DEKEDA BERBERA OO LAGA JEBIYAY QUFULKII
DHOOFKA XOOLAHA EE AL JAABIRI
Xukuummada Somaliland ayaa
fasaxday in xoolaha si madax-banaan looga dhoofiyo Dekada magaalada
Berbera, islamarkaana qaar ka mid ah ganacsatada madaxa-banaan ayaa
shubay xashuurta Kumanaan neef oo Adhi ah oo loo sii marinayo dalka
Djabuuti wadanka Sucuudiga.
Af-hayeenka guddiga Ganacsatada
kooto-diidka ah ee Xoolaha Cabdiraxmaan Maxamed Xusseen (Shidaar) oo
xalay khadka Isgaadhsiinta nagula soo xidhiidhay ayaa sheegay in
xalay dekada magaalada Berbera ay ka bilaabantay rarka Afartii
doonyood ee ugu horeeyay oo mid kastaa qaadi karto ilaa afar kun oo
neef (4000), ka dib markii dhawaan Madaxweyne Rayaale ku dhawaaqay
in la fasaxay dhoofka Xoolaha laga bilaabo 25-kii bisha December ee
dhamaatay, “Hadalkii Madaxweynahu saxaafada ku cadeeyay markii
dhawaan socdaalka ku joogay Jabuuti, wax ka danbeeyay oo
dhaq-dhaqaaq ahi ma jirin, marar badan oo aanu la xidhiidhnay
xukuumada oo aanu damacday inaanu dhoofsano xoolahana, waxay nagu
qancinayeen masuuliyiinta hayadaha ay khusaysaa in wareegto la soo
saarayo oo arrintii weli Madaxweynaha ku xidhan tahay.
Caawa (Xalay) ayaana ugu horeysa wax xoolo ah oo ganacsatadayada loo
ogolaado inay ka raraan dekada Berbera, waxa ka bixi jiray uun
Xoolaha AL-jaabiri” Sidaas ayuu yidhi afhayeenka Gudiga ganacsiga
xoolahu, hase ahaatee waxa uu iftiimiyay in aanay ilaa hadda helin
wareegto rasmi ah oo xukuumadu ku ogolaatay dhoofka xoolaha balse,
loo sheegay in masuuliyiinta wasaarada Xanaanada xoolaha iyo
maaliyadu amar afka ah fareen hawl-wadeenada dekada. “Markii
xoolihii laga soo raray magaalada Laascaanood iyo Burco oo loo waddo
Jabuuti haamaha Berbera agtooda gaadiidku kala leexday, waxa yimi
culays badan oo cashuur la’aaneed. Markaa, caawa (Xalay) ayaa la
ogolaaday oo Wasiirka xanaanada Xoolaha iyo Maaliyaduba ay amar afka
ah ku siiyeen saraakiishooda joogta Berbera in ganacsatada loo
ogolaado dhoofinta Xoolaha.” Sidaas ayuu yidhi Shidaar, waxana uu
intaa ku daray oo uu tilmaamay in wixii ka danbeeyay, dhawaaqa
Madaxweyne Rayaale, uu kor u kacay qiimaha uu neefku ka joogo
Sayladaha Somaliland.
In kasta oo shalay ka hor gaadiid lagu daabulayay oo aan la ogolaan
in laga dhoofiyo Dekada Berbera. “In kasta oo Carafadii la soo
dhaafay hadana, qiimaha Neefka Adhiga ahi ka joogo Saylada Hargeysa
iyo Burco, lagama siisanayn wakhtigii lagu jiray Carafada waxana
Neefka la kala siisanayay maanta (Shalay) Sayladaha Somaliland $ 55
ilaa 60 doolar.
Dadkii xoolohooda loo jaray waxay heleen tar-tan iyo suuq ay
neefkooda ku baayacaan.” Ayuu yidhi Af-hayeenku waxana uu intaa ku
daray oo sheegay in Xoolo badan durba loo dhaadhiciyay Berbera,
kaasoo uu ugu horeeyo ka xalay laga raray.
Waxa jiray shir la filayay in Ganacsatada Xoolaha ee koota diidka
ahi isugu yimaadaan bishii december 25-keedii kaasoo ay Guddiga
ganacsatadu hore u sheeciyeen. hase ahaatee, Afhayeenka Ganacsatada
oo uu shirkan jaraa’id oo dhinaca Telefoonka ahaa uu ku wehelinayay
Cabdilaahi Carab oo ka mid ah guddiga ganacsatadu waxa ay sheegeen
in shiraas dib loogu riixay ilaa 15-ka bishan sababo la xidhiidha
howlihii diiwaan-gelinta iyo weliba dhawaaqii Madaxweynaha oo ku soo
beegmay darteed.
Ganacsatada Xoolaha iyo Xukuumada ayaa muran xooglihi ku dhexmaray
dhoofka Ganacsiga Xoolaha oo Xukuumadu gaar ugu xidhay Ganasde
Sucuudiyaan ah oo lagu magacaabo Saleebaan Al-jaabir. Kaasoo, markii
ugu danbeysay Bishii July ee sanadkii aynu soo dhaafnay helis
geliyay amaanka dalka ka dib markii Ganacsatadu ku daabuleen Xoolo
badan Dekada Berbera.
“Labadii hadaf ee aanu xukuumada isku heynay midi wuxuu ahaa, in
xoolaha la furo iyo in la sameeyo Maxjar oo xooluhu toos uga
dhoofayaan dekada Berbera lana furayo Sucuudiga, kolkaa labdii hadaf
ee aanu isku haynay kii xukuumadu ummada ugu baaqaysay, wuxuu noqday
waxaan jirin ilaa iyo immika, markaa horta Xukuumadu markay Beentii
Carabka nagula qanceen go’aanka ay qaateen waa ku mahad-sanyihiin,
laakiin waxaanu ugu baaqaynaa dalkan waa la dhacaye oo aanu
xukuumada uga fadhinaa in maxjarkii la furo oo xooluhu Sucuudi
Arabia toos uga tagaan Berbera. Laba in la waayo oo hantidii umada
ee la dhacay loo soo celiyo ama waxa lagaga bedeshay la tuso oo loo
soo bandhigo iyo inaanaan ku qanacsanayn kaliya in adhigii la furo.”
Sidaasna waxaa yidhi Cabddilaahi Carab.
Dhinaca kale, maamulka Gobolka Saaxil, saraakiil ka tirsan wasaarada
maaliyada iyo xanaanada Xoolaha oo aanu la xidhiidhnay ayaa dhamaan
noo xaqiijayay in la fasaxay dhoofka Xoolaha, islamarkaana aanay
jirin meel laga dhaafo go’aankii Madaxweyne Rayaale ku dhawaaqay.
Source: Ogaal
|