Weft Uu Hogaaminayo Xoghayaha Guud Udub Oo Sir
Heer Sare Ah Loogu Soo Dhaweeyey Burco
Wefti balaadhan oo uu
hogaaminaayo xog-hayaha guud ee xisbiga talada haya ee UDUB, ayaa
maanta duhurkii soo gaadhay magaalada Burco ee caasimada Gobolka
Togdheer.
Xoghayaha Guud ee xisbiga UDUB
mudane Jaamac Faarax Yaasiin, oo bishii labaad ee sanadkan xilka
xoghaye-nimada loogu magacaabay shirweynihii labaad ee xisbiga UDUB
ee ka dhacay magaalada Hargeysa, kadib markii uu geeriyooday
xoghayihii hore Alle ha u naxariistee Marxuun Bulaale.
Xoghaye Jaamac oo socdaalkiisani uu yahay kii ugu horeeyey ee uu ku
yimaado Gobolkan Togdheer mudadii uu xilka hayey, ayaa loogu soo
dhaweeyey magaaladan Burco si layaab leh oo aan hore loogu soo
dhaweyn madax dhigiisa ah.
Ujeedada socdallkan ayaa ahayd mid looga gol lahaa isbarashada
xoghayaha cusub iyo laamaha xisbiga ee Gobolada .
Waxa kale oo aan meesha ka maqnayn in dadweynaha looga waramo in
reer UDUB ku qanacsan yihiin go’aankii koomishanka ee dib loogu
dhigaayey wakhtiga ay qabsoomayso doorashada dalku iyo marxaladaha
kale ee dalku marayo.
Soo dhaweynta mudane Jaamac Yaasiin Faarax oo ay kasoo qaybgaleen
dadweyne tiro badan oo isugu jira noocyada kala duwan ee bulshada,
waxa lagaga hor tagay Tuulada Qoyta oo 20 KM u jirta magaaladan
Burco, laguna soo dhaweeyey baabuur aad u tiro badan , iyo dadweyne
ay ka muuqdaan calamada xisbiga UDUB.
Xoghaye Jaamac oo intii aanu soo gaadhin gudaha magaalada Burco, lug
ku dhexmarayey laamiga Qoyta oo ay ku sugnaayeen boqolaal ka mid ah
taageerayaasha xisbiga ayaa u mahadnaqay dadweynihi waxaana ka mid
ahaa ereyadiisi:
“Shacabka Reer Burco aad ayey u mahad sanyihiin, isha Allah weynu
wada joognaa ilaa mudo seddex cisho ah, wixi intaas ka badan weynu
isaga iman doonaa”
Dhan kale amaanka ayaa ahaa mid ay aad sugeen ciidamada nabad
galyada wadooyinka ee Gobolka Togdheer, dadka soo dhaweeyey Xoghaya
ayaa waxaa ka mid ahaa, Badhasaabka Gobolka Togdheer, Gudoomiyaha
Xisbiga UDUB ee Gobolka Togdheer, Badhasaab ku xigeenka Gobolka
Togdheer, Cuqaasha Gobolka iyo dadweyne aad u tiro badan.
Xoghayaha cusub mudane Jaamac Yaasiin Faarax oo dadweynihii isugusoo
baxay munaasibadan lagu soo dhaweynaayey kula hadlay xafiiska
xisbiga UDUB ee Gobolkan Togdheer , waxa ka mid ahaa hadaladiisi:
“Maanta maalin weyn weeye, waa maalin farxad leh, waa maalin aan
cagaha soo dhigay Gobolka Togdheer caasimadiisa Burco, oo ah
caasimadii halganku ka bilaabmi jiray mar walba, waa caasimadii
wadanka laga xoreeyey, lagagana dhawaaqay gobanimada Soomaaliland,
Burco waa caasimadii mustaqbalka iyo guusha, waxaanan leenahay
hanoolaato Burco, shacabkeeda iyo Somaliland-ba .”
Weftigan oo ka koobnaa Gudida Fulinta xisbiga, xubno Baarlamaanka
ah, xubno Golaha Guurtida ah iyo Taageerayaal, ayaa socdaalkooda ku
joogi doona magaalada Burco mudo maalmo ah, iyadoo la filaayo inay u
dhaafi doonaan Degmada Oodweyne ee ka tirsan Gobolkan Togdheer.
Goljano
|