Marnaba Diyaar
Uma Nihin In Aanu Ina Rayaale U Saxeexno
Kordhin, Waayo Xaaraan Baanu U Aragnaa
Guddoomiyaha Xisbiga mucaaradka
ah ee Kulmiye Axmed Maxamed Maxamu ud (Siilaanyo), ayaa Baanka Dhaxe
Somaliland ku tilmaamay goob loo adeeg do boobka iyo dhaca Hantida
ummada, waxaanu sheegay uu Baanku ka mid yahay meelo uu farta ku
fiiqay in Xisbigiisu baabiin doono haddii uu talada dalka ku
guulaysto.
Axmed Siilaanyo oo xalay ka hadlay Madal ay ardayda Jaamacadaha
Hargeysa su'aalo ku waydiinayeen hogaanka sare ee Xisbiga Kulmiye,
waxa kale oo uu ka waramay arimaha dhawro oo ay ka mid tahay
mawqifka xisbiga kulmiye ka taagan yahay Muddo kordhin loo sameeyo
Madaxwayne Rayaale iyo Xukuumadiisa, isaga oo si cad yu sheegay in
aanu marnaba xisbigoodu u saxeexayn Mar labaad Madaxwayne Muddo
kordhin.
Guddoomiyaha kulmiye Axmed MAxamed Maxamuud (Siilaanyo), oo ugu
horeyn ka hadlay doorashada Madaxtooyada iyo kalsoonida uu ka qabo
haddii ay doorashadu dhacdo waxa uu yidhi " Maanta anagu hadaanu
doonayno inuu dalka isbadal ku yimaado, nooca kaliya ee aanu
isbadalka ku raadinaynaa maaha dagaal ee waa codayn iyo doorasho,
waxaanu mar walba cadaynaynaa xisbiga kulmiye ahaan iyo aniga iyo
walaalkay Cabdiraxmaan Saylici oo mushariiintii Xisbiga ah,
walaalahayo iyo taageerayaasha Xisbiguna iyo bulshada Somaliland
nagu garab taagan yihiin oo aanu kalsooni badan ku qabnaa Ilaahayna
waxa uu igu ogyahay Kalsoonida aanu maanta shacabka ku qabno waxaan
aaminsamahay haddii doorasho xor iyo xalaal ahi dhacdo in aanu 80%
in ka badan aanu helayno, doorashaduna waa taanu meesha u taaganahay
diyaarna waanu u nahay"
Axmed Siilaanyo, waxa uu cadeeyay in aanay marnaba ogolaanayn in
muddo kordhin loo sameeyo Xukuumadda Madaxwayne Rayaale, waxaanu
yidhi " Marnaba diyaar uma nihin inaanu ina Rayaale u saxeexno
Kordhin, waayo xaaraan baanu u arkaa. Waxa kaliya ee aanu taaganahay
oo aanu leenahay saacadaa la joogo marka 6-da bisha April ka
dhammaato Madaxwaynaha iyo Madaxwayne ku xigeenka wakhtigoodii oo
mudooyin badan loo kordhiyay, waa in labada gole ee sharciga ah oo
iyagu umadda ka wakiil ah xilka lagu wareejiyo oo ay sameeyaan ama
dhisaan cid doorasho xor ah oo xalaal ah gaadhsiisa ummada".
Mar uu ka hadlay Axmed Siilaanyo Baanka dhexe iyo lacagaha oo soo
daabaco oo uu dhaliilo u soo jeediyay waxaa uu yidhi " Meelaha ugu
waaweyn ee lacagta lagu lumiyo waxa ka mid ah baanka dhexe, baankan
maanta inoo dhisan waa hay'adaha qaranka u dhisan ee aynaan wali
xisaab celin uu leeyahay aynaan arag, baan uu furo maynaan arag, qof
lacag dhigta ma lihidin, baanku waa meel loo adeegsado boobka iyo
dhaca iyo lacagta la soo daabacdo. Hay'adaha aanu baabi'inayno ee
aanu bedelayno ee aanu baanan hagaagsan ku furayno, ganacsigiisa xor
ka dhigayno, waa siyaasadda ugu horeysa ee xisbiga Kulmiye." Isaga
oo hadalkiisii sii wata waxa uu yidhi " Bal iswaydii sanad kasta
marka ay doorashadu imanayso, maxaa lacag cusub loo soo daabaco oo
dad badani inooga baxaan lacagta timid ayaa isku beegta.
Guddoomiyaha Baanka oo la waydiiyay waxa isku beega wakhtiga
doorashada iyo daabacaada lacagtuna waxa uu yidhi iyadaa isku
beeganta ee anigu kuma beego, waxa kale oo jirta lacagtii loo jaray
Aafadii Burco, waxa ku xigtay tii Laascaanood, shilin wali
laascaanood la geeyay ma jirto, iyadana guryihii shacabka ayaa mid
mid loo galay sida halkan, lacagtaasi meesha ay martay cid taqaanaa
ma jirto, waxaasi oo dhan marka la isku geeyo lacag ciidaa ka fara
badan ayaa ka soo baxaysa, waxayna noqonaysaa lacag umadda wax looga
qaban karo
Waxaan leeyahay dhalinyaradu qayb buuxda ayay ka qaadanayaan dawlad
kasta oo la dhiso, waxaanu aaminsanahay dhalinyarada in tacliinta,
ciyaaraha iyo tasiidaadka ay u baahan tahay iyo waxbarasho dibadeed
iyo gudo in lacag badan oo malaayiin gaadha loo dhigo, lacagtaasina
maaha cashuurtaanu dadka ku kordhinaynaa, waxaanu caddaynaynaa oo
aanu cilmi baadhis ku samaynay in lacagta laga soo saari karo inta
qudha ee maanta jirta ee lacagta la xado ee tuugada, dhaca iyo
boobka laga reebo waxa lagu qiyaasay ilaa 180 milyan, lacagtaana
waxa loogu kordhinayaa shaqaalaha.
Waxa kale oo munaasibadan oo ay si wada jir ah u soo qaban qaabiyeen
Xisbiga Kulmiye iyo Ardayda wax ka barata Jaamacaha kala duwan ee
Magaalada Hargeysa, goob joog ka ahaa Masuuliyiinta kale ee
Xisbigaasi , kuwaasi oo jawaabo ka bixinayay su'aalo ay ardaydu
waydiinayeen.
Wargeyska Geeska Afrika, Hargeysa
|