaa,isaga oo aan halla garanayn,ka dib Alle ayaa,ugu deeqa waxyaalihii u suurtagelin lahaa,garashada iyo fahanka,oo siiya maqal,iyo arag,iyo caqli iyo qalbi,kuwaas oo u sahlaya,in uu wax garto,oo fahmo,oo ku dhaqmo:
والله أخرجكم من بطون أمهاتكم لا تعلمون شيئا وجعل لكم السّمع والأبصار والأفئدة لعلكم تشكرون ( النحل)
Aayada: Illaahay wuxu uurka hooyooyinkiin,idinka soo saaray,idinkoon wax cilmi ama aqoon ah lahayn,oon waxba garanayn,markaasuu idin siiyey;Maqal iyo Arag iyo Qalbi,waxa la arkaa in aad shukri naqdaan(illaahay u shukri naqdaan,markaad nimcadaas dareentaan,ood garataan).
Waxa innagu xeeran,ee aynu dhex joogno,iyo nafeheennuba waxa ay inoo yihiin, Aayado aynu ku cibro qaadano,oo ina tusaya,waxdaaniyadda Alle,iyo awooddiisa:
سنريهم ءاياتنا في الآفاق وفي أنفسهم حتّى يتبين أنّه الحق(فصلت)
Aayadda:waxa aannu Aayadahayaga ka tusaynaa,inta ay wax ka arkaan,iyo naftooda,si ay ugu caddaato,in Alle xaq yahay.
Bal haddaynu u fiirsanno,oo ku fekerno,deegaanka aynu ku noolnahay,waxa aynu arkaynaa cajaa'ibta Alle,taasina waxa ay inoo siyaadinaysaa cabsida,iyo iimaanka:
أفلا ينظرون إلى الإبل كيف خلق وإلى السّماء كيف رفعت(الغاشية)
Aayadda:miyaanay eegin,oo arkaynin,sida loo abuuray Geela,iyo sida Samada loo kor yeelay!.
Ma u fiirsatay,xoolaha qaar innaga xoog weyn yihiin,ee haddana inoo sakhiran,ee aynu sidaynu doonno,u adegsanayno,alaabada ku raranayno,kaynu doonno qalanayno:
أولم يروا أنّا خلقنا لهم ممّا عملت أيدينا أنعامًا فهم لها مالكون وذللناها لكم فمنها ركوبهم ومنها ياكلون ولهم فيها منافع ومشارب أفلا يشكرون(يـس)
Aayadda:miyaanay arag,waxa Aannu u abuurnay,waxa ay gacantayadu samaysay,oo ay ka mid yihiin xooluhu,oo ay mulkiyeen,oo aannu u laylinay,waxa ka mid ah,ku ay rartaan,iyo ku ay cunaan,oo waxa ay ka helaan,manaafacaad,iyo cabbitaanba,waar miyaanay shukri naqaynin.
Shimbiraha hawada iska duulayaa,waxa ay ku duulayaan,awood Alle,oo Illaahay ayaa haya,oo ka ilaalinaya,in ay soo dhacaan,waa awooddiisa:
"أولم يروا إلى الطّير فوقهم صافّات ويقبضن ما يمسكهنّ إلا الرّحمن إنّه بكلّ شيءٍ بصير"(الملك)
Aayadda:miyaanay arag,oo eegin,Shimbiraha dushooda kooxkoox iyo safsaf,u socda, oo aan cidi qabanaynin,hadday soo dhacaan,Alle mooyee,Alle wax kasta waa kii arkaya,ee og.
