XISAABAHA GAARKA U AH WASIIR SAMAALE EE UU KU DARSADAY MIISAANIYADDA-QAYBTII 3

"MA LUMO XAQ NINKII LAHAA DABO SOCDO'

Waxaynu soo afjari doono si ku meel gaadh ah maqaaladan muujinaaya xatooyada loo badheedhay een haysan cid xakameysa iyo cid dabo gashaba. Waxaan haya xugo ay ii soo direen laba mas'uul oo Wasaaradda Maaliyadda ka tirsan laakiin aad u culus oo u baahan hubsiimo iyo xili la helo cid wax ka qaban karta. Waan hayn tan iyo xiligaas. Waxaan ka codsanayaa cid kasta oo haysa xoggo xatooyo iyo hanti boob ha ii soo direen iyana meel adag oo aamin ah ha ku hayaan. Waxa iman doonta maalin lala xisaabtamo dambiilayaasha. Dambiga xatooyadu ma duugoobo oo muddo kasta ha qaato ee waxa la gaadhi maalin laga jaro oo xaqaa lumay la soo celiyo, iyadoo waliba lagu xisaabin doono inta xoolahu maqnaayeen waxay faa'iido keeni lahaayeen. Hore ayaa loo yidhi ma lumo xaq ninkii lahaa dabo socodo. Ha daalin oo ha niyad jabin uruuri xogaha oo kaydso.

Waxaynu hore u soo qaadnay qaabka nidaam darrada ah ee miisaaniyaddii 2013 loo ansixiyey oo laga dhigey mid aan Wasiirna ogayn Wasiirka kale miisaniyadiisa loona afduubay si ayna cidina ula socon Miisaaniyadda buux dhaaftay ee Wasaaradda Maaliyadda. Taas aynu si wadno. Waxa iyana ka mid ah xisaabaha caqligu qaadan waayey kuwan:

IIBKA GAADIIDKA oo ahaa 2012, lacag dhan 660 Milyan, waxuu ka dhigay 2013, lacag ah 2,540 Milyan Korodhsiimo ah 1,880 Milyan una dhiganta 285%

XAFIISYADA WASAARADDA oo aha 2012, lacag dhan 840 Milyan, waxuu ka dhigay 2013, lacag ah 1,500 Milyan, korodhsiimo ah 660 Milyan oo u dhiganta 79%

DHARKA IYO DIREYSKA oo aha 2012, lacag dhan 60 Milyan, waxuu ka dhigay 2013, lacag ah 260 Milyan, korodhsiimo ah 200 Milyan una dhiganta 334%

MARTIQAADKA oo aha 2012 lacag dhan 50 Milyan, waxuu ka dhigay 2013, lacag ah 200 Milyan, korodhsiimo ah 150 Milyan, una dhiganta 300%

Isugeynta afartan xisaabood waxay yihiin sidan. 2012, waxay ahaayeen 1,610 Milyan, waxuu ka dhigay 2013 lacag ah 4,500 Milyan, korodhsiimo 2,890 Milyan una dhiganta 180%.

Ma tahay wax macquul ah in intaasi si hawl yar oon naaqish iyo tafaasiil lahayn ay Golaha Wakiiladu ansixiyaan. Haa maayo mabay arag ee duuduub ayey ku ansixiyaan, waana xil gudasho la'aan. Dadweynow kala xisaabtan cidaad doortay ee baylahdaada u diratay halkey mariyeen.

Hoosna waxaan idinku naqilay seddex maqaal ee hore oo dhammaan ka hadlaaya mawduucan si ayna waxba idiin dhaafin.

