Suldaanka Guud ee Beelaha Gabiley oo ku Baa qay in la HIrgeliyo Go’aannadii Ergada Dhexdhexaadinta

“ Waa in la helo sharci fasaxaya inaan la isku xidhin doorashada iyo natiijada diwaangalinta ee laga sugayo SERVERKA ”

“ Waxaan leeyahay masuuliyiinta Komishanka Doorashooyinka ha ku dhimanina, hanna ku ceeboobina wax aydaan awood u lahayn maamulkiisa… ummaddiinana ha u go’aaminina eed cid kale leedahay ”

Suldaan Ismaaciil Suldaan Cabdiraxmaan, Suldaanka Guud ee beesha Gobolka Gabilay, kana tirsan Golaha Guurtida


Suldaanka guud ee beelaha degaanka Gobolka Gabiley Suldaan Ismaaciil Suldaan Cabdiraxmaan, isla markaana ah mudane ka tirsan Golaha Guurtida, ayaa ugu baaqay Madaxweyne rayaale iyo saddexda xisbi qaran in ay hirgeliyaan qodobadda go’aankii ergada dhexdhexaadintu ka soo saareen khilaafkii cakirnaa ee siyaasadeed.


Qoraal talo-bixin ah oo Suldaan Ismaaciil shalay ka soo saaray xalka murannada siyaasiga ah ee dalka ka aloosan iyo dib-u-dhacyada doorashada, waxa kale oo uu Komishanka Doorashooyinka uga digay in ay tunka u ritaan masuuliyadda hawl aanay fulinteeda awood u lahayn.


Suldaan Ismaaciil Suldaan Cabdiraxmaan oo ka mid ah xildhibaannada Golaha Guurtida ee u codeeyey go’aankii muddada xilka loogu kordhiyey Madaxweyne Rayaale, isla markaana salka u ahaa khilaafkii cuslaa ee dalka ka taagnaa bilihii la soo dhaafay, waxa uu qoraalkiisa ku soo bandhigay talooyin ku wajahan furdaaminta murannada siyaasadeed, qabsoonidda doorashada, diiwaangelinta iyo digniino uu u jeediyey Komishanka Doorashooyinka iyo saddexda xisbi qaran.


Waxa kale oo Suldaanku ku taliyey in aan natiijada diiwaangelinta codbixiyeyaasha shuruud looga dhigin qabsoomidda doorashada madaxtooyada, sidaa awgeedna haddii natiijada diiwaangelinta ee seerfarka laga sugayo ku soo bixi waydo waqtiga loo qoondeeyey la qabto doorasho aan duwaangelin lahayn.


Qoraalka talo-soo-jeedinta ee Suldaan Ismaaciil Suldaan Cabdiraxmaan ka soo saaray xal-u-helidda khilaafka siyaasiga oo uu nuqul ka mid ah Jamhuuriya khadka e-mail-ka shalay ugu soo diray, waxa uu isagoo dhammaystiran u qornaa sidan:


“Walaalayaal; waxaynu wada ogsoonahay inuu muddooyinka ugu dambeeyay ina hadheeyey khilaaf siyaasadeed oo ba’an, kaasoo ka dhexeeyay xisbiyada ku tartamaya awoodda hoggaamineed ee dakeenna curdinka ah ee aan qaadi karayn hirdanka mowjadaha siyaasadda awood ahaan iyo bisayl la’aanta dimuqradiyadeed darteed.


Khilaafkaas oo aan weli si dhab ah u muuqan inuu dhammaaday, inkastoo khayr ALLAH ha siiyee ay dadaaleen rag isxilqaamay oo salaadiin, culimo, aqoonyahan iyo waxgarad kaleba lahaa ay innaga damiyeen kaarkii iyo culayskii ina hayey amma ina soo foodsaaray maalmihii muranku ugu xoogga badnaa, kuna dhexgalay guddi dhexdhaxaadin ah dhinacyadii isku hayey muranka siyaasiga ah, Ilaahayna ku guuleeyey in go’aamo ka soo saaraan, kuwaasoo sidaan ka wada maqalnay warbaahinta ku caddeeyeen inay ku wada qanacsan yihiin masuuliyinta saddexda xisbi qaran qolo waliba dhinacooda, taasina waa ta keentay deganaashaha iyo xasilloonida ka muuqata maanta siyaasadda dalkeena, waana wax Ilaahay loogu mahadnaqo, guddidii isxilqaantayna loogu duceeyo, laguna hambalyeeyo guusha ay ummadda u soo hooyeen, dhinacyada qaatayna lagu boorriyo siday uga dhabayn lahaayeen qaadashadooda.