Daruuruhu waxa ay dhex maraan,cirka iyo dhulka,oo meel dhexe ayay iska sabbeeyaan,daruur marinkeeda ka khaldamysaa ma jirto,mid iska soo dhacaysaana ma jirto,waa wax lagu fekero,oo kuu xaqiijinaysa awoodda,iyo kelinimada Alle:
والآهكم اله واحد لا اله إلا هو الرّحمن الرّحيم إن في خلق السّماوات والأرض واختلاف الّيل والنّهار والفلك الّتي في البحر بما ينفع النّاس ومآانزل الله من السّماء من مآء فأحيا به الأرض بعد موتها وتصريف الرّياح والسّحاب المسخر بين السّماء والأرض لآءيات لقوم يعقلون(البقرة).
Aayadda:Illaahay waa Illaah keliya,Illaah kale oon isaga ahayni ma jiro,waa illaaha Raxmaanka ah,ee Raxiimka ah,Abuuridda Samooyinka iyo Arlada,iyo isbedelka Habeenka iyo Maalinta,iyo Doonta badda maraysa,si ay anfaco dadka ugu gudbiso, iyo biyaha cirka ka soo da'aya,ee dhulka noolaynaya,markuu dhinto ka dib,iyo kala gediska dabaylaha,iyo Daruuraha,loo sakhiray Samada iyo Arlada dhexdeeda(ooy sabbaynayaan),Aayado ayay u yihiin ciddii caqli leh.
Alle cirkaa weyn,ee ballaadhan,iyadoo aan wax tiirar ahi haynin,ayuu kor yeelay,oo sameeyey,innagoo og,in guri yar,aynaan tiirar la'aan dhisi karin,Alle subxaana watacalaa Isagaa keli ah,oo awoodda Isagaa leh kelidii:
الله الذي رفع السّماوات بغير عمد ترونها ثم استوى علي العرش وسخر الشّمس والقمر كل يجري لأجل مسمّى يدبر الأمر يفصل الأيآت لعلكم بلقاء ربكم توقنون(الرعد)
Aayadda:Alle waa kii kor yeelay samooyinka,tiir la'aan,dabadeedna carshiga ku ekaaday,oo sakhiray qorraxda iyo dayaxa,midkasti ajal go'an buu ku socdaa,Alle Isagaa arrimaha kala debberaya,oo Aayadaha fasilaya,oo kala dhigdhigaya,waxa la arkaa,inaad yaqiinsataan kulanka rabbigiine(yacni inaad la kulmi doontaan Alle).
Haddaad eegto,oo fiiriso cirka,oo indhaha ku celceliso,adiga oo daalay baad indhaha la soo laaban,waa shey mudan,in qofku mar kasta ku fekero,oo ku xusuusto Awoodda Alle,iyo waxdaaniyadiisa,yacni kelinimadiisa:
الّذي خلق سبع سماوات طباقًا ما ترى في خلق الرّحمن من تفاوت فارجع البصر هل ترى من فطور ثمّ ارجع البصر كرّتين ينقلب إليك البصر خاسئًا وهو حسير(الملك)
Aayadda:ka abuuray Samooyinka todobada ah,ee lakabda kala sarreeya ah,kuma arkaysid,abuurta Alle,wax kala tagsanaan ah,bal ku celi eegmada,ma arkaysaa,wax dildilaac,ama jeexdin ah,mar kalena ku celi,aragtidaadu waxay soo noqonaysaa, iyadoo hoogsan,oo daallane.
Samooyinka Alle korkeenna ka dhigay saqaf oo kale,ta ugu soo hoosaysa todobada samo,waxa lagu qurxiyey xiddigo nuuraya,oo ifaya,sidoo kale u ah Shayaadiinta hub,lagu gamo,oo lagu arjumo:
ولقد زيّنّا السّماء الدّنيا بمصابيح وجعلناها رجومًا لشيطين وأعتدنا لهم عذابًا السّعير(الملك)
Aayadda:xaqiiqa'e waxa aannu ku qurxinnay,Samada teeda sokaysa,xiddigo,oo waxa aannu ka yeelnay,kuwo lagu rajmiyo,oo lagu gano Shayaadiinta,oo waxannu u diyaarinay cadaab kulul.
