“Shirka Nairobi Wuxu Ahaa Madal Taariikhiya Oo Aanay Wali Helin Qadiyadda S/Land”W/Khaarajiga Dr. Maxamed C/laahi

Hargeysa, May 27, 2011 (TNN) – Wasiirka arimaha dibadda Somaliland Dr. Maxamed C/laahi Cumar ayaa difaacay shirkii uu waftigii uu hogaaminayey kaga qayb galeen magaaladda Nairobi, waxaanu sheegay inuu shirkaasi ahaa mid Somaliland guul wayn u soo hooyey, isla markaana taariikhiya.

Shirkan oo muran wayn ka dhashay ayaa waxa uu wasiirku sheegay inay kulan gaar la qaateen golaha am aanka qaramadda midoobay, waxaanu tilmaamay inay madashaas ku soo bandhigeen qadiyadda madax-banaanida Somaliland.

Wasiirka khaarajiga Somaliland Dr. Maxamed C/laahi Cumar ayaa waxa kale oo uu tibaaxay shirkaa uu she egay inay la yeesheen golaha amaanka ee qaramadda midoobay inuu sumcadda Somaliland iyo xidhiidhka ay la leedahay beesha caalamka uu wax wayn ka badalayo.

Dr. Maxamed C/laahi Cumar ayaa waxa uu sidaas ku sheegay mar uu shalay galab wargeyska Haatuf khad ka tilifoonka ugu waramayey, isaga oo ku sugan magaalada Nairobi ee xarunta dalka Kenya.

S: Waxaad nooga warantaa shirkaas aad Nairobi kaga qayb gasheen ajandayaasha lagaga hadlay?

J: Shirkii uu la yeeshay waftigii Somaliland ka socday ee aan ka midka ahaa Golaha amaanka ee jimciyadda quruumaha ka dhaxaysa ee dhacay shalay, wuxuu ahaa shir Somaliland dan wayni ugu jirtay, isla markaana aanu ku soo bandhignay qadiyadda Somaliland iyo danaha Somaliland-ba, waxaa noo suurta gashay inaanu sharaxaad ka bixino kana hadalno xuquuqaha shacbiga Somaliland oo xaq u leh inay noqdaan dal madax-banaan, isla markaana beesha caalamka ka hela ictiraaf. Waxa kale oo aanu ka hadalnay oo aanu u sharaxnay wufuudaas wixii ay Somaliland qabsatay 20-kii sano ee ay madaxa-banaaneyd.

S: Waxa la sheegayaa in qaramada midoobay ay isku dayday inay kulan iskugu kiin keento idinka iyo wufuudii ka kala socotay TFG-ga iyo maamul goboleedada kale ee Somalia, arintaasi saw ma jirto?

J: Golaha amaanku isaga oo Somaliland qadarin u haya wuxuu noo sheegay in hadii aanu rabno aanu cid u dirsano shirar kale oo lagaga hadlayey amaanka mandaqada, laakiin waxaanu ku wargalinay in aanaan anigu halkan u iman inaanu galno shir ay kooxaha Somalia ka qayb galayaan, waxa aanu halkan u nimid-na ay tahay inaanu kulan la yeelano golaha amaanka, arintaas oo markii danbe tixgalin la siiyey, isla markaana aanu kulan la yeelanay golaha amaanka.

S: Shirkaas aad ka qayb gasheen wufuudii ka qayb gashay ma noo sheegi kartaa cida ay ka kala socdeen?

J: Shirka qudha ee aanu ka qayb galnay waftigayagii wuxuu ahaa kii aanu la yeelanay golaha amaanka ee noo gaarka ah. Maanta galintii danbe-na waxa naloo sheegay inay jiraan shirar ay yeesheen golaha amaanka iyo kooxaha Somalia isku hayaa, kaasna waxba kalama socono.

S: Maxaad ka odhan lahayd hadalkii ka soo yeeshay doraad ergeyga qaramada midoobay u qaabilsan Somaliland Agoustine Mihiga, kaas oo sheegay in Somaliland ay tahay qayb Somalia ka mid ah, arintaas siday kuula muuqataa?

J: Hadalkaasi wuxu u muuqda mawqifkii barigii hore ay jimciyadda quruumaha ka dhaxaysaa ay ka aamin-san tahay ilaa imikana ay ka aamisan tahay, hadalkaasina maaha mid wax u dhimaya himiladda shacbiga iyo dawladda Somaliland ee ay ku doonayaan inay beesha caalamka aqoonsi ka helaan.

S: Maadaama shirkan aad ka qayb gasheen ee Nairobi ka dhacay qaar badan oo shacbiga ka mid ahi ay dareen shaki leh ka muujiyeen, maxaad ku difaaci lahayd mawqifka xukuumadda aad ka midka tahay?

J: Waxaan shacbiga Somaliland u sheegayaa inaanu u maqanahay oo aanu mar al-baab walba u garaacayno sidii Somaliland beesha caalamka uga mid noqon lahayd, waxaanan aamin-sanahay inaanay cidi shirkaa shaki ka muujin. Kuwa dadka sida khaldan wax ugu sheegayana waxaan leeyahay waar ummadda fidmadda ka daaya oo ka shaqeeya sidii aynu beesha caalamka wax ula qabsan lahayn.

Shirkan Nairobi waa mid taariikhiya oo aanu ku faanayno, Waana Madal aanay wali helin Qadiyadda Somaliland oo mihiim ah, qolooyinka ka hordhacayna waxaan u arkaa kuwo aan danta dalka rabin.

Shacbiga Somaliland ee sharafta badan waxaan leeyahay imika qadiyadiinii waa mid dawladdo badani fahmeen ee halkaa ka sii wada dadaalada iyo horumarka aad ku doonaysaan inaad beesha caalamka kaga mid noqono.

S: Shirkaas Nairobi ee aad sheegtay inaad si gaar ula kulanteen golaha amaanku maxaad is leedahay Somaliland wuu ka badali karaa?

J: Shirkan mihiimka ahi wuxuu wax wayn ka badalayaa xidhiidhka Somaliland iyo caalamka ka dhaxeeya, waayo waxa uu golaha amaanku ogolaaday inay Somaliland horfadhiisato. Waxaanan u mahad naqayaa dawladdo Somaliland saaxiib la ah oo gacan wayn ka gaystay shirkan aanu la yeelanay golaha amaanka.
 

Source:Haatuf