Haddaba, markaan isxasuusino arrinta khilaafka dhaliysay oo ahayd muddo-kordhintii Golaha Guurtidu ugu kordhiyeen xilka madaxweynaha iyo ku-xigeenkiisa oo ay ka dhammaatay muddadii sharicigu u oggolaa iyo dib-u-dhaca ku yimi muddadii doorashada, taasoo dhinaca mucaaridku ku eedaynayeen Madaxweyne Daahir Riyaale Kaahin inuu sabab u ahaa dib-u-dhacaas ku yimi doorashada muddadeedii dhaaftay, isagoo madaxweynuhuna dhinac kale isaga riixayay, iskana bari yeelayay.


Haddaba akhriste, adigoo run ka sheegaya waxay tahay su’aashu: yaa ku eedaysan dib-u-dhacyadaas ku yimi doorashada? Cidda ku eedaysan dadwaynaha ayaa looga fadhiyaa garqaadkeeda.


Ta labaad waxa iswaydiin mudan ma la hubaa in doorashadu dhacayso wakhtiga cusub ee loo cayimey ee ku beegan 27ka September 2009, oo mala fulinayaa go’aankii guddida dhexdhexaadinta ee la wada aqbalay?


Aniga waxay ila tahay in aan la hubin in doorashadu waqtigaas ku qabsoomayso, waayo waxaad mooddaa inay dhinacyada isku hayaa (xukuumadda iyo mucaaridka) ka war-wareegayaan xaqiiqda dhabta ah ee jirta. Ku darsoo Komishanku Doorashooyinka Qarankuna awood iyo maamul aanay lahayn ayey kolba ku jaan-goynayaan muddada ay kolba cayimayaan, isla markaana iyadoo ay jirto dhawaaqyo kulul iyo ballanqaadyo cadcad oo ka soo yeedhaya dhinacyada sida tooska ah u khusayso arrinta doorashadu oo ku muujinayaan siday diyaarka ugu yihiin in doorasho galaan, kuna tartamaan iyo waliba siday ugu ooman yihiin in la qabto doorasho xor iyo xalaal ah (xukuumadda, xisbiyada qaranka iyo Komishanka Doorashada Qaranka).


Ta kale waxa muuqata markay arrintu sidaas tahay in aanu fulayn go’aankii guddidu dhexdhexaadinu, taasina waxay ina gayayasiinaysaa in aynu nahay qof xannuunsanaya oo xannuunkana ay u weheliso xummad xad-dhaaf ah oo markastana dhakhtarkii daawayn lahaa uu siinayo kiniin xummad-jabin ah, ehelkiisuna ku qanacsan yihiin uun xummadda ka jabtay, iyadoo la ogyahay in aan la baadhin, lagana dawayn xannuunkii xummadda ku keenay. Sidaas oo kale waxa dhigan murankan siyaasadeed ee innagu soo noqnoqonaya ee kolba maalinta uu bilaabmo aynu soo baraarugayno, haddana innagu dhaafaya xummad-jabinta la odhanayo waa inoo maalin heblaayo.


Aniga waxay iila muuqataa maalinta lagu heshiiyaa in ay tahay oo kaliya in loo ballamay xoojinta muranka oo kaliya, waayo waxa marag-madoon ah in aan laga wadahadlin, lana baadhin waxa hortaagan qabsoomidda doorashada la rabo inay dhacdo eedaymo iyo difaac la isku mariyo warbaahinta mooyee, sababtoo ah waxa heshiis lagu yahay in dalka ka dhacdo doorasho ku salaysan natiijada ka soo baxda duwaangalintii codbixiyeyaasha. Waxa kale oo lagu heshiiyey in la kala shaandheeyo muwaadiniintii isdiiwaangalisay si loo tirtiro laba-kaadhlayaasha, farsamadaasna waxa loo adeegsaday qalab casri ah oo aan ku jirin gacanta Komishanka, balse ku jira gacan cid kale oo ay u soo xilsaarteen ciddii innaga caawisay hirgalintii diwaangalinta, kuwaasoo aynu iminkana ka sugayno caawimada doorashada, ciddaas oo aynaan si toos ah u maamulin.