Samooyinkaa bilaa tiirarka ah,yaa innaga haya,oo u diidaya in ay innagu soo dhacaan!,Alle ayaa innaga haya,oo wax kasti amarkiisa ayay ku socdaan:
أَلَمْ تَرَ أَنَّ اللَّهَ سَخَّرَ لَكُمْ مَا فِي الْأَرْضِ وَالْفُلْكَ تَجْرِي فِي الْبَحْرِ بِأَمْرِهِ وَيُمْسِكُ السَّمَاءَ أَنْ تَقَعَ عَلَى الْأَرْضِ إِلَّا بِإِذْنِهِ إِنَّ اللَّهَ بِالنَّاسِ لَرَءُوفٌ رَحِيم (الحج)
Aayadda:miyaydaan ogayn,in Alle idiin sakhiray,waxa dhulka jira,iyo doonta ku soconaysa badda,amarka Eebbe,Samadana in Alle hayo,si aanay dhulka ugu soo dhicin,idankiisa mooyee,Alle waa mid dadka u naxariis iyo dhibirsami badan.
Makhluuqa Alle abuuray,dhamaantii way adeecaan,oo way u hoggaansan yihiin, amarrada Eebbe,waxa tusaale la inoogu soo qaadanayaa,buuraha in haddii lagu soo dejin lahaa Quraanka,ay muuqan lahayd sida ay masuuliyadaas u dareemayaan:
لو أنزلنا هذا القراءن على جبل لرءيته خاشعًا متصدعًا من خشية الله وتلك الأمثال نضربها للنّاس لعلهم يتفكرون(الحشر)
Aayadda:Haddii Quraanka Aannu ku soo dejin lahayn Buur,waxad arki lahaydeen, iyadoo khushuucsan,oo la wareersan cabsida illaahay,arrinkaasi waxa uu tusaale u yahay dadka,waxa la arkaa,in ay fekeraan,oo waano qaataane.
Insaanka iyo Jinku si toos ah,ayay amaanada diinta,u qaadeen,oo waa lagala xisaabtamayaa,laakiin makhluuqaadka kale,ma ay qaadin amaanada,laakiin waxa ay aqoonsan yihiin,kelinimada Alle,oo dhamaantood way u tasbiixsadaan,oo adeecaan.
Wax kasta oo Alle abuuray,way adeecaan,oo u tasbiixsadaan,inkastoo aynan fahmayn,sida ay u tasbiixsanayaan:
تُسَبِّحُ لَهُ السَّمَوَاتُ السَّبْعُ وَالْأَرْضُ وَمَنْ فِيهِنَّ وَإِنْ مِنْ شَيْءٍ إِلَّا يُسَبِّحُ بِحَمْدِهِ وَلَكِنْ لَا تَفْقَهُونَ تَسْبِيحَهُمْ إِنَّهُ كَانَ حَلِيمًا غَفُورًا(الإسراء)
Ayadda:Samooyinka iyo Arlada,iyo waxa ku suganiba,Alle ayay u tasbiixsadaan, shey kasti illaahay ayuu u tasbiixsadaa,laakiin waxaydinaan fahmeyn qaabka,iyo sida uu u tasbiixsanayo.
Waxa Alle abuuray,noole iyo ma nooleba,waxa ay u hoggaansan yihiin amarka Eebbe,oo ay adeecaan,amarradiisana qaataan,tusaale kooban waxa kuu ah;Nebi Muuse markuu dhashay,waxa Hooyadii la faray,in ay badda ku riddo,isagoo sanduuq yar ku jira,baddu iyadoo amarka Eebbe fulinaysa,ayay soo gaadhsiisay,meeshii Fircoon degganaa!,si cadawgii doonayey,in uu dilo,u koriyo,waa xikmad Alle'e,sidoo kale Nebi Ibraahin markii Mushrikiintu isku deyeen,in ay naarta ku gubaan,Alle waxa uu naartii siiyey amar,in aanay gubin Ibraahin,halkii buuna ku badbaadey!,haddaynu si fiican,u adeegsanno caqligeenna,oo u fiirsanno Aayadaha Alle,cabsi bay inoo siyaadinayaan,iyo inaynu Alle u caabudno,sida ugu wanaagsan,ee uu raalli ka yahay.
