XILKA IYO XUDUUDDA XUKUUMADDA IYO XISBIYADA MUC AARADKA
"Xukuumadda maantu waxay noqon kartaa M ucaaradka berrito,Xisbiga Mucaaradka ah ee maantuna wuxuu noqon karaa Xisbul-xaakimka
berrito".
Inkastoo ay caddahay xilka iyo xuduudda ay kala leeyihiin waaxyaha
Dawladdu ka kooban tahay oo xeerku uu qeexayo. Haddana waa
mas'uuliyad wadareed (collective responsibility) oo saaran saddexda
dhar-dhaar ee Dawladda (Sharci-dejinta, Fulinta iyo Garsoorka) inay
yeeshaan qaab ay wada jir ugu wada adeegaan danta Ummadda, iyadoo
laga dheeranayo shaqsiyadaynta iyo muqaal Xisbiyahannimo ama
beeleysan in loo kala safto. Kuwaas oo ah waxyaaba ragaadiya Qaranka
.
Walow mid walba uu u madax bannaan yahay hawshiisa, waxa lama huraan
ah in ay is garabsadaan oo midna aanu awooddiisa gaar ula jeesin.
Waxana reebban in midna uu midka kale faragelin ku sameeyo ama
Xilkiisa maroorsado.
Dimuqraayidda caafimaadka qabta waxa furo u ah in la abuuro jawi
lagu dhaliyo kalsooni iyo is- faham ay danta Qaranku ku jirto, taas
oo lagaga baxo mabda' ah KU JIQ-SII laguna bedelo wax dhisid
(Constructive Opposition).
MARKAY CEELALYO HESHIISO AYEY XOOLUHU BIYO CABBAAN
Xukuumadda (Executive Branch) iyo Xisbiyada mucaaradkuba (opposition
parties) waa in ay qaadaan tallaabooyin muuqda oo la dareemi karo
sidii ay u wajihi lahaayeen qaab wada shaqeyneed ee xilalkooda
isa-saameynaya ama is kaabaya u gudan lahaayeen. Xukuumadda iyo
mucaaradku waa inay isku arkaan inay yihiin danwadaag, waana inay
gacmaha isku qabsadaan sidii ay uga wada shaqeyn lahaayeen
horumarinta danta dalka ugana midha dhalin lahaayeen himilada
qaranka.
Xisbul-xaakimka (Ruling Party) maantu wuxu noqon karaa mucaaradka
berrito, xisbiga mucaaradka ah ee maantuna wuxuu noqon karaa
xukuumadda berrito. Sidaa daraadeed waa in laga feejignaadaa
macaamil xumo mustaqbalka saameyn taban ku yeelata Xukuumadda cusub
iyo mucaaradka cusub.
Shakki kuma jiro, Xukuumadda lagu soo doorto hannaanka
Dimuqraadiyadda (Elected Government) ayaa u idman inay dalka
maamusho, laakiin iyadana waxa waajib ku ah in ay yeelato hab-dhaqan
kobcinaya dimuqraadiyadda. Ku guulalysashada doorashadu ma aha
macnaheedu in ay Dalka mulkiday oo la waayo cid aan Xisbul-xaakimka
ahayn (Winner Takes All) taas oo ah in xisbiyada mucaaradka KHADKA
laga saaro, halkii laga wada shaqeyn lahaa. Malaha, Weli dad badan
bay ka degi la' dahay in mucaaraddku kaalin sharci ah ku leeyihiin
hawlaha qaranka !!!.
Nidaamka Xisbiyada Badan (multi-party system) waa daruuri in la
siiyo fursad ay ku kobcaan xisbiyadu, Dimuqraadiyadduna ku
hanaqaaddo. Xukuumaddu waa inay garwaaqsataa muhiimadda ay leedahay
in la helo mucaarad dhab ah oo mas'uulnimo ka muuqato. Waana Waajib
Xukuumaddda saaran inay Xisbiyadda Mucaaradka ah u fidiso wixii
dhaqaalo ay u baahan yihiin, waana in ay qeyb ka helaan Warbaahinta
(fair access to the media), fursadna loo siiyaa gudasha
waajibaadkooda.
waa muran ma doon in Dimuqraadiyaddu ay ka fiican tahay
Keli-Talisnimada (Dictatorship), laakiin ma aha in ay dalka u
horseeddo xasilooni darro siyaasadeed. Mucaaradku waa inuu
garawsadaa oo aanay ka hoos bixin in Codbixiyayaashu ay ka codeeyeen
oo ay Xisbi kale door-bideen oo xilka FULINTA u igmadeen.
