“Marwadu
Qaranka Waxba Imay Farin, Imana Fari-doonto” Wasiir Duur
Wasiirka arrimaha gudaha Md. Maxamed Nuur Caraale (Duur), ayaa ka
jawaabayn eedayn uu u jeediyay............
Hargeysa (TNN) -Wasiirka arrimaha gudaha Md. Maxamed Nuur Caraale (Duur),
ayaa ka jawaabayn eedayn uu u jeediyay siyaasiga Cabdiraxmaan
Cabdiqaadir, oo Arbacadii laga reebay diyaarad uu ka raacayay
madaarka Berbera oo ku socotay magaalada Muqdisho, isagoo Mr.
Cabdiqaadir ku eedeeyay wasiir Duur, inuu bixiyay in diyaaradda laga
soo reebo.
Cabdiraxmaan Cabdiqaadir, oo Geeska Afrika waraysi la yeeshay markii
diyaaradda, laga soo reebay, ayaa isagoo ka hadlaya eedaynta uu
wasiirka daakhiliga u jeediyay, wuxuu Cabdiraxmaan Cabdiqaadir yidhi
“Sidaan meesha ka fahmayna waxa laygu yidhi warkaas waxa soo bixiyay
wasiirka daakhiliga, markii wasiirka daakhiliga iyo wasiiro kale la
warays tayna waxa la yidhi arintan madaxtooyada ayay ka timid oo
wasiirka daakhiligu waxa uu ku dacwooday marwada madaxweynaha ayaa
aniga I soo fartay in diyaaradda laga reebo, wali iyagii ayaa isku
mashquulsan oo meel ay ku tiiriyaan waa ay la’yahiin, meel ay
arintaasu fadhiisan doontana garan maayo.”
Jawaabta Wasiir Duur
Hase yeeshe Wasiir Duur, oo xalay u waramay Wargeyska Geeska Afrika,
wuxuu beeniyay eedaymaha Cabdiraxmaan Cabdiqaadir, waxaanu sheegay
inuu madaarada dalka yaalo amar faraya inaan la ogolayn inay
Muqdisho socdaalo ku tagaan madaxda xisbiyada siyaasadda, madax
dhaqameedka iyo siyaasiyiintu. “Waxaan ka jawaabayaa hawshii
madaarka Berbera iyo siday u dhacday. Madaarka go’aan amar ah ayaa
yaala oo ah inaan madaxda ururada ama xisbiyada iyo siyaasadiyiinta,
iyo madax dhaqameedka inaanay u safri Karin kana iman Karin Muqdisho,
oo ah goob aynu siyaasadda ku kala duwanahay oo uu ka dhisanyahay
maamul ina sheeganayaa. Xukuumaddu wada hadal ayay kula jirtaa
waxaanu u dhexeeyaa labada dawladood, Markaas waa inaanu doc kale ka
socon isu socodkii siyaasiyiinta, madaxda ururada iyo xisbiyada iyo
madaxdhaqameedka oo ah masuuliyiin tusaale u noqon kara shacabka
Somaliland. Markaas go’aankaasi waa go’aan madaarada yaala, cid
kasta oo ka timaada ama tagtana lagu qaadayo. Intaas tegitaankooda
iyo ka imaatinkoodu waa mamnuuc, markaas qofka siyaasiga ah ee sii
socdaa haddii aanu dambi gelin noqo ayuun baa la odhanayaa, labadaas
qof [Cabdiraxmaan Cabdiqadir iyo Maxamuud Siciid] oo keliya maaha ee
masuuliyiin kale oo badana waa la celiyay, waa shaqadda laanta
socdaalka oo ka tirsan wasaaradda arrimaha gudaha iyo amarka ay
qabto.”
Isagoo Wasiirka daakhiligu ka sii hadlaya hadalkii Cabdiraxmaan
Cabdiqaadir uu ku sheegay inay marwada koowaad Aamina Sheekh
Maxamuud Jirde bixisay amarka diyaaradda lagaga soo reebay wuxuu
Wasiir Duur yidhi “Waxa kale oo jira sida wax loo dhigay iyo
xajiimaynta qof aan hawl-maalmeedka dawladeed meelna ka soo gelin
sida marwada oo ah maamus qaran. Marwadu Maamulka dawliga ah amar
kuma leh, ee maamuus ayay ku leedahay, Marwadu amar ma bixiso, mana
bixin karto meelna kama soo gasho, imanay amrin, imana amri karto.
Markaas waxaan leeyahay marwadu qaranka maamuus mooyee maamul kuma
laha, waxba imay farin, imana fari doonto, ciddii warskaas tidhina
waa cid aan xishoonayn oo aan dhaqanka iyo maamulka iyo milgaha
midna garanayn, markaas arrinkasi ma jirin mana jiri karo, mana
dhicin, mana dhici karo.”
Farriinta Saxaafadda
Ugu dambayn, waxa uu wasiirka arrimaha guduhu farriin u diray
warbaahinta maxaliga ah ee dalka, waxaanu yidhi “Warbaahintu, waa
inay ilaalisaa, milgaha sharafta iyo asluubta oo qofkay wax ka
qorayso magaciisa la qoraa, qof aan la waraysan in magaciisa la soo
qoro maaha. Markaas aniga warbaahin i waraysatay oo hawshaas I
weydiisay ma jirto, warbaahintu ciday been ka xigato ha qorto oo ha
tidhaahdo hebel ayaa sidaas yidhi. Waxaan kula talinayaa wixii la
dhawri jiree sharaf lahaa in la dhowro, marka muranku iyo wax ka
sheegu maamulka yahay, inaan guryaha loo gudbin, taasna waan idin
kula talinayaa.”
Source: Geeska Afrika
|