Xildhibaan
ka Tirsan G.D ee Hargeysa oo sheegay inuu u taagan yahay Musharaxa
Madaxweynenimada
Xildhibaan Axmed Sandoon oo ka
tirsan golaha deegaanka ee Caasimada Hargeysa, kana mid ah xubnaha
gudida fulinta ee xisbiga UDUB ayaa shaaca ka qaaday inuu inuu u
taagan yahay una tartamayo jagada madaxweynenimada ee Doorashada soo
socota isaga oo iska sharaxaya Xisbiga UDUB,
Xildh. Axmed Sandoon ayaa sidan ku sheegay maanta shir jaraaid oo uu
ku qabtay magaalada HArgeysa, isagoo tilmaamay in dalku u baahan
yahay Isbedel siyaasadeed isla markaana ay taasi ku kaliftay inuu is
sharaxo, guul iyo guul darana calafkiisa ka qaado sidii uu u gaadhi
lahaa hamigiisa siyaasadeed .
Xil. Sandoon ayaa xubnaha gudida
fulinta ee Xisbiga UDUB iyo dhamaanba golaha dhexe ee xisbiga ugu
baaqay inay si cadaalad ah uga xaqsooraan tartamayaasha jagada
Murashaxa madaxweynaha u taagan ee xisbiga dhexdiisa , isaga oo
intaa ku daray inuu labaynayo Cabdillaahi Darawal oo isagu shalay ku
dhawaaqay musharaxnimada jagadaas inuu u taagan yahay.
Xisbiga UDUB ayaa ilaa iyo hadda
waxa ka sharaxan Jagada madaxweynenimada laba Siyaasi, halka
murashaxa madaxweyenekuxigeenkana uu u taagan yahay Siyaasiga Mr.
Jawhari.
Xil. Sandoon ayaa ah musharaxii ugu horeeyay ee ku dhawaaqa inuu ka
qayb galayo doorashada isla markaana Sandoon waa shakhsigii ugu
horeeyay ee ka soo jeeda Xildhibaanada golaha deegaanka ee caasimada
ee ku dhawaaqa inuu is sharaxo.
Shirweynaha Xisbiga UDUB oo la filayo inuu Qabsoomo Bishan
dabayaaqadeeda sida ay Shabakada Qarannews u tibaaxeen Xubno miisaan
culus leh oo ka tirsan UDUB, waxa ilaa hadda la dhawrayaa in
musharaxiinta u tartami doonta labada jago ee dalka ugu sareeyaa ay
inta hadda ku dhawaaqday ku ekaan doonto iyo in cid kale isa soo
sharaxi doonto.
Axmed Sandoon waxa uu ahaa xildhibaan ka soo baxay urur
siyaasadeedkii Hormood ee uu hogaaminayay Siyaasiga Cumar Carte
Qaalib, ururkaas oo ka mid ahaa seddexdii urur siyaasadeed ee ku
hadhay Doorashadii golaha deegaanka ee la qabtay 15-kii Dec. 2002,
seddexdaa urur oo kala ahaa Hormood oo uu hogaaminayay Cumar Carte,
Sahan oo uu Hogaaminayay Dr. Maxamed Cabdi Gaboose iyo ASAD oo uu
hogaaminayay Md. Saleebaan Maxamuud Aaden (Saleebaan-gaal) oo isagu
haatan ah gudoomiyaha Golaha odayaasha ee Guurtida Somaliland.
Sidoo kale Xildh. Axmed Sandoon waxa lagu xasuusan karaa inuu ahaa
Xildhibaankii la tartamay Gudoomiyenimada Golaha Deegaanka ee
Caasimada kula tartamay Maayarka hadda ee Caasimada Hargeysa Eng.
Xuseen Maxamuud Jiciir, tartankaas oo uu Eng, Jiciir kaga guulaystay
maayarnimada iyo Gudoomiyenimada Golaha Deegaanka ee Caasimada.
Hadaba shuruuda ugu horaysa ee ay
tahay in shaqsi uu isu soo sharaxo in uu galo tartanka jagada
noocani oo kale ah, ayaa ay tahay in uu marka hore tartamuhu uu ka
tirsanaado golaha dhexe ee xisbiga UDUB, sidaasi waxa noo sheegay
masuul ka mid ah xisbiga UDUB.
Qarannews
|