XISBIGII UDUB
OO XARAASHKA LA DHIGAY!!!
Waxaa soo wajahdey waayo adag iyo dhaqaale xumo weyn Xisbigii UDUB
ee ka midka ahaa Xisbiyadda ugu tunka weyn asxaabta Qaranka
Jamhuuriyadda Somalinad, isla markaasina in badan xukumaayey wadanka
Jamhuuriyadda Somaliland.
Hadaba Xisbigii oo muddo kooban ka sii maqan hogaanka dalka ayaa la
saaray xaraash oo la keenay suuqa si loo helo cid Xisbiga damaanad
qaadda dhaqaale ahaan iyo hogaan ahaanba. Xisbiga UDUB maha Xisbi
maanta loogu yabooho taageero dhaqaale marka la eego doorkiisa
Xisbinimo iyo mudadii uu soo jirey iyo weliba doorkii siyaasadeed ee
uu ku lahaa hogaanka dalka oo noqonaysa mid aan marnaba la dafiri
Karin, arintan keentay werwerka iyo walaaca ayaa Bulshadda reer
Somaliland ku abuuratay yaab iyo amakaag, waxayna u egtahay in
Xisbigan aanu sooba bixi karin oo u gudbi karin Xisbinimo muuxda
doorayooshinka foodda inagu soo haya ee deegaanka mar haddii
xaalkiisu yahay sidan iyo weliba si ka sii liidata oo isi soo
taraysa maalinba maalinta ka danbaysa.
Xisbiga UDUB waxaa ku jira niman aad u badan oo hantidda ummaddana
aad u boobay mudadii ay meesha joogeen, kuawaasi oo maanta aan ku
dhiiran Karin raganimadda iyo xiniinyaha Xisbi lagu hogaamiyo,
kuwaasi oo marna Xisbiga UDUB eega marna aduunkoodda eega oo ay aad
ugu adagtahay go,aan qaadasho iyo ficil weyn oo lagu samata bixiyo
Xisbiga UDUB, waxaa dhinaca kale soo yuururta busaaraddii iyo wax
la,aantii qolyahaasi la deristey sooyaalkii taariikheed ee
noloshoodda oo markay dib u milicsadaan ilmadda yaxaasku ka qubato,
isla markaasina keentay in dhamaan ay si waafiya uga madax
diinleeyaan hagista iyo hogaaminta Xisbiga oo ay maanta noqoto
maalin laysku tuur-tuuro Xisbiga yaa hogaaminaya iyo xagee dhaqaale
looga raadinayaa?,
Bulshadda reer Somaliland iyo Xisbiga KULMIYE ayaan midna wax
faa,iido ahi ugu jirin burburka iyo meel ka bixista Xisbiga UDUB oo
aan ku rajo weynahay in la badbaadin doono maalaha iyo asbuucyadda
foodda inagu soo haya.
Waxaan ugu baaqayaa raggii odayaasha ahaa in ayna is gaabin ee kor
isu taagaan oo Xisbiga hogaankiisa iyo maamulkiisa la wareegaan,
waxaa in muddaa laysku garba gorayeynaayey taladda iyo hogaanka
Xisbiga UDUB oo markii ay runi run tagtay nin weliba cadhuuftiisii
dib u liqay, isla markaasina nin weliba ogaadey halka aanu dhaafi
karin iyo awoodiisa qofnimo. Xisbi waxaa lagu hogaamiyaa beel
daajisnimo iyo xidhiidh weyn oo dhamaan bulsha weynta balaadhan ee
reer Somaliland lala yeesho, taasi oo ka madax banaan qabyaalad iyo
cadiifadda rag badani uu moodo inay meel gaadhsiinayso, maanta
Siyaasi weliba waxii ummadda uu gashaday ayaa uga soo dhiiqaaya,
kuwii qabiilka iyo qudhunka afkoodu bartay meeli ugama banaana
saxdda Siyaasadda Somaliland, maantana waa qooni socod xataa kuwii
ay dad isugu xigeen ay ka hayaameen oo shan geeddi ka guureen.
Xisbiga UDUB ayaa isku haleynaayey Mudane Dahir Rayaale oo ahaa
ninka ugu kiishadda weyn ragga Xisbiga ku midoobey, Rayaalena waxuu
iska fadhiistay Tuulo yar oo magaala madaxda wadanka Faransiiska u
dhow, halkaasi oo kiishadiisii uu barkaday, dhinaca kale Mudane
Cawil, Cabdilaahi Ina dhoolayere, Cali Warancade, Saciid Sulub,
Axmed Yusuf ayaa taageerayaashi Xisbiga UDUB naadinayaan oo la
waayey meel ay jaan iyo cidhib dhigeen.
Hadaba waxaan ugu baaqayaa masuuliyiinta aan kor ku soo xusay inay
talo, geesinimo iyo raganimo laysku biiriyo ama laysku jimciyo oo
Xisbiga laga samata bixiyo burburka, dhaqaale xumadda, hogaan
xumadda iyo mucaarad xumadda intaba.
Waxaanan u sheegayaa qolyahaasi sannad ayaad ku banjarteen ee sagaal
sano iyo dheeraad ayaanu Xisbiga KULMIYE jaabkayaga iyo maalkayaga
aanu ku wadney oo aanu weliba kaga maal, manfac iyo muruqba roorayn
kuwiinii xoolaha umadda guranaayey ee shiidaalkii, gawaadhiddii iyo
lacagtii ummadda sidda sharci daraddaa u isticimaalaayey.
Quushu meel cidhiidhiya ayey ku jirtaa oo libaaxyo ayey la hurudaa,
markaa waxaa loo baahanyahay in halkaasi loogu tago oo gacanta laga
soo qabsado, isla markaasina si fiican loo soo daadihiyo, waxaan
leeyahay hormoodkii iyo qab-qablayaashii UDUB guryahiina iyo
gawaadhidiina u xaraasha Xisbiga UDUB iyo guusha si aad guusha u
gaadhaan, markastana waxaa loo baahanyahay in aad tixraacdaan
habdhaqankii dhaqan dhaqaale ee Xisbiga KULMIYE iyo siddii uu
halkaasi ku gaadhey.
Haddii laysu qiraayo oo dagaal iyo deeq mucaaridnimo hufan abaal
laysku siinaayo waxay ahayd in reer UDUB maanta bilado nagu tolaan
ka turjumaaysa doorkii aanu ku lahayn geedi socodka mucaaridadda
Somaliland oo xaqiiqdii ahayd mid ay ku amaanan yahiin
taageerayaasha Xisbiga KULMIYE ee xalaashaa.
Guntii iyo gaba gabaddii Xisbiga Xisbiga UDUB badbaadiya oo u
sarakaca, haddii kale oo caalwaa iyo tamar daro xaalkiinu noqday,
naga iibiya Xisbiga UDUB oo ku soo biira KULMIYE, si aan udubkana u
jejebino idinkuna ugu soo biirtaan oo uga mid noqotaan Xisbigan
Kulmiye, siddii horeba qaarkiin aanu ugu bandhignay.
Cabdilaahi Cali Xassan John
Liverpool
UK |
|