Aan ku celiyo ee ciddii haysa war la xidhiidha hanti-boobka dalka ka socta meel kasta mid wasaaradeed, gobol, iyo degmaba ii soo dir si aynu dadka ugu bayaamino, xogtana haya oo ilaaliya maalin ayaa iman dib loo xisaabtamo ee fadlan kayd adag galiya. Intiina emailka ii soo dirtay ee igu dhiiragelisay arrintan waad mahadsantihiin, ninka cayda ii soo dirayna wuu mahadsan yahay oo dareenkiisa iyo caqligiisa ayaan hawl yaraan ku helay ajarna waan ka heley. Waxaan se ogaaday in dadkeenu yahay midho xariir ah oo jecel wanaaga necebna musuqa. Samaale qof ahaan ma necbi oo dambi khaas ah igama gelin, waxaan u arkay nin ka fog amaanada loo dhiibay. Walow wax badan uu fagaraha ka akhriyey ayadaha ammaanada ka hadla. Waana ayaan darro ninka ayadahaas akhriyayaa inuu noqdo hormoodka musuqmaasuqa.
Samalow Alle u toobad keen, ummadana xaqooda u soo celi, intaad haysan u ilaali, ammaantaada kolkaas igu eeg ani iyo inta wanaagaaga iyo wanaaga ummadda jecel.
Madaxweyne waan kuu duceeya, ee Alle ha ku tuso heshiisyada qarsoon ee kheyradka dalka ee Genel ugu dambeysay, Alle ha ku tuso lacag xad dhaafka ah ee ku baxda xafladaha iyo socdaalada aan macnaha lahayn. Alle ha ku tuso miisaaniyadda magacaaga ku baxda eedan waxba kala socon.

Cabdi Xaji Axmed
hargeysawi@ymail.com

XISAABAHA GAARKA U AH WASIIR SAMAALE EE UU KU DARSADAY MIISAANIYADDA-QAYBTII 2

Waxaynu ku eegnay qaybti kowaad seddex xisaabooh oo WAsiir Samaale buuxsaday si uu u helo hanti aanu cidina weydiisan oo sida uu doono ugu tagrifalo. Waxa ayaan darro ah in Golaha Hurda ee Wakiiladu yahay wax matare aan meeshan banayn. Waxa hubaal ah in halka Soomaliland ka socon ladahay tahay jileeca ku jira Golaha ood moodo inay isagu tageen aqoon yarri iyo dhoohanaan. Miisaaniyaddu waa tan kaliya ee Golaha awood u yeeleysa hadday u maamulaan sida dauurku oggolyahay. Cidda daba galka u lihi waa iyaga. Cidda dalban karta xisaab xidh iyo warbixin sedddex biloodle ihi waa iyaga, cida hantidhowrka hawlgelin karta waa iyaga. Intaas oo dastuurku u oggolyahay ayey ka hurdaan. odhan maayo waa la laaluusha ee masuuliyad darro ayaa ku habsatay.

Maantana waxaan idin horkeeni seddex xisaabood oo kale oo Sheekheena ayadaha quraanka ku muraadsadaa uu buux dhaafsaday si uu u helo xantoobin xeeladaysan.

KHRASHKA SAMEYNTA MIISAAANIYADDA oo ahayd 2012, lacag dhan 462 Milyan waxuu ka dhigay 2013, lacag ah 962 Milyan, korodhsiino 500 Milyan una dhiganta 108%
DHIIRIGELINTA IYO ABAALMARINTA oo ahayd 2012, lacag dhan 200 Milyan, waxuu ka dhigay 2013, lacag ah 500 Milyan. korodhsiimo ah 300 milyan una dhiganta 150%
HABEEN DHAXA TRAVEL ALLOWANCE oo ahayd 2012 lacag dhan 219 Milyan, waxuu ka dhigay 432 Milyan, korodhsiimo ah 213 Milyan una dhiganta 97%.

Kolkaad isu geyso seddexdan xisaabood oo keliya halkay 2012 ahaayeen 881 milyan, waxuu ka dhigay 2013, lacag ah 1894 milyan, korodhsiimo ah 1013 milyan una dhiganta 115%.

Haddaba ma tahay wax maquul ah in labajibaar iyo wax ka badan ay xisaabahani hal sano ookaliya isu bedelaan. Meedey se xisaabtii dhabta ahyd ee 2012 la khrashgareeyey. Sabab la' aanta loo kordhiyey lacag intaas leeki waxay ina tusaysa masuuliyad darraanta ciddi horjoogsan lahayd boobkan cad oo ah Madaxweynaha iyo Golaha Wakiilada.
Khrasha loo bixiyey sameynta miisaaniyadda maxa ka dhigey inay laba jibaar iyo siyaade noqoto illeyn awalba waa la sameyn jiray oo waa shaqo maalmeedka wasaaradde..

Sheekha hadalka macaani bal heyno bayaamiyo waxa kalifay inuu lacagta intaas leeg ku darsado miisaaniyadda oo uu si guracan u isticmaalo lacagta ay ka ooman yihiin kuwii laga soo uruuriyey, kuna baxaysa meel ayna oggayn.

