SooyaalkaTaariikheed ee Dhacdooyinkii Dastuurka Somaliland iyo Haldoorka maanta ee ka talo bixinta Ururada Siyaasadeed

Hal-xidhaalaha Maanta : (Yaa Labeeyey 60 kii oo liibaaney).

Tixraac warqadda tirsigeedu yahay JSL/M/MG//083-399/032011 kuna taariikhaysan 14/03/2011 kana soo baxday xafiiska Madaxweynaha JSL. Warqaddaas oo markii aanu dhuuxnay nuxurkeeda ugu wayni ku aadanaa Cilmi baadhis iyo ka talo bixinta baahida sharci ee ku gadaaman mawduucan, duruufihii siyaasade ed, dhaqaale iyo nabadgelyo.

Mudanayaal iyo Marwooyin,

Waxaanu halkan idiinku soo bandhigaynaa Sooyaal Taariikheedkii dhacdooyinkii Dastuurka JSL iyo Halxidha alaha Maanta

Haddii aan ku horreeyo hal-xidhaalaha maanta- yaa liibaanay 60kii oo labeeyey, maanta waxa laga joogaa nus-qarni iyo dheeraad 26 June 1960-gii markii aynu xornimada ka qaadanay Boqortooyadii Ingiriiska, wax aynu calankeena ku tuurnay 1 July 1960-gii god madow oo dusha ka dahaadhan (bilaa shuruud) taasoo ina dhaxal siisay burburkii, hooggii iyo jabkii waxaana dabada ka riixayay caadifadeenii rabitaankii 5-tii So maliya. Haddaba ifafaalihii maalintaas ayaad moodaa in mar labaad soo butaacayso, oo ay dabada ka riixa yaan gacan dibadeed oo xooggan oo leh Plan 1,Plan 2, Pland 3 ilaa Plan 5. Haddaba qorshihii 1aad wuu fu lay maantana waxay maraysaa Plan 2 oo ah in la helo Xisbiyo fududeeya geeddi socodka qarsoon oonu ugu magac darnay YAA LABEEYEY OO LIIBAANAY. Hal-xidhahaasi waa mid u furan ummadda Somaliland.

Haddaynu Haddaba si toos ah isu dul taagnay hal-doorka mawduucan taagan, nidaamkeena siyaasadeed iyo duruufaha ku gadaaman. Waxaaana mudan in talooyinka uu Madaxweynuhu ka sugaayo Guddiga aynu gundhig uga dhigno dhacdooyinkii is dabajoogay ee ina soo maray, si xaqiiqada dhabta shacabku u fahmo dhacdooyinkii uu soo maray Dastoorka JSL .

Markii laga yimi Shirweynihii qaran 1993 waxa la soo unkay 2 gole Baarlamaan oo ku dhaqmayay axdi qarameedkii la jideeyey, xilkooduna wuxu ahaa muddadaa ay joogaan inay diyaariyaan Dastuur Qaran iyo Nabadaynta Beelaha walaalaha ah ee Somaliland.

Shirweynihii 3aad ee beelaha Somaliland oo lagu qabtay Hargeysa Oct 1996 – Feb 1997 waxa la saaray guddi qaabilsanayd isku dubba-ridida laba nuqul Dastuur.

Guddida Isku dubba-ridida oo ka koobnayd 15 xubnood oo aanu ka xusi doono Madaxda hagaysay waxay ahaayeen sidan:

1. Sh. C/laahi Sh. Cali Jowhar Guddoomiye
2. Maxamed Axmed Cabdulle ( Sakhraan) Gudd. Ku-xigeen
3. Xil. C/qaadir Ismaaciil Jirde Xoghaye
4. iyo 12 Xubnood oo kale

Waxa kale oo jirey guddidii ugu sarreysay hogaaminta shirka oo ka koobnaa 13xubnood oo aanu iyagana ka xusayno Madaxdii hagaysay oo ahaa sidan:-

1. Sh. Ibraahim Sh. Yuusuf Sh. Madar Guddoomiye
2. Sh. Axmed Nuux Fure Gudd. Ku-xigeen
3. Dr. Maxamed Cabdi Gaboose Xoghaye
4. iyo Toban (10) Xubnood oo kale

Haddaba Guddigaas isku dubaridida Dastuurku waxay adeegsanayeen nuquladii Dastruurka ay sameeyeen Golaha Wakiilada ee lagu soo doortay Axdi qarameedkii 1993, iyo mid uu soo diyaariyey khabiir Sudaani ah oo uu u xilsaaray Madaxweyne Cigaal, Waxayna soo bandhigeen Dastuur ku meel gaadh ah oo ka koobnaa 156 qodob sanadkii 1997-kii kaasi oo loogu codeeyey shir weynihii 3aad ee Beelaha Somaliland laguna ansixiyey

Qodobka 11aad ee Dastuurkaasi wuxuu u dhignaa sida tan:-

Qodobka 11aad.

