Madaxweynaha Somaliland iyo Wefti uu hoggaaminayo oo si diiran loogu soo dhaweeyay magaalada London

London(TNN)- Madaxweynaha Somaliland Md. Axmed Maxamed Maxamuud (Siilaanyo) iyo Wefti  bal aadhan oo uu hoggaaminayo, ayaa saaka abaaro 07:00 aroornimo ka soo degay garoonka  dayuura daha ee Caalamiga ah ee Heathrow, waxaana halkaasi si diiran ugu soo dhaweeyay qaar ka mid ah Jaalliyada reer Somaliland ee magaalada London , wakiilka Somaliland ee UK Axmed Cumar Sangoore, Wakiilka Somaliland ee dalka Itoobiya Aadan Nuux Dhuule, La-taliyaha madaxweynaha ee arrimaha caalamka iyo aqoonsiga Dr. Maxamed Rashiid Sheekh Xasan, Gudoomiyaha Jaalliyada Somaliland ee UK SSUK Axmed Daahir Cilmi, Gudoomiyaha Xisbiga Kulmiye UK Ibraahim Xuseen, gudoomiye-xigeenka Kulmiye UK Cabdo Bacow.

Booqashada madaxweynaha iyo weftigiisu ku yimaadeen dalkan Britain waxa ku weheliya marwada 1aad ee Somaliland Aamina-Weris Xaaji Maxamuud Jirde , Wasiirka arrimaha dibadda Dr. Maxamed C/llaahi Cumar, wasiirka qorsheynta qaranka Dr. Sacad Cali Shire, Wasiir ku-xigeenka waxbarashada Cali Xaamud Jibriil, Chief of Cobinet-ka madaxtooyadda Xersi Xaaji Xasan iyo Xoghayaha gaarka ee madaxweynaha Cali Axmed Cali.

Madaxweynaha Siilaanyo iyo weftigiisu inta ay joogaan dalkan Ingiriiska waxa ay la kulmi doonaan wasiiro ka tirsan xukuumada Ingiriiska, mudanyaasha baarlamaanka, Shirkado ganacsi oo caalami ah iyo saaxiibada reer Somaliland. Sidoo kale waxa lagu wadaa in maalinta Sabtida ee bishu 27-ka Nov,2 010, in ay kullan balaadhan la yeeshaan Jaalliyada reer Somaliland ee ku dhaqan UK.



Source:Jamhuuriya Online