Madaxweyne waan kuu duceeya in Alle ku tuso inta wanaagga kula jecel eed eryanayso iyo inta xumaanta ku maleegeysa eed hoosta gashanayso. Alle ha ku tuso hanti boobka la farsameeyey iyo baahida dalka taala. Aamin.


Cabdi Xaaji Axmed
hargeysawi@gmail.com

Hoos ka akhri qaybti KOWAD


XISAABAHA GAARKA U AH WASIIR SAMAALE EE UU KU DARSADAY MIISAANIYADDA-1

Waxa hore aan idinku sheegey sida iga soo gaadhay masúul wasaaradda maaliyadda ka tirsan sida uu Samaale uu miisaaniyaddii 2013 dhismaheeda uga dhigey mid aan cidi kale aqoon oo uu wasiir walba uu gaar ula gorgortamay siiyeyna inta isaga khuseysa oon wasiirna ogayn kan kale miisaaniyadiisa, taasina ay dhantaashay doodi laga yeelan laha miisaaniyad qaran oo u dan ah ummadda. Haddaba hadafka uu taas ka laha waxa ay tahay inuu helo xisaabo uu keligii miisaaniyadda gashado oon cidi ku ogaan. Waana kuwan qaar ka mid ah oon halkan idiinku soo gudbin doono.

Xisaabahaasi dhamman waa qaar uu Wasaiir Samaaale keligii Maamulo oon cid kale awood u lahayn kana war hayn sida loo bixiyo iyo cidda la siiyo toona. Waana mid ka baxsan habaka loo maamulaa nidaamka dawladda. Waxa Samaale uu Wasaaradda la yimid boob iyo dhac qaawan oon cidina ku haysan. Waana mid ayaan darro ah in la waayo cid dhacan joojisa. Waxa muuqata inuu helay awood qarsoon oo uu ku jaahwareeriyey xukuumadda, hantidhowrkuna noqday mid wasiirka u shaqeeya halkuu noqon laha kan wasiirka xisaabiya.

IJAARKA GAADIIDKA, GURYAHA ...oo aha 270 milyan sanadkii 2012, waxuu ka dhigay 600 milyan SlSH korodh ah 330 MILYAN
KHRASHKA LACAG URUURINTA aha 600 milyan 2012, waxuu ka dhigay 1500 milyan korodh ah 900 milyan
LA-DAGAALANKA KONTRABAANKA aha 219 milyan 2012, waxuu ka dhigay 1150 milyan korodh ah 931 milyan

Xisaabaha kale ayaa ka cajiib badan oo qaarkood aad la yaabi doonto magaca ay sitaaan iyo khrashka ku jira, ee bal isu geeya korodhsiimada seddexdan xisaabood oo keliya. halkey 2012 ka ahaayeen isugeyn 1089 milyan waxuu ka dhigay Saamaale 3250 milyan una dhiganta korodhsiimo 300% ah. Lacagtaas lama naaqishin Golaha Wasiirada, waayo lamaba keenin oo Saamale isaga ayaa Wasaarad kasta la xisaabtamay si gooni ahna u siiyey miisaaniyadda WAsaaradiisa oo keliya, tiisna cidi mey arag mana naaqishin xata Madaxweynaha waxba lagama weydiin.

Ma tahay wax macquul ah in sanad keliya khrash intaas leegi kordho , maxay asnsixiyeen Golaha hurda ee Wakiiladu, bal wareysta oo heli mid keliya oo xata idiin qira inuu arkay lambaradan, is daa inuu naaqisho amba oggolaadee.
Waa ayaan darro ina haysata.
Waxaa inoo xigta xisaabo kuwana ka yaab badan ee la soco.

Madaxweyne waan kuu duceeya in Alle ku tuso halka maalkii maataada iyo danyarta laga uruuriyey halkey ku baxday. Waan kuu duceeya ee Alle ha ku siiyo caafimaad.

Cabdi Xaaji Axmed.

