Waxa aanu beel weynta Subeer Awal ka raalli gelinaynaa si kal iyo lab ah baaq ka soo yeedhay odayaal isku sheegay inay ku hadlayaan afka beesha Habar-yoonis ee Burco kuwaas oo sii daayay baaq ay ku dedafaynayaan murashaxnimada Muuse Biixi kuna ta ageerayaan murashaxnimada Axmed Siilaanyo.

Waxaanu idiin sheeggaynaa in khilaafka u dhexeeya xisbiga kulmiye uu yahay mid u yaalla siyaasiyiinta xisbiga waanay dhaamaysanayaan khilaafkooda si waafaqsan sharciga u yaalla xisbiga. Mudane Axmed siilaanyo iyo Mudane Muuse Biixi waa laba siyaasi oo mid kasta sharcigu u banaynayo in uu is sharraxo oo hankiisa muujiyo waana in la sugo xilliga midkood nasiibku siiyo murashaxnimada, sidaa darteed ma aha wax khuseeya odayaasha beelaha mana haboona in khilaafka xisbiga loo soo raro beelaha dhexdooda oo walaaltinimo ka dhexayso.

Odayaasha ku hadlay afka beesha HY ee burco oo ahaa kuwo la dhaqdhaaqjiyay ma jirto cid ay matalaan oo aan ka ahayn naftooda, fekerka ay qabaana ma aha mid ay cidi la wadaagto waanad garan kartaan waxa ka hadliyay xilligan.

Odayaashu beesha ay afkeeda ku hadleen waa beel ballaadhan oo ka weyn in lagu sunto damac siyaasadeed oo cid gaar ahi wadato, waxaanay taageertaa oo ku kala jirtaa dhamaan xisbiyda dalka si dimuqraadiya. Beeshu waxay leedahay guddi guud uu ku matasha dhamaan arrimaha dhaqanka sidaa darteed mar hadaan baaq kasoo bixin guddida guud, waa in loo fahmaa in odayaashaas uu maqaamkoodu hooseeyo oo ay aashood hadleen.

Waxaanu markale idinka raalli gelinaynaa qadafkaa shakhsi abbaarka ah ee aan meesha qaban ee lagula kacay Muuse biixi oo aan mutaysan in sidaa loola hadlo.






Allaa mahad leh
Xafiiska guud ee gudida Talo iyo Tawfiiq- burco