Nidaamka Siyaasadeed

1. Nidaamka siyaasadeed ee Jamhuriyada Somaliland waxa saldhig u ah nabad, talo wadaag, Dimuqraadiyad iyo nidaamka Xisbiyada badan
2. Tirada Xisbiyadda siyaasadda ee jamhuuriyada Somaliland kama badnaan karaan saddex Xisbi Qaran.
3. iyada oo xeer gaar ahi habayn doono qaabka loo furan karo Xisbi siyaasi ah, waxa reeban in xisbi lagu dhiso gobolaysi iyo qabyaalad

June 1999 Madaxweyne Cigaal wuxuu soo jeediyey in kaabis lagu sameeyo Dastuurkii Ku meel gaadhka ahaa, wuxuuna soo bandhigay nuqul Dastuur oo ka kooban 99 qodob, oo xubinta 2aad, qodobka 11aad ay u dhignayd sida tan:-

Qodobka 11aad

Nidaamka Siyaasadeed

1. Nidaamka siyaasadeed ee Jamhuuriyada Somaliland waxa saldhig u ah, Nabad, Talowadaag, Dimuqraadiyada iyo Nidaamka Xisbiyada Badan.
2. Xisbiyada siyaasiga ah iyo hab dhismeedkooda waxa Qeexi doona xeer.

Waxaana ku lifaaqnaa xeer nidaamiyaha (Nidaamka iyo shuruucda Axsaabta ee Somaliland) waxaana ku qeexnayd qodobada 12aad iyo 13aad in Xisbiyada qaranka ay yihiin 2 Xisbi, isla markaasna qodobka 19aad wuxuu jidaynayayey in guddiga diiwaangelinta ay mudadoodu tahay 5 sano.

Golayaashii wakiilada iyo guurtidii ayaa ka biyo diiday kaabistii Dastuurka ee uu soo jeediyey Madaxweyne Cigaal oo meel iska dhigay waxayna magacaabeen laba guddi oo ka kooban Golaha Guurtida iyo Golaha Wakiilada oo kala ahaa:-

ü Golaha Wakiilada 13 xubnood – Gudoomiye Xasan Axmed Ducaale

ü Golaha Guurtida 11 xubnood – Gudoomiye Saciid Jaamac Cali

24 Xubnood

Guddidaas ka kooban labada gole waxay keeneen nuqul kaabis Dastuur oo ka kooban 111 qodob.

Sida sharcigu qorayo waa in 2da gole mid waliba gaarkiisa ugu codeeyo qodob-qodob 2/3. dabadeedna golaha Wakiiladu waxay ugu codeeyeen Qodobkii 11aad oo noqday qodobka 9aad ee Dastuurkeenna kaas oo lagu xadiday tirada Xisbiyada inay noqdaaan 3 Xisbi, halkaana lagu daadifeeyey qaabkii Madaxweyne Cigaal u soo dhigay ee furnaa. Codaynta uu ku meel mariyay G/Wakiiladu qodobkana waxay u dhacday sidan:- 56 Ogol, 5 Diidan iyo 3 Aamus ah.

G/Guurtiduna waxay dhinacooda isla qodobkaa 9aad ku meel mariyeen 62 Ogol, 4 Diiddan, 0 Aamus