Hargeysawi@ymail.com


WAXAYNU IFTIIMIN DOONAA SIDAAY UGU SUURTOGASHAY IN SAMAALE SI HAWL YAR U DHACO HANTIDA UMMADDA

Waxaan maqaal hore idinku sheegay in uu ila soo xidhiidhay sarkaal ka tirsan Wasaaradda Maaliyadda oo tafaasiil iga siiyey hab-dhaqanka yaala Wasaaradda Maaliyadda iyo tabaha qaloocan ee Wasiir Samaale ku soo biiriyey. Maanta waxaan idiin soo bandhigi sida loo maamulay Miisaaniyadda sanadkan 2013. Waxaanan ka codsanayaa Wasiirada iyo ciddi kale ee igu beenineysa inay soo qoran si gaar ah amba si guud. Waayo waa arrin la yaab badan oo muujineysa oday Axmed inaanu meesha joogin iyo inayna jirin Gole Fulineed ee ay yihhin koox aan wada shaqayn nin walibana tiisa shakhi aanu dhaafsanayn, cid isku xidha oo hawl galisaan jirin, dalkuna ku socda fawda iyo ilaa hadda oo badbaado Alle iyo ummad soo daashay oo samir badan.

Waxba yaanan waqtiga idinka qaadin. Waxa dalka lagu maamula oo lagu hogaamiya waxa la dheehda miisaaniyadda. WAxay ku timaada odor xoogan oo laga yeesho dabcan arrimaha dhaqaale bulsho iyo siyaasadeed. WAxa lagu saleeya baahida iyo siyaasadda xukuumaddu ka leedahay hogaaminta dalka. WAxa lagaga dooda Golaha Wasaaradda oo leysla garta halka la marinaayo iyo xisaabta Wasaarad kasta iyo khrash kasta maraayo, deedna uu madaxweynahu intuu sexxo u gudbiya Wakiilada.

Ayaan darro waxa dhacday inuu Wasaaradda loo magacaabay Samaale oo ilaa maalintii Siilanyo madaxweynaha noqday doonaayey inuu Wasiir ka noqdo Maaliyadda. Waxa la yaab ah inuu nin maalin walba akhriyaaya ereyo diini ihi doonto shaqo aanu garanayn oo waa khiyaamo inuu qofku xil doonto uu ogyahay inaanu ka soo bixi karin aqoonteedna u lahayn. Marna ma dhacdo inaad dareewal iska daa wax kale doonato adoon haysan leysan.WAxa taasi kuu cadeynaysa inuu leeyahay damac qarsoon oo guracan guntiisuna tahy dhac iyo boob.

WAxa uu markiiba abaaray halkuu rabay, illeyn waxa u qorshaysnaa dhaca iyo boobka oo uu muddo ka soo shaqeeyey. Waxuu la yimid arrin ku cosob dunida. WAxuu fadhiisaty Hotelka mAANSOOR OO UU QOL KA KIREYSTAY.WAXUU WASIIRADDA HAL HAL UGU YEEDHAY INUU KALA HADLO MIISAANIYADDA WASAARADDA.
Nina ninka kale ma oga. Waxa uu ula dhaqmaa inuu u eexanaayo oo dalku aanu qaadi karin khrash badan. Wasiir waliba gacmaha ayuu hoorsaday illeyn ma oga kan kale waxa leys yidhi. Miisaaniyaddi waxay noqotay mid gooni u aha shakhsi keliya oon Gole waxba ka ogayn oon Samaale cidi ku wehelin.

WAxa ka yaab badan kolkii Golaha la keeney lama keenin Miisaaniyad dhan oo sida cadada ah buuga miisaaniyadda Golaha laguma qaybin. WAxa wasiir kasta la hordhigey Miisaaniyadda isaga u khaas ah, midna midka kale waxa hor yaal ma oga. Deedna waxa la yidhi Wasiir waliba hoos ha u akhristo miisaaniyada Wasaaradiisa oo uu hore uga dhaadiciyey Samaale inuu u eexday. Cabaar markay aamusnaayeen ayaa Xirsi yidhi...Madaxweyne waxa la gaadhay xiligii codeynta..Madaxweynah oon erey kale ka soo bixin ayaa yidhi..Gacanta ha loo taago ansixinta Miisaaniyadda...Hal diidan ma leh. Maxay se ansixiyeen illeyn miisaaniyad ay arkeen ma jirto oo mid waliba sidii seddexda dumarka ahaa ee garabka uu taabtay ninkii qabay ee is mooday inay mid waliba uu kaligeed taabtay, ayey dhammaan is leeyihiin Samaale wuu kuu exxday ee shibtaada..

