Wasiirka
Gaashaandhiga Somaliland
Cabdillaahi Cali Ibraahim, ayaa
sheegay in aanay jirin wax cabsi ah oo ay ka qabaan hujuum dagaal oo
kaga yimaada dhinaca maamul-gobolleedka Puntland, isla markaana ay
ciidamada Aagga gobolka Sanaag ay ku kordhiyeen ciidamo xoojin ah.
Wasiirka Difaaca oo xalay xog-waraysi siiyay Wargeyska Ogaal, waxa
uu si adag uga jawaabay hadal Madaxweyne Ku-xigeenka
maamul-gobolleedka Puntland ku sheegay inay dagaal kala hortegayaan
hirgelida hawsha diiwaangelinta ee Sool iyo barriga Sanaag.
Waxaanu Wasiirku taas bedelkeeda sheegay in gobolka Sanaag guud
ahaan sidii qorshuhu ahaa diiwaangelintu uga hirgashay, marka laga
reebo goobo tiro yar oo uu tilmaamay in arrimo farsamo ay dib hawshu
uga dhacday.
“Waxaan joogaa Ceerigaabo. Guud ahaan gobolku wuxuu ku sugan yahay
xaalad Nabadgelyo, diiwaangelintuna si fiican bay uga socotaa,
dadkuna cid kastaa waxay si xamaasad leh ugu jirtaa sidii ay
Sanaadiiqda diiwaangelinta u qaadan lahaayeen ee ay u gaadhsiin
lahaayeen goobahooda. Marka ilaa hadda wax dhibaato ah oo ka dhacay
gobolka oo aan kuu sheegaa ma jirto.” Sidaa ayuu yidhi Wasiirku.
Wuxuuna intaa raaciyay oo uu yidhi, “Badankooda (goobaha
diiwaangelinta gobolka) way ka hirgashay, wax lagu sii jeedo oo ilaa
shalay (doraad) dib u dhac ku yimidna way jiraan. Laakiin, intii
kalena maanta (shalay) ayay baxday, markaa wax sii socda iyo wax ay
ka hirgashay labaduba way jiraan.”
Waxa la waydiiyay in 60-ka goobood ee lagu kordhiyay goobaha
diiwaangelinta gobolka Sanaag inay ka hirgashay iyo inkale, waxaanu
ku jawaabay, “Anigu ma ahi Komishan, kuumana xaqiijin karo inay goob
kasta ka dhacday. Laakiin, waxaan ogahay intooda badani inay ku
baxeen Nabadgelyo (hawlwadeenada), wax sii socda iyo wax goobahoodii
gaadhay oo shaqadoodii wataana way jiraan. Lixdanka goobood
Komishanka ayaad waydiinaysaa siday u qorsheeyeen ee ay u dhigeen.”
Madaxweyne Ku-xigeenka maamul-gobolleedka Puntland Xasan Daahir
Afqudhac, ayaa shalay shir jaraa’id oo uu Garoowe ku qabtay kaga
hadlay diiwaangelinta gobollada Sool iyo Barriga Sanaag, isla
markaana ku hanjabay inay dagaal kala hortegayaan hirgelinteeda.
Sidaa darteed, Wasiirka Gaashaandhiga Somaliland oo su’aal arrintaa
ku saabsan la waydiiyay waxa uu ku jawaabay, “Haddii ay
dagaalamayaan (Puntland) iyo haddii kaleba, Barriga Sanaag
Sanaaduuqdii way tegtay, waana laga codaynayaa, waxaanan kuu
xaqiijin karaa goobaha oo dhan inay ka socoto diiwaangelintu. Markaa
Puntland meel ay leedahay haku dagaalanto, haka hanjabto, ciidamana
ha u soo direen. Laakiin, Anigu waxaas waxaan u arkaa iska
ku-tiri-ku-teen ah oo wax jira ahayn.”
Mar la sii waydiiyay Wasiirka inuu magacaabo goobo ka mid ah barriga
Sanaag oo ay haatan ka socoto, waxa uu ku jawaabay oo uu yidhi, “Way
fara badan yihiin, goob qudha iyo goobo yar midna maaha oo way fara
badna yihiin.