Alle Isagaa korreeyee,wax kasta Isagaa abuuray,oo leh,ahna wakiilkiisa:
الله خالق كلّ شيء وهو على كلّ شيء وكيل(الزمر)
Aayadda:Alle ayaa shey kasta abuuray,oo Isagaa shey kasta wakiil u ah,oo u taliya.
Wax kasta,Alle waxa uu u dejiyey,qiyaas go'an,oo aanu dhaafi karin,kana dib dhici karin,ama ka yaraan karin:
إنّا كلّ شيءٍ خلقناه بقدر وما أمرنا إلا واحدة كلمح بالبصر(القمر)
Aayadda:Annagu shey kasta,waxa aannu u abuurnay,si qiyaas leh,oo amarkayagu waa,sidii ilbidhiqsiga aragga oo kale,degdegiisu.
والأرض مددناها وألقينا فيها رواسي وأنبتنا فيها من كلّ شيء موزون(الحجر)
Aayadda:dhulka waannu fidinnay,oo ku qotominnay buuro,oo waxa aannu uga soo saarnay,shey kasta,si qiyaas go'an ah,oo miisaaman.
Wax kasti gacanta Alle,ayay ku jiraan,oo qadarka uu doono,ayuu ka soo dejiyaa:
وإن من شيء إلا عندنا خزائنه وما ننزل إلا بقدر معلوم(الحجر)
Aayadda:ma jiro shey aannaan haynin khasnadiisa,oo waxa aannu u soo dejinnaa,si qiyaas la og yahay ah.
Roobka qiyaas go'an,oo Alle og yahay,ayuu ugu soo shubaa Arlada:
وأنزلنا من السّماء ماء بقدر فأسكنّاه في الأرض وإنّا على ذهاب لقادرون(المؤمنون)
Aayadda:waxa Aannu ka soo dejinnaa Samooyinka biyo(Roob),leh qiyaas go'an,oo waxa aannu dejinney dhulka,oo waxannu karnaa,in aannu ka kaxayno,oo ka tirno.
And we send down water from the sky according to(due)measure,and we cause it to soak in the soil;And we certainly are able to drain it off(with ease).
Irsaaqadda waxa Alle u qaybiyaa dadka,oo qofba in go'an siiyaa:
ولو بسط الله الرّزق لعباده لبغوا في الأرض ولكـن ينزّل بقدر ما يشاء إنّه بعباده خبير بصير(الشورى)
Aayadda:Haddii Alle Addoomadiisa u badiyo,oo u waasiciyo arsaaqda,way xadgubi lahaayeen,oo kibri lahaayeen,laakiin Alle wuxu u soo dejiyaa,hadba qiyaas iyo qaddar go'an,ee uu isagu doono,Alle Addoomadiisa isagaa khibiir u ah oo arkaya.
الّذي له ملك السّماوات والأرض ولم يتّحذ ولدًا ولم يكن له شريك في الملك وخلق كلّ شيءٍ فقدره تقديرًا(الفرقان)
Aayadda:ka leh mulkiga Samooyinka,iyo Arlada,ee aan samaysan ilme,ee aan cidi la wadaagin mulkiga,oo u abuuray shey kasti qadar go'an,oo leh qiyaas gaar ah.