Miisaniyaddu sidaas ayey ku hirgeshay. Waxa muuqatay inuu Wasiir Xirsi yahay ninka keliya ee la oggaa Samaale arrinta sida uu u soo dhigay. Waxana cad sida Madaxweynahu meesha uga maqanyahay. Waxaynu maqaalka kan xiga ku eegi doona Miisaaniyada Wasaaaradda Maliyadda een cid kale arag sida uu Saamle ugu ritay khrashyo u gaar ah oo ah kuwa uu maanta dalka ka dhacay uba fushada danahiisa gaarka ah.

Madaxweyne waan kuu duceeya in Alle ku siiyo caafimaad, iyo inuu ku tuso sida lagagu hoos dusayo. Dulmiga dalka ka tagan adaa ka mas'uul ah ee duceyso, salaada badi Allena bari inuu ku waafajiyo hogaanka suuban. Caawa salaada subax ka hor maydho, laba ragcadood tuko oo Alle bari inuu Alle ku siiyo awood aad ku maamusho dalkan sida habboon.

Cabdi Xaji Axmed
hargeysawi@ymail.com


WASIIR SAMAALE OO WASIIRADII SILAANYO KA WADA CADHEYSIIYEY

Waxa la yaab ku noqotay ooy ka siman yihiin Wasiirada siilanyo istus iyo shaashada TVga ooy iska daawadaan. Taas oo ay ku kala badan yihiin waxa ay horseeda inay fariimaha iyo talooyinka ay si rasmi ah oo gooni ah uga wada hadli lahaayeen inay Warsaxaafadeed ku dhiiba iyagoo dhinaca iska dhigey nidaamkii dawliga ahaa.

Haddaba nuddooyinkan waxa si joogta ah u muuqday Wasiirka Maaliyadda oo sheegaya arrimo ay ahyd in Golaha Wasiiradu ka shiraan. Taas wuu dhaafay oo waxuu u gudbey inuu dhammaan Wasiirada iska baalmaro oo uu toos ula xidhiidho Agaasimayaasha Guud ee ka hoos shaqeeya wasiirada. Waxa la yaab noqotay isagoo siyaasaddii miisaaniyadda ee Golaha Wasiiradu u xilsaarnaayeen kala shiraaya Agaasimayaasha.

Hadda Wasaaradda Maaliyaddu Agaasino Guud ayey leedahay oo ahaa kolka Golaha Wasiiradu dhammeystiraan qaabka iyo qaybinta miisaaniyadda inuu hoos ugu daadajiyo agaasimayaasha. Kaasna wuu ka dul booday oo isagaa keli noqday Golaha Wasiirada, isagaa isla markaasna ah Wasiirka Maaliyadda haddana noqday mar kale Agaasimaha wasaaradda Maaliyadda.

Waxa dunida lagu akay ma aha nin keli isau xilsaaray hawlo ay cid kale ku magacaabantay, isla markaas aan helin ciqaab kaga timaada cida u xilsaaran ilalinta nidaamka iyo sharciyada u dejisan dalka. Xilkan waxa gabay waa oday Axmed Madaxweynaha oo kaalintiisi ka maqantay iyo Xildhibaano aqoon darro ay u weheliso calooshood u shaqaystinimo ka dhigatay doqonno aan dareen lahayn.

Waxa haddaba soo baxaaya warar sheegaaya in Wasiirada inta waxgaradka ihi ka gadooday arrintan ooy u arkaan inay dhabar jab ku tahay wada shaqaynta xukuumadda iyo kala xadeynta xuduudaha Wasaaradaha. Waxa la sheegey inay rag dareenka lihi ay aad uga cadhoodayn, bal se qaboojiyaal Wasiiro ah oo la wadaaga qardajeexa Samaale ayaa isku dayaaya inay arrintan dambabasaan kana dhigaan mid aan sidaas u cuslayn, waayo iyagaa iyana sidan ku dhaqma.

