Xaaji
Cabdi-Waraabe oo waayay Guddoomiye nimadiisii
Guddiga ugu awooda badan
Shirguddoonka Golaha Guurtida
Somaliland, ayaa isku-shaandhayn ku sameeyay qaar ka mid ah
guddi-hoosaadyada Golahaas.
Isbedelkan oo ku soo beegmay xilli qaybsanaan dhinaca fikirka
siyaasadda ahi ka dhex jirto Golaha Guurtida, waxa guddiyada uu
saameeyay ka mid ah Guddiga Joogtada ah iyo Guddiga Arrimaha Gudaha.
Inkastoo aanu Shirguddoonku si rasmi ah u shaacin isku-shaandhayntan,
haddana siday tibaaxeen ilo xogogaal ahi, waxa uu Shirguddoonka
Goluhu sidaa ku sheegay qoraal uu Axaddii todobaadkan soosaaray.
Warku wuxuu intaa ku daray, in Xaaji Cabdikariim Xusseen (Cabdi-Waraabe)
oo ahaa Guddoomiyihii Guddiga Joogtada ah xilkaa laga qaaday, isla
markaana loo magacaabay Cabdillaahi Xirsi (Dhugad), halka Xoghayaha
Guddigaasna loo magacaabay Maxamed Cali Warsame. Sidoo kale, waxa la
sheegay in Guddoomiyaha Guddiga Arrimaha gudaha loo magacaabay
Cabdisalaam Maxamed Siciid, halka Xoghayaha guddigaasna sida la
sheegay loo magacaabay Yuusuf Cabdillaahi (Ugaaska).
Talaabadani waxay ku soo beegantay iyadoo muddooyinkan dambe uu
kala-qaybsan ka muuqday mudaneyaasha Golaha Guurtida, ka dib markii
ay ku kala jabeen labadii Mooshin ee u dambeeyay ee xil-ka-qaadista
Guddoomiye Saleebaan Maxamuud Aadan iyo muddo-kordhintii
Madaxtooyada.
Ogaal
|