X.
Cabdi-waraabe iyo Muuse Biixi oo Madal Furan
isku Weydaarsaday Hadallo Kulul
Guddoomiyaha Guddiga Joogtada ah
ee Golaha Guurtida Xaaji Cabdikariim Xuseen (Cabdi-araabe) iyo
Guddoomiye-ku-xigeenka kowaad ee xisbiga mucaaradka ah ee KULMIYE,
ayaa madal furan isku weydaarsaday hadallo kulul weerar iyo weerar
celis ah oo la xidhiidha doorashooyinka soo socda.
Masuuliyiintan oo ka hadlayey xaflad ballaadhan oo loo sameeyey in
ka badan 360 arday oo qallin-jabiyey dugsiga gaarka loo leeyahay ee
SALAAMA oo bartay luqado kala duwan, xisaab iyo xirfadda
kombuyuutarka oo lagu qabtay shalay Huteelka Maansoor ee magaalada
Hargeysa, ayaa isku weydaarsaday hadallo kulul oo xambaarsan duurxul
siyaasadeed.
Waxa kale oo xafladdaas ka qaybgalay Guddoomie-ku-xigeenka koowaad
ee Golaha Wakiilada Cabdicasiis Maxamed Samaale, Xoghayaha Arrimha
Dibbeda KULMIYE Dr. Maxamed Cabdillaahi Cumar, xubno Wasiiro ah,
Salaadiin, culimaa’udiin iyo marti sharaf kale.
Xafladdan oo ahayd mid la isku arkay, ayaa waxa weedho weerar iyo
weerar celis ah isku waydaarsaday Xaaji Cabdi Waraabe iyo Muuse
Biixi, kuwaas oo nuxurka hadaladoodu ku qotomeen doorashooyinka soo
socda.
Ugu horreyn Xaaji Cabdi Waraabe, ayaa hadal dheer oo uu munaasibadda
ka jeediyey, waxa uu dardaaran adag u diray xisbiyada mucaaradka ah
iyo dadweynahaba, kaas oo uu kaga dalbaday inay ilaaliyaan
nabadgelyada, isla markaana ay galaan tartan nadiif ah oo aan lahayn
sida uu hadalka u dhigay cay, isaga oo dhinaca kalena dadweynaha u
soo jeediyey in aanay dooran nin caytamaya.
“Xisbiyada waxa loo sameeyey inay qabyaalada baabi’iyaan, ninba ka
uu doono ha galo laakiin waxa u ballan ah nabadgelyo, haddii kale
xisbi jiri mayo, masaajid jiri mayo, tacliini jiri mayso. Waxaan
idinku dardaarayaa nabadgelyada ilaashada. Xisbiyadu doorashada
inugu soo dhow yey qiiq kicin, kursiga ha loo tartamo, sharaf ha
lagu tartamo yaan cay lagu tartamin, yaan qabyaalad lagu tartamin,
qof kastaa kuu doono ha galo, qokastow kaad gashaba nabadgelyada ka
shaqee, cadowga inagu soo duulayana iska ilaaliya, sharafkaa ayaa
lagu soo duulayaa,” ayuu yidhi Xaaji Cabdiwaraabe, waxaannu intaa
raaciyey, “Waxaan ku soo gebogebaynayaa, madaxda xisbiyada ee
fadhida waxaan leeyahay madaxnimona waad doonaysaan, inta Muuse
Biixi Kow ka yahay afkooda ceeb haka ilaaliyaan, qabyaalad ha ka
ilaaliyaan. Ninka qabyaalad ku hadla ha dooranina, ninka caytamaa
madax ma noqon karo, madaxnimadu waxa ay ku wanaagsantahay in lagula
jeclaado, inaad iska jeclaato uun maaha.”
Haseyeeshee Guddoomiye-ku-xigeenka Kowaad ee KULMIYE Muuse Biixi
Cabdi oo uu Xaajigu ku halqabsaday, ayaa isaguna dhankiisa difaacay
xisbiga uu ka tirsan yahay ee KULMIYE, isaga oo sheegay in ay iyagu
horeba ugu dhaqmi jireen dardaarkana uu Xaaji Cabdi u sheegay, balse
loo baahan yahay in dardaarankaa loo sheegay cid kale.
Isaga oo arrintaa ka hadlayeyna waxa uu yidhi; “Xaajigu wuu na
dardaaray, malaha haddii cid la dardaarayey xisbiyadu way kala
tilaamanyihiine annaga lanama dardaarayn, horena waan u fulinay
dardaarankaa haddii aanu nahay KULNIYE. Shan sanno ka hor markii
codku dhacay 80 cod ayaa lagu kala badiyey waxa Xaajiga Sheekh Dirir
iyo Suldaanada annagu yidhaahdeen annaga ayaa idin xukunay ee sidaas
qaata KULMIYOW nabadgelyada sidaas ku, waanu aqbalay. Maanta dalka
Afrika xorriyada ugu horqaatay oo Chana ah oo ah ka ugu horumarsan
Afrika saaka (shalay) dib baa loo dhigay doorashadii, Kenyana waad
ka warqabteen.”
“Markaa annagu waxaan qabnaa horaan dardaarankaa u qaadanay. Tii ka
horasyna waanu qadanay oo waxaanu ahayn jabhadii ugu horeysa ee dal
xoraysa ee si nabadgelyo ah ku wareejisa. Mar labaad ayey qaylo
kacday oo waxay ahayd markii shantii sanno dhamaatay ee 15-kii may
iskuulada la xidhi gaadhay ee dhallinyaradu walaacday ee islaamuhu
walaaceen, gartayada banaanka ayaan ku sii akhrisanay oo waxaannu
nidhi nabadgelyadu sideeda ha ahaato ardaydu sideeda ha u dhigato.
Innaga ayaa dhibaatada iyo iska dulqaadashada naqaanee ‘waar
sannadkaa loo kordhiyey hayska dhamaato ayaanu nidhi’ sow annagu
ismaanu sii xukumin? taasna nabadgelyada ayaan ku eexaysanay.”
Md. Muuse Biixi Cabdi waxa uu Xaaji Cabdi Waraabe iyo culimada u soo
jeediyey in haddii iyaga doorashada soo socota lagaga guulaysto ay
talada qaadanayaan ee ay u diyaargaroobaan inay xisbiyada kale oo
aannu carrabaabin ay ka dhaadhiciyaan in laga helay.
“Tii kale (doorashada) way soo dhowdahay oo saddex billood ayaa ka
hadhaye annagu haddii nalagaga badiyo xukunka sidii ayaanu u
qaadanaynaa, laakiin waxaan weydiinayaa Xaajiga (Cabdi waraabe),
Guurtida, Salaadiinta iyo Sheekh Dirir cidda kale ee la yidhaahdo
waa laydinka badiyey ma qaban karaysaan berrito? Waana inoo balane
qabta.
Ta kale qodabka ah yaan la caytimin waa inoo guddoon, nin aqoonyahan
ahna cay waa ka xaaraan, laakiin laba mid hala kala saaro hebelow
shalay lacag baad xaday oo tuug baad tahay oo waa lagugu hayaa,
hawshaadii kamaad soo bixin, hebelow labaatan jeer baad makarafoon
soo qaadatay oo aad been ii sheegtay, hadda cay maaha ee
dhalliishiibaa la sheegayaa xaqna waa loo leeyahay, dee haddii kale
hore u socon mayno,” ayuu yidhi Md. Muuse Biixi Cabdi.
Jamhuuriya Online
|