Waa in qofka muslinka ahi,adeegsado caqliga iyo maanka Alle siiyey,oo ku fekeraa,oo u fiirsadaa,sida cajiibka ah,ee Alle subxaana watacaalaa,u abuuray Kownkan iyo Makhluuqaadkan kala geddisan,oo uu ku cibro qaataa,oo Alle u mahad naqaa,oo cibaadadiisa,si wanaagsan,oo ikhlaas leh,u gutaa,bal eeg Qorraxdan iyo Dayaxan,aan midna waqtigiisa ka dib dhacayn,oo dariiqiisa,ka leexanayn,oo aan is weydaaranayn,Qorraxdu 365 iyo rubuc maalmood,ayay wareeggeeda ku dhamaysataa,halka Dayaxu,30 maalmood keliya wareeggiisa ku sameeyo:
لا الشَّمْسُ يَنبَغِي لَهَا أَن تُدْرِكَ الْقَمَرَ وَلا اللَّيْلُ سَابِقُ النَّهَارِ وَكُلٌّ فِي فَلَكٍ يَسْبَحُونَ [سورة يس ]
Aayadda:Qorraxda suurtagal uma aha,inay gaadho,oo haleesho Dayaxa,sidoo kale Habeenka,uma suurtagal aha,inuu dhaafo,oo ka hor maro Maalinta,dhamaan mere kasti,wuxu ku jiraa,majiire aanu ka bixin,oo uu ku dhexjiro,oo dhex dabbaasho.
قل أرءيتم إن جعل الله عليكم الّيل سرمدًا إلى يوم القيامة من إلـه غير الله يأتيكم بضياءٍ أفلا تسمعون قل أرءيتم إن جعل الله عليكم النّهار سرمدًا إلى يوم القيامة من إلـه غير الله يأتيكم بليل تسكنون فيه أفلا تبصرون(القصص)
Aayadda:dheh(Nebi Allow)bal ka warrama,haddii Alle ka dhigo,Habeenka mid iska soconaya,oo aan dhamaanayn,ilaa iyo Qiyaamaha,Alle mooyee,ayo kale,ayaa idiin keeni kara iftiin,waar miyaydaan wax maqlayn!,ku dheh bal ka warrama,haddii Alle ka dhigo Maalinta,mid weligeed soconaysa,oo aan dhamaanayn,ilaa iyo Qiyaamaha,Alle mooyee,yaa idiin keeni kara,habeen aad ku degtaan,oo ku nasataan,waar miyaydaan wax arkaynin!.
Alle isagaa korreeyee,wuxu sameeyey Qorrax,iyo Dayax,faa'iidooyin kala gedisan, laga helo;iftiin iyo baahiyo kale,oo ay ka mid yihiin,in waqtiga lagu garto:
هو الدي جعل الشمس ضياء والقمر نورا وقدره منازل لتعلموا عدد السنين والحساب ما خلق الله ذالك الا بالحق يفصل الايات لقوم يعلمون(يونس)
Aayadda:(Illaahay)waa kii ka yeelay Qorraxda,mid iftiin bixisa,Dayaxana ka yeelay ,mid nuur bixiya,si aad ugu garataan,tirsiga sannadaha,iyo xisaabaha,Illaahay xaq mooyee,wax kale uma abuurin,Aayadahan wuxu u kala caddeeyey,ciddii garanaysa,ee fahmaysa.
Insaanku isagoo,Aadan ka wada yimi,haddana waxa Alle ka dhigay,kuwo luqadooda, iyo midabadoodu kala geddisan tahay,waa Aayad,iyo xikmad Alle:
ومن ءاياته خلق السّماوات والأرض واختلاف ألسنتكم وألوانكم إنّ في ذالك لأيات للعالمين(الروم)
Aayadda:Aayadaha Alle waxa ka mid ah,abuuritaanka Samooyinka,iyo Arlada,iyo kala geddisnaanta carrabadiinna iyo midabadiinna,arrinkaasi waxa uu u yahay Aayad, iyo cibro qaadasho caalamiinta(dadka).