Haddaba, innagoo aan weli ahayn dawlad isku filan dhinac walba oo ku sifaysan (nin baryootamayaa doorasho malaha), ayna caddahay in aanay soo bixin natiijadii diwaangalinta, weliba aanay soo muuqan goorta dhabta ah ee ay soo baxayso maxay innoogu fadhiyaan heshiisyada riyada ku dhisan ee ay galayaan hoggaamyayaasha siyaasadeed ee dalkeennu, iyadoo aanay marna ka dhexmuuqan qoraal iyo afba heshiiyada ay galayaan waxay kaga gudbi lahaayeen natiijadaa aan weli la hayn ee ah Air Inshaa Allaah, miyaanu arrintoodu u ekan sheekadii saddexda nin oo martida ahaa ee guriga ay ku qayilayeen la soo hordhigay meydka, dabadeed nin ka mid ahaa musqusha tagay ee uu soo arkay meydka qolkoodii horyaal. Cidna uma sheegin ee wuu iska fadhiistay; labadii nin ee kale ayaa iyaguna midba mar suuliga tagay midkoodba ma sheegin, waxaannu dhammaantood iska sii wateen qayilaadoodii, iyagoo ka baqaya ninka sheega ma dhaafto in lagu qaado. Waxa maanta sidaas oo kale ka dhigan xukuumadda, xisbiyada qaranka iyo Komishanka Doorashooyinka oo mid walba ka baqayo hadduu boogta taabto in lagu eedeeyo dembiga ah ishortaag doorasho iyo dibindaabyo dimuqraadiyadeed. Haddaba, waxa habboon in aynu uga tashano sidii saddexdii nin uga wadatashadeen, una xalliyeen meydkii ee u yidhaahdeen, waxaynu wada ognahay ma ka tashanaa! Haddii kale yaan ummaddan masaakiinta ah la wareerin.


Ugu dambayn, waxaan u soo jeedin lahaa dhinacyada ay sida tooska ah u khusayso iyo dhammaanba shacbi-waynaha reer Somaliland in laga tashado intaanay dhammaan muddadii loo cayimay doorashada, lagana midho-dhaliyo heshiishkii u danbeeyay, lagana wada hortago dib-u-dhaca dambe oo ku yimaad doorashada si aynu uga badbaadno khilaaf oo sababi kara wax aynaan furdaamin karayn, lana helo sharci fasaxaya inaan la isku xidhin doorashada iyo natiijada diwaangalinta ee laga sugayo SERVERKA, lana yidhaa haddii la helo natiijada rasmiga ah ee laga sugayo serverka inta ka horreysa waqtiga loo calaamadeeyey qabashada doorashada ALXAMDULILAAHI, haddii la waayo natiijadaasna la yidhaa Rabbull caalamiin, illeyn awalba doorashooyin hore ayeynu soo galnay ee si aynaan u mahadin odhaahdii ahayd waxbadso wax beel bay dhashaa.


Waxa kale oo aan odhan lahaa masuuliyiinta Komishanka Doorashooyinka Qaranka ha ku dhimanina, hana ku ceeboobina wax aydaan awood u lahayn maamulkiisa, waxbana ka ogayn xilli wax ka soo baxayaan, ummaddiinana ha u go’aaminina eed cid kale leedahay oo ha ku waayina kalsoonida ummaddiina iyo karaamadiina, waxana loo baahan yahay inaad dalkiina iyo dadkiinaba ugu talisaan wiixi awooddiina ah oo caddaysaan wixii jira ee lama huraan ah, taladiinuna noqotaa waxaadan hurayn horaa loo yeelaa, waxaanan Ilaahay ka baryayaa in uu sida inoo khayr badan ina waafajiyo.”






Jamhuuriya Online