1-Somaliland waxaan u ahay
duq iyo waayeel
2-Dar illaahay weeyaan inay
Ani i doortaane
3-Mar hadday waxay
doonayeen damacii beenoobey
4-Oo aan rag ii daacadoo
dirira aan yeeshay
5-Mar haddaan hubkay ila
damceen dib ugu liishaamay
6-Oo aan dagaalkay galeen
daaqad kala boodey
7-Mar haddaan waxaan
doonayaba cidiba diidaynin
8-Oo aan damaashaad ku maro
dunida guudkeeda
9-Dantaydii haddaan gaadhay
oo daaro badan jeexday
10-Inay duubka boqor ii
xidhaan doorkan waan heliye
11-Shicibkaa i doortee
ninkii dudaya yeelkiise
12-Deeganta roob baan u
ahay dayrtan maanta ahe
13-Hadday Daahiroow
leeyihiin diif intaan badaye
14-Markaasaan u daadshaa
nin helay doollar baan ahaye
15-Dekedaha markaan xidhay
miyay doonni wadda raacday
16-Iyagaa is dooxee cidkale
uma dulloobeene
17-Dalluun laguma tuureen
waxay doonayeen abide
18-Derbiyada ma jiifeen
agoon loo daweriyaa
19-Durbaan uma garaacdeen
Nimaan ahayn hawl kar daacadahe
20-Dastuurkay dhigteen iyo
haddaan doorashaba diido
21-Waa ii diyaar ciidankii
daacadda ahaaye
22-Iyagoo dubaabado watiyo
kaare daba jooga
23-Duhur sow ma layn karo
iyagaa doortay cadowgoode
24-Haddaanse dawladnimaday
rabeen dabin u soo qoolay
25-Oo aan kuwaan hore u
dilay cidi u doodaynin
26-Mar haddii diktooradii
la xidhay duudsi laga yeelay
27-Isku duubnidoodii
haddaan deyr u kala ooday
28-Derejadii Siyaad ii
xidhaan daawadeed helaye
29-Oo ay dibnaha ruugayaan
diricyadoodiiba
30-Inaan Xamar ku daro baan
rabaan doorkan maanta ahe
31-Allahayoow waxaan
daarranahay doqoni waa moogee
|