Allihii abuuray uumiyahan,kala geddisan,hadhowna waxba kuma aha,soo saaridoodu:
ومن ءاياته خلق السّماوات والأرض وما بثّ فيهما من دابة وهو على جمعهم إذا يشاء قدير(الشورى)
Aayadda:Aayadaha Alle waxa ka mid ah,abuuritaanka Samooyinka,iyo Arlada,iyo waxa uu ku fidiyey noole,waxana Alle karaa,oo awoodaa in uu kulmiyo,haddii uu doono,iyo marka uu doono.
Insaanka waxa mudan,in uu caqliga adeegsado,oo Allaha abuuray caabudo:
ومن ءاياته الّيل والنّهار والشمس والقمر لا تسجدوا للشمس ولا للقمر واسجدوا لله الّذي خلقهنّ إن كنتم إيّاه تعبدون(فصّلت)
Aayadda:Aayadaha Alle waxa ka mid ah,Habeenka iyo Maalinta,iyo Qorraxda iyo Dayaxa,ha u sujuudina Qorraxda iyo Dayaxa,ee u sujuuda Allihii abuuray,haddaad tihiin kuwo Isaga caabudaya.
Wax kasti,amarka Eebbe ayay ku fulaan,Isagaa keligii abuuray,oo xukuma:
ومن ءاياته أن تقوم السّماء والأرض بأمره ثمّ إذا دعاكم دعوةً من الأرض إذا أنتم تخرجون(الروم)
Aayadda: Aayadaha Alle waxa ka mid ah,in Samada iyo Dhulku amarkiisa ku taagan yihiin,oo haddii uu idiin yeedho yeedhmo,waaba idinkii oo dhulka ka soo baxaya.
Alle subxaana watacaalaa,waxa uu inaga dhigay Lab iyo Dheddig xikmadiisa:
ومن ءاياته أن خلق لكم من أنفسكم أزواجًا لتسكنوا إليها وجعل بينكم مّودّة ورحمة إنّ في ذالك لأيات لقوم يتفكرون (الروم)
Aayadda:Aayadaha Alle waxa ka mid ah,in uu naftiinna ka abuuray lamaane,si aad ugu degtaan,oo wuxu ka dhigay dhexdiina,kalgacal iyo raxmad,arrinkaasi waxa uu yahay Aayad,iyo cibro ciddii fekeraysa.
Alle subxaana watacaalaa,dhoobo ayuu innaga abuuray,haddana qaabkan ina siiyey:
ومن ءاياته أن خلقكم من ترابٍ ثمّ إذا أنتم بشرٌ تنتشرون(الروم)
Aayadda:Aayadaha Alle waxa ka mid ah,in uu idinka abuuray ciid,dabadeed waaba idinkii oo fidaya,oo baahaya.
Hurdada gudeheeda,waxa naftu gashaa,nasasho,iyo riyooyin kala geddisan:
ومن ءاياته منامكم بالّيل والنّهار وابتغاؤكم من فضله إنّ في ذالك لأيات لقوم يسمعون (الروم)
Aayadda:Aayadaha Alle waxa ka mid ah,riyada aad riyoonaysaan habeenkii,iyo maalintii(marka aad hurudaan),iyo raadsashada fadliga iyo arsaaqda Alle,arrinkaasi waxa uu u yahay Aayad,iyo cibro ciddii wax maqlaysa.
Hillaaca mar cabsi,buu keenaa,marna waxad rajeynaysaa in roob kuu yimaaddo:
ومن ءاياته يريكم البرق خوفًا وطمعًا وينزّل من السّماء ماءً فيحيبه الأرض بعد موتها إنّ في ذالك لأيات لقوم يعقلون (الروم)
Aayadda:Aayadaha Alle waxa ka mid ah,hillaaca uu idin tusinayo,isagoo idiin ah cabsi,iyo damac ama rajo,oo wuxu Alle Samada idiinka soo shubaa biyo,oo ku nooleeyaa dhulka,ka dib markuu dhintay(qallalay),arrinkaasi waxa uu yahay Aayad,iyo cibro ciddii caqliga leh,ee caqli qaadanaya.