Dastuurka loo codeynaayey waxaa jabay 19 qodob oo Dastuurka ah kaas oo uu ku noqday sidiisii hore (Dastuurkii ku meel gaadhka 97). Qodobadaas oo u baahnaa in la xalliyo iyo Qodobka 9aad ee nidaamka siyaasadeed waxa xannibay in la saxo duruufaha ku gaadaaman ee nabadgelyada awgeed iyo ictiraaf la’aanta Qaranka oo laga baqay haddii la gudo galo arrimahaa Dastuuriga ah ee Jabay in ay abuurmaan khilaaf dhexdeena ah iyo awood dhaqaale oo aan loo hayn taasoo haddii la kaabo u baahanaysay Afti Qaran oo dambe, welina taagan. waana kuwan qodobada oo dhammaystirani marka laga yimaado Qod. 9aad ee kor ku xusan iyagoo tilmaaman Qodobka ay hore ugu jireen iyo Qodobka ay hadda Dastuurka kaga jiraan (Ogow Qodobka waaya 55 cod ugu yaraan wuu jabay, labada Gole Barlamaan mid walibana Goonnidiisa ayuu ugu codaynayaa 2/3 tirada guud ee Gole walba)

1. Dhaqaalaha Dalka: Qodobka 11aad ee Dastuurka G/Wakiilada: 50 Ogol, 11 Diidan, 2 Aamus.
2. Tirada Golaha & Doorashadiisa: Qodobka 39aad oo hadda ah qodobka 40aad.

* Guurti oggol 17,diidan 27, aamus 24
* Wakiilo oggol 34, diidan 25, Aamus 0

1. Muddada Xilka iyo Xilliga Doorashada: Qodobka 40aad oo maanta ah qodobka 42aad Guurti: ogol 17, diidmo 27, aamus 24.
2. Awoodda iyo Waajibaadka Golaha Wakiilada: Qodobka 51aad oo maanta ah qodobka 53aad G/Wakiilada: ogol 10,diidan 49, aamus 0
3. Kala diridda golaha wakiilada: Qodobka 54aad oo imika noqday 56: oggol 10, diidmo 49, Aamus 2 (Waxa Jebiyey G/Wakiilada).
4. Doorashada xubnaha guurtida iyo mudada xilkooda: Qodobka 56aad imika ah 58 wakiil oggol 26, diidan 36 aamus 4.
5. Tirada golaha guurtida: Qodobka 57aad oo maanta ah qodobka 60aad

* G/Wakiilada: oggol 22, diidan 29, Amus 12
* G/Guurtida: oggol 19, diidan 38, aamus 9

1. Awoodda iyo Waajibaadka Golaha Guurtida: Qodobka 58aad oo maanta noqday qodobka 61aad ee Dastuurka

* Golaha Wakiilada; ogol 46, diidmo 10, aamus 7

1. Arrimaha Golaha Wakiilada iyo Golaha Guurtidu iskaga mid yihiin: Qodobka 60aad imika noqday qodobka 73aad Golaha Guurtida: oggol 16, diidmo 46, aamus 5

10. Soo ban-dhigidda mashruuc sharci: Qodobka 61aad imika noqday qodobka 74aad Golaha Guurtida oggol 16, diidmo 46, Amus 5.

11. Shuruucda lagu dooranayo Madaxweyne iyo ku-xigeenka: Qodobka 67aad imika noqday qodobka 82aad Golaha Guurtida: oggol 15, diidan 49, aamus 2

12. Habka loo raaco xeer-dejinta: qodobka 68aad oo imika ah qodobka 83aad Golaha Guurtida: oggol 5, diidan 61, aamus 1.

13. Dhaarta Madaxweynaha iyo Ku-xigeenka: Qodobka 69aad oo iminka noqday qodobka 84aad Golaha Wakiilada: ogol 25, diidan 28, Aamus 8

14. Awoodda Madaxweyne ku-xigeenka: Qodobka 76aad qodobkaas meeshaba waa laga saaray (Duplicated) lagu laba goor celiyey (Hadda waa Qod. 91aad ee Dastuurka)

15. Hab maamuuska Madaxda sare ee qaranka: Qodobka 77aad imika noqday qodobka 93aad Golaha Wakiilada: oggol 46, diidan 14, aamus 1

16. Guddiga caddaalada: Qodobka 92aad iminka noqday qodobka 107 Golaha Wakiilada: oggol 36, diidan 14, Aamus 1. Guurtida: Ogol 54, Diidan 5, Aamus 0.

17. Hawsha Guddiga Caddaalada: Qodobka 93aad iminka noqday Qodobka 108aad Golaha Wakiilada: oggol 50, diiddan 5, aamus 4.