Mucaaradku waa muraayadda Dawladda, laakiin haddii uu ku sifoobo mid
mayal adag oo uu caadeysto "KU JIQ-SII" iyo mar walba inuu
is-hortaago barnaamijka Xukuumadda, Dadweynuhu waxay u arkaan dar
curyaaminaya horumarka waddanka. Mana aha mas'uuliyadda in looga
faa'ideysto qaab Dastuurka baal marsan, is-beddelna (change) laguma
sameyn karo in la inqilaabo hannanka iyo milgaha dawladnimo.
Waxa Codbixiyayaasha looga baahan yahay inay ku baraarugsanaadaan in
cidda codkooda ay siinayaan ay ahaadaan qaar danta guud ee Qaranka
ka hor marinaya danta yar ee gaarka ah ee Xisbinimo. Bulshadu ma
aqbali karaan in caqligooda la caayo oo been iyo borobagaandha lagu
kaambeyn gareeyo si xukunka loogu fuulo. Waxa keliya ee Shacbiga
lagu kasban karaa oo ay wax ku dooranayaan waa Barnaamij fiican iyo
wax-qabad dhab ah.
WIXII INDHO ARKAAN AYEY ILKO GOOYAAN
Mararka qaarkood, Mucaaradku wuxuu qaadtaa doorka ah inuu noqdo
Xaalad-Abuur, isagoo fursad kasta oo uu helo ku hagardaameeya
Xisbiga Talada haya, isagoo badanaa aan garaneyn kala soocidda
waxyeelaynta Xukuumadda iyo dhibta ay Qaranka gaadhsiinayaan.
Reer Koonfureedku waxay ku maahmaahaan "RAG ISKA DHICI IYO RABBI KA
CABSO MEEL MA WADA GASHO".
Waa in Xisbul xaakimka looga dambeeyaa Talada waddanka, laakiin ma
aha inuu isna u dhaqmo hab Keli-Talisnimo ah oo awoodda Qaranka oo
dhammi isaga ku soo ururayso, taas oo uu ku duudsiyayo xuquuqdii
Mucaaradka. Murti baa tidhaa "marka kuwa tirada yar codkooda la
ogolaado in ay sheegtaan , ayaa kuwa tirada badanna had iyo goor la
ogolaadaa in jidkooda loo banneeyo" (while the minority must be
allowed to have its say, the majority must always be allowed to have
its way).
Xisbiyada mucaaradka ahi haddii ay Fadhiid noqdaan (habrasho ama
laaluush qaadasho darteed) waxay taasi dalka dhaxalsiisaa in
xukuumaddu noqoto AWR DABAR LA'AAN DHACAY.
Ma jirayo Qaran mideysan oo xasiloon haddii aan la helin Mucaarad
Daacad (loyal opposition) u ah dalkiisa iyo dadkiisa. Haddii
waddanka uu ka aloosmo is-qab-qabsi Siyaasadeed, waxa dalkaasi ku
suntanaadaa dal ay dhibaato ka dhisaalan tahay oo aan xasiloonayn.
Kuwa haya talada dalka iyo kuwa hungureynaya xukunka waa in ay
yeeshaan qaab waxtar leh oo ay ku wada shaqeeyaan iyagoo haddana
cabbiraya afkaartooda kala duwan.
´´ Dhisa qaranka dheelliga ka jira dhidibbada u taaga,
Sharafteenna wixii dhuminayaan dhaafa leeyahaye ´´
Wa Billaahi Tawfiiq
Qalinkii Cali Xaruuri
Rotterdam, Holland
E-mail
Adam.32@live.nl
|