"Mawqifkayagii Waxba Iskama bedelin"  Faysal Cali Waraabe

Guddoomiyaha xisbiga Mucaaradka ah ee UCID Md. Faysal Cali Waraabe, ayaa saddexda xisbi qaran ugu baaqay inay wada jira uga shaqeeyaan sidii ay doorashada madaxtooyadu ugu qabsoomi lahayd wakhtiga cusub ee ay koomishanka doroashoyinku u cayimeen, waxaanu ku taliyay in xisbiga aan weli saxeexin soo jeedinta koomishanka ee doorashada madaxtooyadu uu qallinka ku duugo.

Md. Faysal Cali Waraabe, oo isaga oo jooga magaalada London ee dalka Ingiriiska xalay u waramay Wargeyska Geeska Afrika, waxa uu kale oo uu tallo ku soo jeediyay in la isu yimaado oo wada jir looga tashado qaddiyadda la xidhiidha dhammaadka mudada xukuumadda oo ku eeg 6 April, "Mawqifkayagu waa halkayagii, laakiin waxaanu leenahay hala kala saaro oo wakhtiga qorshaha ah ee ay koomishanku soo jeediyeen hala saxeexo, si aan wakhti u lumin. Laakiin dawladu waa inay ogaataa markay mudadu dhammaado bisha dambe in wakhtigii ka dhammaaday, maadaama oo aanu sharci oolina waa in laga tashadaa laakiin inaad madax adkaato maaha ee waa inaad ogolaataa in laga wada tashado." Ayuu yidhi Faysal Cali Waraabe.

Faysal Cali Waraabe, oo la weydiiyay inay Madaxweyne Rayaale ku kulmeen magaalada London ee dalka Ingiriiska waxa uu ydihi, "Maya, maanu kulmin, markii aanu xukuumadda ku nidhi koomishanka iyo diiwaangelinta halaga wada tashado wuu diiday inuu nala kulmo, markaas maxaanu ula kulmaynaa markuu London yimaado."

Md. Faysal Cali Waraabe, waxa la weydiiyay sida uu u arko aragtida odhanaysa marka ay mudadu ka dhammaato xukuumadda waa in tallada lagu wareejiyaa goleyaasha qaranka, waxa uu yidhi, "Goleyaasha Qaranka Loo dhiibi maayo oo sharci qorayaa ma jiro ee waa laga tashanayaa arrintaas. Waa in wakhtiga koomishanku soo jeediyeen la saxeexaa si koomishanku hawlihiisa u sii wato lagana doodaa marka uu wakhtigu ka dhaco dawladda wixii laga yeeli lahaa. Laakiin maaha in la xayiro diyaar garawga doorashada, cidda xayirtaana iyadaa hadhoow masuuliyada dib u dhaca wax ku yeelanaysa. Xisbi kastaaba waa inuu waajibaadkiisa ka soo baxaa, maaha waajibaadaadkiisa inuu cid kale ku canaanto."

Ugu dambayn Faysal Cali Waraabe oo la hadlaya saddexda xisbi Qaran waxa uu yidhi, "Saddexda xisbiba waa inay si deg deg ah isugu yimaadaan oo ay u wada saxeexaan wakhtiga la qoondeeyay si lacagta la inoogu fasaxo. Waxaan soo jeedinayaa in ka hor 6 April la isu yimaado oo la wada tashado, haddii wakhtigaas ka hor la isu iman waayo annagu dawladda waanu kala noqonaynaa kalsoonida oo xukumadaas ma ictiraafsanin, haddii ay labada xisbi kala noqdaana waa qayral sharci oo cidna la macaamili mayso."
 

Wargeyska Geeska Afrika