18. Hay’adaha Dawladda ee Gaarka ah: Qodobka 98aad iminka noqday qodobka 113. sidii hore ayaa lagu celiyey – Waxa laga saaray Guddiga Fadwada oo laga dhigay Qodob gooniya.

19. Guddiga fadwada qaranka: Qodobka 100aad iminka noqday qodobka 115aad guddiga culimada, Golaha wakiilada: oggol 45, diidan, 13, aamus 2

Mar haddii 19 qodob jabeen, waxay ku noqonayaan sidii Dastuurkii ku meel gaadhka ahaa ee 97-kii lagu ansixiyey taasoo ka dhigaysay qodobada Dastuurkeena 111+ 19 = 130 Qodob oo ah sida ay ugu codeeyeen aftida Dastuurka shacabka reer Somaliland 97%.

Nuqulka Dastuurka dambe qodobkii 11aad wuxuu noqday qodobka 9aad oo u qoran sidan:-

Qodobka 9aad.

Nidaamka Siyaasadeed

1. Nidaamka siyaasadeed ee jamhuuriyadda Somaliland waxaa saldhig u ah nabad, talo wadaag, dimuqraadiyad iyo Nidaamka Xisbiyada badan.
2. Tirada Xisbiyada siyasiga ah ee dalka JSL kama badnaan karaan 3 (saddex ) Xisbi
3. iyadoo xeer gaar ahi habayn doono qaabka loo furan karo Xisbi siyaasi ah waxa reeban in Xisbi lagu dhiso gobolaysi iyo qabyaalad.

Waxayna soo raaciyeen xeerka Nidaamka Axsaabta sidaas ayaana loogu codeeyey.

Haddaba, doodda haatan ee ku saabsan furitaanka ururadu waxay ahayd mid si ballaadhan loo falanqeeyey 2007, waxaana si cilmiyeysan u lafo guray urur garyaqaano ah (Institute of Legal Research and Development for Somaliland (ILRAD)) waxayna ka soo saareen go’aano si cad u muujinaya khasaaraha ay keeni karto furitaanka Ururo Siyaasadeed marxaladdan waxaana ka mid ah:-

1. Waxaa samaysmaya oo la diiwaangelinayaa ururo ku salaysan qabiil iyo gobolaysi arrinkaas oo ka hor imaanaya qodobka 9aad ee Dastuurka.
2. Mar haddii aanay suurtagal ahayn in madaxweyne Xisbigiisu waayey shahaadadii aqoonsiga Xisbiyada oo tartankii (5) shan sanad-laha laga badiyey aanu mar labaad doorasho isu taagi karin sidaasna uu xaq xuquuqdiisa dastuuriga ah ku seegay, taasoo ka hor imanaysa qodobka 88aad xubintiisa 2aad.
3. Habka dhaqan dhaqaale ee bulshada oo ka gudbi waaya kuna tiirsanaada habdhaqankii qabiilka iyo qabiilaysiga ee taariikhiga ahaa oo baranweyda siyaasadda iyo dawladnimada, kaasoo ka hor imanaya qodobka 90aad ee Dastuurka .
4. Dawladnimada oo fadhiid noqota iyo nabadgelyada oo faraha ka baxda, taasoo ka hor imanaysa qodobka 90aad ee dastuurka.
5. Xisbiyada oo dhicisooba ama ku meel gaadh uun ahaada, oo ururnimadu ka qiimo roonaato taasoo ka hor imanaysa qodobka 9aad ee Dastuurka.
6. Xuquuqda dadka laga tirada badan yahay oo inta badani ku xadgudubto oo dawladnimada loo sinnaan waayo, taasoo ka hor imanaysa qodobka 8aad ee Dastuurka.

Khasaaraha kale ee ka iman kara furista Ururada waxa ka mid ah:

1. Xisbiyo Xag-jir ah oo waddanka ka abuurma (Sida la wada Ogyahayna mandaqada iyo Geeskaba si baaxad leh ayay u deggen yihiin oo miisaan iyo dhaqaaleba ku haystaan).
2. Hadday yimaadan 100 urur oo isdheer 10 cod, 5 cod ilaa hal cod yaa u xaq sooraya?
3. Haddii la fasaxo in 5tii sano mar la furo ururada waxa meesha ka baxaya Xisbiyada mucaaridka oo maadaama ay ogyihiin in Berri lagu furayo ururo cusub waxay ku milmayaan Xukuumadda, waxaana dhacaysa in la waayo mucaarad adag oo toosiya dhaliilaha xukuumadda sidaasna dalku wuxuu ku noqonayaa (One Single Party system).
4. Haddii la fasaxo furista ururada oo la qabto doorashada ugu horraysa ee D/Hoose oo ay soo baxaan saddex xisbi oo cusub oo aan ahayn kuwii hore u jiray sida (Oogo, Hawd, Guban). Golayaasha kale ee Baarlamaankana ay fadhiyaan saddexda Xisbi ee hadda jira (UCID, UDUB, Kulmiye) markaas dalku ma wuxuu yeelanayaa 6 Xisbi taas oo ka hor imanaysa Qodobka 9aad ee Dastuurka?
5. Haddiiba la furo ururo siyaasadeed oo ku tartama G/Degaanka waxa waajib Dastuuri ah noqonaysa in muddo lix bilood ah lagu qabto Doorashada Madaxtooyada iyo ta Wakiiladaba oo wakhtigoodii ka soo hor-maraan (Early Presidential & Parliamentary Elections) si loo waafajiyo Qodobka 9aad ee Dastuurka.
6. Haddii iyadoo ay jiraan dhammaan sababaha kor ku xusan oo aan ku soo sheegnay khatarta arrintani la iman karto oo aynu iska indhatirno waxay ka dhigan tahay inagoo Dastuurkii laabnay, halkaas wixii ka sii danbeeyaana waa S/Land ma jirto iyo Dawladnimadii aynu dhiiga, tacabka, talada iyo adkaysiga badan u soo hurnay oo si fudud u burburta.
7. Wakhtigan oo Dalku ku jiro Abaar adag iyo sicir barar oo dhammaan wada saaamaysay dad iyo duunyaba iyo dhaqaale xumada baahsan ee jirta, isla markaana ay jirto colaad ay wadaan dad Somaliland-diid ah iyo tan guud ee mandaqadda ka jirta oo saameyn toos ah inagu leh, dalkuna dhawaan ka soo baxay doorasho xanafteedii iyo xurgufteedii wali laga doogin, goboladeenii dalkana aynaan gacanta ku wada hayn, furista ururo cusub waxay meesha ka saaraysa ama dhaawac weyn oon laga soo kaban karin u geysanayasaa nabadgelyada, midnimada, iyo dawladnimada Somaliland.

Gaar u Falanqaynta Xeer Lr. 14.

1. Asbaabaha wiiqay xeer 14 waxa ugu waynaa wakhtigaas, waxaa wadanka ku yaraa ama ka maqnaa garyaqaano ka talo bixiya sharciyadda. Waxa xusid mudan markii taas la ogaaday waxa golaha wakiiladu wakhtigaas aasaasay (Faculty of Law) ee Jaamacada Hargeysa 2001 waxaana lagu bilaabay 19 xildhibaan oo ka socday golaha wakiilada.
2. waxa xusid mudan xeer 20/2001 sidii loogu kaabay wixii ka dhinaa xeer # 14 sida ururadii ku guuldaraystay inay soo baxaan ay ku biiraan saddexda Xisbi Qaran. Haddii loogu talo galay in mar dambe Xisbiyo loo tartamo Ururadii SAHAN, HORMOOD iyo ASAD xubnahoodii laguma biiriyeen Xisbiyada Qaran ee waxay ku jiri lahaayeen Golaha degaanka iyagoo magaca ururadoodii ku fadhiya.
3. Guddigii Diiwaan-gelinta Ururada Siyaasiga ah iyo Ansixinta Xisbiyada Qaranka waxa Muddadoodu ku eekayd lix bilood ka dib Ansixinta 3da Xisbi Qaran (micnaheeduna yahay inaan dib loogu baahnayn maadaama ay Bixiyeen Shahaadooyinkii Xisbiyada Qaran ee rasmiga ah).
4. Xisbiyo qaatay Shahaadada Rasmiga ah ee Xisbi Qaran waxa ay Xisbinimada ku lumin karaan oo kaliya in wax ka beddel iyo furis lagu sameeyo Dastuurka.
5. Xeerka lagu murmayo ee xeer. No/14 wuxuu G/Wakiilada Somaliland soo galay June 99, goluhuna wuxuu ansixiyey July 2000, digreetada Madaxweynaha wuxuu ku soo baxay 06/08/2000 xeer Madaxweyne No. 26/2000. Haddaba waxa is weydiin mudan goormay dhacday Aftida Dastuurka ee laga rabay in shacbigu u codeeyo? Jawaab: Aftidii shacabka ee Dastuurku waxay dhacday 31May, 2001. Waxaana lagu dhaqan geliyey Decreeto-dan hoos ku qoran. Adduunkana kama dhacdo xeer ka horreeya ansixintii shacabka ee Aftida loogu doonayey inuu xeer ka hor dhaco iyadoon la ogayn HAA & MAYA dhinaca aftidu u dhici doonto. Waana ta keentay khilaafka Ba’an ee xeerka maanta taagan ee ka hor dhacay waqtiga shacbigu u codeeyey iyo waqtiga Maxkamadda Sare ansixisay aftidii shacabka iyo Decreetadii madaxweynuhu ku faafiyay.