Laakiin, goobaha qaarkood waa la isku soo yara koob koobay markii ay
dadku guurguureen. Markaa badankeeda waa laga hirgaliyay meeshii dad
joogay.”
Maalmihii u dambeeyay waxa jiray dhawaaqyo dadka deegaanada Barriga
Sanaag ka soo yeedhay oo ka dhan ah hirgelinta diiwaangelinta iyo
xataa in xukuumadda Somaliland ciidamo dheeraad ah u dirto.
Sidaa darteed, waxa Wasiirka Gaashaandhiga la waydiiyay in xukuumad
ahaan ay wax-garadka deegaankaas wadahadal la gashay, si xaaladda
loo dejiyo waxaanu yidhi “Wax wax diidan anagu maanu arag, cid wax
diidana maanu wada hadlin. Laakiin, dad aad ugu hamuum qaba in loo
geeyo diiwaangelinta ayaanu aragnay.
Balse, waxa dib u dhigay arrimo farsamo oo gobolkuna aad buu u
baahsan yahay, waddooyinkiisuna maaha kuwo irmaan ee waa Raf. Markaa
wixii habsaamayna arrimo farsamo ayay u habsaameen, cid wax diidan
oo aan imika ku odhan karo meeshaas ayaa waxaas diidan ama ka soo
horjeeda Anigu ma hayo.”
Cabdillaahi Cali Ibraahin waxa sidoo kale la waydiiyay halista
hawlwadeenada kaga iman karta xiisad colaadeed oo halkaa ka dhalata
iyo sida ay uga diyaar garoobeen sugida amaanka. Hase yeeshee,
Wasiirku qosol kooban oo uu hordhac uga dhigay jawaabtiisa
su’aashaas la xidhiidha ka dib waxa uu yidhi, “Adigu (weriyaha
waraysanayay) ismaan lahayn su’aashaa waad na waydiin karaysaa.
Laakiin, waxaan kuu sheegayaa maanta gobolka (Sanaag) iyo guud ahaan
xuduuddaha Somaliland badankooda waxa ku xeeran ciidamadeena oo
jooga, diyaarna u ah iska daa’ Komishan oo wax alla wixii dalkeena
xad gudubyar ku soo sameeya inay difaacaan, wax rabash ah iyo wax
dhib ahna ma qabaan oo haddii ay wax jiraan iyaga ayay is arki
lahaayeen.”
Sidoo kale waxa la sii waydiiyay in ciidamada Somaliland ee aagga
barriga Sanaag ay ku ruqaansadeen dhinaca Xuduudka.
“Imika xoojin uun baa loo diray, laakiin awelba way joogeen oo way
degenaayeen.” Sidaa ayuu yidhi Wasiirku. Wuxuuna intaa ku daray, in
xaaladda Nabadgelyo ee gobolka Sanaag ay wanaagsan tahay, isla
markaana aanay jirin cabsi laga qabo in dagaal lagu soo hujuumo
Somaliland.
Haddii dagaal ka hor yimaado hawsha diiwaangelinta gobollada Bariga
oo xoog lagu hirgeliyo, wax saamayn ah maku yeelanaysaa sumcadda
diiwaangelinta? “Wax ay yeelaysaa ma jirto, waayo goobaha ciidanku
joogaa waa goobo difaac.
Markaa Anigu ma qabo inuu jiro ciidan wax yeeli karaya goobaheena
diiwaangelinta, ciidankeenuna waa u diyaar waqti kasta iyo cid kasta
oo isku dayda inay wadanka carqalad geliso, oo meesha iskamay tegine
waxay ku tageen diyaargarow qaabaysan oo ay ugu babac dhigi karaan
wax kasta oo ka horyimaada.” Sidaa waxa yidhi Wasiirka Difaaca
Cabdillaahi Cali Ibraahim.
Wasiirku waxa uu sheegay in qaar ka mid ah wefti Wasiiro ah oo
xukuumaddu u dirtay gobolka Sanaag ay haatan badi ku sugan yihiin
magaalada Ceerigaabo, balse ay jiraan xubno ka mid ah oo gaadhay
degmooyinka barriga gobolkaas, isla markaana ay joogteeyeen kormeer
sida uu sheegay wacyigelin iyo indho-indhayn la xidhiidha oo ay ku
marayaan degaamadaas.
Wargeyska Ogaal
|