Doonyuhu markay badda marayaan,waxad mooddaa buuro,oo kale,waa cajiib:
ومن ءايّته الجوار في البحر كالأعلام إن يشأ يسكن الرّياح فيظللن رواكد على ظهره إنّ في ذالك لأيّات لكلّ صبّار شكور(الشورى)
Aayadda:Aayadaha Alle waxa ka mid ah,(doonyaha)kuwa u soconaya badda sidii ay yihiin calamo dhaadheer,haddaannu doonno waxannu joojinaynaa dabaysha,markaas ayay istaagayaan dhexdeeda,arrinkaasi Aayad iyo cibro ayuu u yahay mid kasta oo sabir badan,oo shukri badan.(and among His Signs Are the ships,smooth-running through the ocean,(tall)as mountains,if it be His will,He can still the wind;then would they become motionless on the back of (ocean),verily in this are Signs for every one who patiently perservers and is grateful).
Alle Isagaa korreeyee,wuxu dadka u sahlaa,dariiqyada ay ku gudbayaan,oo hagaa:
أمّن يهديكم في ظلمات البرّ والبحر ومن يرسل الرّياح بشرًا بين يدي رحمته ءإلـه مع الله تعالى الله عمّا يشركون(النمل)
Aayadda:ayaa idin hanuuniya mugdiyada berriga iyo badda dhexdooda,oo yaa idiin soo dira dabaylaha,idiin ah bushaarada,ee raxmadda Alle ka yimi,ma Illaah kale,ayaa Alle weheliya,Alle wuu ka korreeyaa waxa ay ugu shariig yeelayaan.
Abuurta Illaahay,waxa ay inoo tahay,cibro qaadasho,dhulka,webiyada,badaha…iwm:
أمن جعل الأرض قرارًا وجعل خلالها أنهارًا وجعل بين البحرين حاجزًا ءإلـه مع الله بل أكثرهم لا يعلمون(النمل)
Aayadda:yaa ka dhigay dhulka mid deggan,oo ka yeelay mid ay webiyaal dhex maraan,oo labada badood u kala ooday,si aanay isugu khaldami karin,ma Illaah kale,ayaa Alle weheliya,iska daaye intooda badani ma garanayaan,oo cilmi uma laha.
Alle keligii,ayaa qofka dhibaataysani baryaa,Isagaana ka fayda dhibta,oo aqbala:
أمن يجيب المضطرّ إذا دعاهُ ويكشف السّوء ويجعلكم خلفاء الأرض ءإلـه مع الله قليلا ما يذكّرون(النمل)
Aayadda:yaa ajiiba,oo aqbala ducada qofka dhibaataysani marka uu ducaysto,oo ka fayda dhibtii,oo yaa idinka dhiga kuwa Arlada maamulaya,ee ah khaliifada,ma Illaah kale,ayaa Alle weheliya,waa inyar inta ay waano qaadanayaan.
Muuminiinta Alle ka cabsanayaa,waxa daqiiqad kasta,oo ishoodu meel ku dhacdo, way ku fekeraan,oo Alle awooddiisa,ayay xusuusisaa,oo mar kasta way u shukri naqayaan:
"ويتفكرون في خلق السموات والأرض ربنا ما خلقت هذا باطلاً سبحانك فقنا عذاب النار"( آل عمران)
Aayadda:waxay ku fekereyaan,abuurta Samooyinka iyo Arlada,oo odhanayaan; Rabbiyow uma aad abuurin si baadil ah,Adiga ayaa nasahane,naga badbaadi Naarta.
Waxan Alle ka baryaynaa,in uu innaga yeelo kuwo ku cibro,iyo waano qaata Aayadihiisa,oo u hoggaansama amarka Eebbe,u hoggaansi dhab ah,Aamiin,Aamiin.

Saeed Ibrahih Hussein
As/w/w