DECREETO MADAXWEYNE NO: 129/72001

Madaxweynaha Jamhuuriyadda Somaliland

Markuu arkay: Qodobka 90aad ee Dastuurka Jamhuuriyadda Somaliland.

Markuu arkay: Qodobka 130aad ee Dastruurka JSL oo qeexaya in ku

Dhaqankiisu ka bilaabmayo ka dib ansixinta natiijada aftida

Dastuurka.

Markuu arkay: Go’aanka MS/GMS/G-7/134/2001 ee Maxkamadda Sare ee

Jamhuuriyadda Somaliland ku ansixisay natiijada Aftida

Dastuurka Jamhuuriyadda Somaliland ee ku meel gaadhka

ahaa.

Markuu Tixeyliyey: Qodobka 47aad xubintiisa 1aad ee Xeer No: 16/2000 ee

12/11/2000 oo awood u siinaya soo saaridda xeerkan

Wuxuu

Soo saarayaa Xeerkan oo lagu faafinayo dhaqan galka Dastuurka Jamhuuriyadda Somaliland, waxaana lagu soo saari doonaa faafinta rasmiga ah ee dawladda.

Allaa Mahad leh,

Maxamed Ibrahim Cigaal

Madaxweyne

Haddaba waxa cad oon muran ku jirin in Xeer Lr. 14. lagu dhamaystirayey, dhammaystirkii Dastuurkii qabyada ahaa Qodokiisa 9aad ee jidaynaayey in xisbiyada qaranku ka badnaan 3 Xisbi Qaran kuwaas oo la siiyey shahaadooyinkii rasmiga ahaa ee Xisbinimo, sidaasna aftidii Dastoorka shacabka reer Somaliland ugu codeeyey 97%, madaxweyne Cigaalna ku soo saaray Decreetada Kor ku xusan, maxkamadda sarena sidaas ku asnsixisay.

Waxaanu haddaba Si Lexejeclo ku jirto u soo jeedinaynaa:



1. In xeer nidaamiye ay ka muuqato dhamaan xuquuqda asaasiga ah ee muwaadinka loo sameeyo Xisbiyada qaran ee iminka jira hawshaasna ay soo curiyeen komishanka Doorashooyinku loona gudbiyo golayaasha Qaranka ee xeer dejinta ugu dambeyna uu saxeexo Madaxweynuhu si faafin loogu soo saaro, si ay meesha uga baxdo Cabashada ah Xisbiyo dad gaar ah u xidhan.
2. Aynu ka taxadirno inaynu dib ugu noqono Qaybo, Qabiil, Gobolaysi iyo furfurnaan taasoo aynu ku wayno wax wada lahaansho iyo qaranimo. Damaceena iyo talaabadeenaba wixii macquul noqon kara aan la sugno wakhti ku habboon oo aynu helno bisayl Siyaasadeed iyo aqoonsi caalami ah.
3. Waxaan ka digaynaa afkaar dibadeed oo ay dabada ka wadaan dad aan xog-ogaal u ahayn arrimaheena hoose iyo damac shakhsi oo indha la’. Somalida ayaa ku maahmaahda Nimaan kuu furi doonin yaaanu kuu rarin.
4. 4. Inaynu Danta guud ka hor marino ta gaar ahaaneed, Somaliduna waxay ku maahmaahdaa wax badso wax beel bay leedahay.

Allaa Mahad leh,

Axmed Yussuf Yassin

K/S Guddoomiyaha UDUB