Aan u digu wadaadka midabka badan ee is leh Xirsiga Labaad noqo. Ogow xirsi meesha dhalasho ayuu ku joogaam tabtaad heysaana waa tii cayshisay Wasiir Duur oo waliba halka haynta ay marwada islaamo wadaagaan. Meesha barqab qudha looga baahan yahay ee aasha soco, haddii kale hebeen badhka adoon waxba laguu sheegin ka dhageyso idaacadda amba foon degdeg ah ayaad ka helo qaar aad saaxiibo u haysato bal se maalintaas ku farxi doona. Alle maxaa munaafaq kugu xeeranm waaba kuwii bur kasta ka soo boodaym cid walba la saftay, laabtooda iyo afkuna ayna isba aqoon.

Madaxweyne waan kuu duceeya oo kaala hadhimayo tan iyo inta Alle ku tusaayo kuwa aad xilka u dhiibtay dhibta ay nagu hayaan iyo sharciga sidey ugu tumanayaan.

Cabdi Xaji Axmed
hargeysawi@ymail.com


SAMAALOW WASIIR WAXAAD QARISAY WAXA KA MID AH

Maxamed Xaashi markuu Wasiirka noqday waxa ididiilo soo gashay shaqaalihii koluu salka dhigeyba uu boqolkiiba boqol u kordhiyey uuna balan qaaday inuu sidaas ku wadi doono. Waxa ayaan darro ah in kooxda wasiirada ugu tuka weyne ka diidiin ooy ahayd isku dhicii uhu horeeyey, iyagoo dalbay horta in Golaha Wasiirada la foodh yeelo.

Kolkii aad xilka la wareegtay Samaalow waxaad tidhi mushahrkii Wasiirku iguma filan oo waxaan qaadan jiray lacag 2, 300 doolar ah. Kolkiiba waxaad soo jeedisay in Wasiirada mushahrla mar labaad loo laban laabo. Daahir Riyaale waxuu ka tegey Wasiirka oo qaata 650 doolar, deedna Maxamed Xaashi oo shaqaalahoo dhan laban laabay ayaa ka dhigey 1,300 doolar bishii. Waxaad adigoo naftaada eegaay ka dhigatay musharkii Wasiirada 2,300 doolar bishii shaqaalihii danyarta ahaan ganbo umaad kordhin.
Waxa haddaba la yaab leh in mushaharka intaas la gaadhsiiyey halkii tirade Wasiirada la soo koobi lahaa iyana la kordhiyey. Waxa Siilanyo Golahiisu ka badan yahay kii riyaale oo uu laba dheer yahay. Haddaba Golaha Wasiirda ee Riyaale oo ahaa 52 ( Wasiiro, Ku Xigeeno, iyo Wasiir Dawlayaal) waxa ku bixi jiray bishii $ 33,800 doolar , Golaha Wasiirada Siilanyo waxa ku baxa 124,200 doolar bishii taas oo ka dhigan afar labanlaab tii Riiyale.

Siilanyo haddu ummadda u naxaayo sidan ma yeeleen, isagoo ku hadaaqi jiray waxaan dhisayaa dawlad teyo leh oo kooban. Hadduu ku deyn laha tirade dawladii uu soo dhisay bilowgii oo ahayd 26 xubnood waxa umaada u baaqn lahaa 63,000 doolar bishii.
Samaale iyo Xirsi iyo dhammaan wasiiradu walaba kuwa aamusan ee aynu sacabka u tuna sida Dr. Sacad iyo Xuseen Gurayga Macdantu waxay ka siman yihiin inay u diriraan jeebkooda danta guudna ka aamusaan. Labadan aqoon yahan waxaan u soo qaatay jaceyl aan u qabo oo waan kala hanweynaa qaar ka aamusa danta guud iyo dareenka shacbiga, waxaan ka doonaayey inay ku dhiiradaan inay Samaale iyo Xirsi ka qabtaan hantida ummadda iyo malafsiga, waxaan ka filaayey inay hoos u eegaan danyarta iyo inay qorsha ay qoreen ku xakameeyaan khrashan aan sal fadhiya lahay.

Haddii Golaha laga waayo cid qaladka gudaha ka sixi weyda waxa soo bixi cid debedda ka saxda.
Saamale iyo habdhaqankiisa miisaaniyadda waxaan idinka haya warbixin xiise leh oo uu ii soo gudbiyey sarkaal ka tirasan Wasaaradda Maaliyaddu, meelaha qaar oon iska hubsanaayo ayan dib ugu celieyey suaalo intaas aan sugayaa.
DADKA KII DHARGAA U DARAN DILAAL IYO MALAAL IYO DIBU SOCODNA WAA ISAGA
WAA DANAYSTE BAL DAYE MA DOWBA MA WAX LOO DUL QAATAA.
Cabdi Xaji Axmed
hargeysawwi@gmail.com


WASIIR SAMAALE OO CADDEEYEY INAANU DALKA SIILANYO KA TALIN


Waxa ayaamahan socota is-labarog iyo istus tii ugu sareysay ee uu sameeyo Wasiir Samaale. Waxaad maqlaysaa isagoo ayna jirin kulan lagaga hadlay hadafka miisaaniyadda oo golaha Wasiiradu qabtaan uuna guddoomiyo Madaxweynahu, ayoo keligii bidix iyo midig u kala dhigayaa miisaaniyadda 2014 oo balano been ah dadka ku madadaalinaya. Waxaan jirin hab dawladbimo oo lagu joojiyo beenta iyo baal marinta maamuuska dawladnimo waayo waxaan jirin cid dalka ka madax ah.

Waxa muuqata inayna jirin miisaaniyad qaran oo ay Golaha Wasiiradu ka shireen iyo ujeedo ay leedahay, waa malo awaal iyo rabitaan qof oon dhaafsanayn hadal afka ka soo baxay. Si loo aamino waxa samaale shegayo bal ha la helo warbixin taam ah oo dhab ah oo inoo sheegta miisaaniyaddii 2013 waxa ka rumoobay.
Lambaro meel leyskaga qoro oo la yidhaahdo intaas ayaanu gaadhnay, maxaa u daliil ah. Miyeyna garaadkeena ceeb ku ahayn nin aynu naqaan sida ay ula hawl yartay beentu, iyo xataa iska yeelidda wadaadnimo, kolka la yidhaahdo wadaad ayaad tahayna yidhahda xaasha ma ihi, ummadey u fiirsada baal marka nidaamka dawladnimo ee aan kow iyo laba ahayn ee uu baal marsan yahay si badheedh ah Wasiirka maaliyaddu.

Waxa jirta in nidaam ahaan wax walba ay tahay in laga ansixiyo Golaha Wasiiirada, deedna madaxweynahu oggolaasho ku sexeexo, taas waxa baal marsan hab dhaqanka wasiirka oon haysan nidaam iyo maaamuus toona. Waxa uu inoo sheegaya inaanu dalka ka jirin nidaam dawladeed, iyo inaanu Siilanyo ahayn nin hoggamin kara Golahiisa iska daa dalka oo dhan.

Waxa ay tahay in hadday dhaamaan Golayaasha Sharcidejintu ay arrimahan ka hadlaan oo waliba guddiga miisaaniyaddu ay xilkooda gutaan. Iyagaa ka liita oo waa meesha kale ee Samaale ka ilmo dhaliyey. Waxa Guddiga miisaaniyadda Guddoomiye u aha Xil. Maxamed Maxamuud Cumar Xaashi oo seedi u ah Samaale, ahna nin aqoon yahan ah bal se xididnimo xayirtay. Waa ninkii kolkii horeyna u sharxnaa Guddoomiynimada Golaha ee Samaale dartii uga hadhay. Waxa maanta la gudboon inuu guddigan iskaga baxo amba hawsha qaran xidid ma taqaane uu dalka eega iyo danta guud.

Waxa Wasiirku la wareegaya balqaadyo shakhsi oon waxba ka jiri doonin bal se uu uga jeeda xil doonista Kulmiye gudihiisa. Waxuuna u isticmaalaya miisaaniyadda qaranka sidii mid uu shakhsi ahaan leeyahay, ninkii qaban lahaan muuqaal mooyee maskax ahaan waa maqane.
Waxa iyana ayaan darro ah in Wasiirka Qorshaynta oo inagu maaweeliya Qorshaha Shanta sano iyo 20 sano aanu waxba ka odhan miisaaniyadda aan hadafka lahayn ee maalinba cid Samaale la kulmo uu ugu balan qaadaayo miisaaniyaddaan ku darayaa taas oo ah mid aan xidhiidh la lahayn qorshaha Dr. Sacad uu ummadda waraabiyey kharash badanina ku baxay.

Ciid Mubaarak Madaxweyne waan kuu duceeya.


Ciid Mubarak Soomalilandeeey.


Cabdi Xaaji Axmed