Wasiirka Arrimaha
Dibadda Ingiriiska iyo Madax ka Tirsan Dawladdiisa oo Wadahadallo ka
Yeeshay Doorashooyinka Somaliland
Safiirka
Ingiriiska u fadhiya Itoobiya oo booqasho kedis ah ku yimi Hargeysa
iyo natiijada kulamo xaasaasi ah oo uu la yeeshay xukuumadda,
asxaabta iyo Komishanka
Safiirka Boqortooyadda
Ingiriiska u fadhiya magaalada Addis Ababa ee caasimadda Itoobiya
Mr. Norman Ling, ayaa shalay booqasho ku yimi Somaliland, isagoo
kulamo kala duwan la yeeshay xukuumadda, saddexda xisbi qaran iyo
Komishanka Doorashooyinka.
Ma jiro wax war ah oo dhinacyadu ka soo saareen ujeeddada booqashada
safiirka iyo waxyaabihii kulamadaas lagaga wadahadlay toona.
Hasayeeshee, sida ay Jamhuuriya u xaqiijiyeen xalay masuuliyiin ka
tirsan axsaabta qaranka, waxa Mr. Norman kala hadlay madaxda
golayaasha qaranka ee uu la kulmay in laga wada shaqeeyo sidii loo
soo afjari lahaa khilaafaadka u dhexeeya xisbiyada, isla markaana
dib loogu bilaabi lahaa wadahadalladii burburay ee loogu
gogol-xaadhayey qabsoomidda doorashada madaxtooyada oo u muddaysan
27 September 2009.
Mr. Cali Guuleed (Cali Maarshaal) oo ka tirsan siyaasiyiinta xisbiga
mucaaridka ah ee KULMIYE, ayaa Jamhuuriya u xaqiijiyey in safiirka
Ingiriisku u sheegay in ay dhawaan wasiirka arrimaha dibadda
Ingiriiska iyo wasiirka boqortooyada Ingiriiska u qaabilsan Afrika
ay wadahadallo ka yeesheen marxaladda Somaliland marayso iyo sidii
doorashada madaxtooyadu si xor ah ugu qabsoomi lahayd wakhtigii
loogu talogalay, isagoo caddeeyey in beesha caalamka, gaar ahaan
Britain ka fikirayaan sidii wax loogu qaban lahaa Somaliland, balse
wax waliba ku xidhnaan doonaan hannaanka doorashadu u dhacdo.
Mr. Maarshaal waxa uu xusay in safiirku u sheegay in haddii aan sida
ugu dhakhsaha badan go’aan looga gaadhin arrinta Komishanka iyo
samaynta guddida madaxbannaan ay wax waliba wakhtigii loogu
talogalay dib uga dhici doonaan, taas oo saamayn xun ku yeelan
doonta hirgelinta doorashada iyo sumcadda Somaliland ee indhaha
caalmku ku soo jeedaan, isagoo intaa ku daray inay safiirka u
sheegeen in xisbi ahaan ay diyaar u yihiin la dhameeyo khilaafka
taagan, si doorashadu u dhacdo muddadii loo cayimay, isla markaana
wixii dhinacooda ku xidhnaa ay mar horeba dhammeeyeen, hadday tahay
saxeexidda shuruudihii seefarka iyo kuwii deeqbixiyayaashu soo
saareenba.
Sidoo kale, Guddoomiyaha siyaasadda xisbiga talada haya ee UDUB Mr.
Cumar Jaamac oo aannu xalay khadka telefoonka kula xidhiidhnay, ayaa
cadeeyey in safiirku ku guubaabiyey in saddexda xisbi si wadajir ah
uga gudbaan waxyaabaha caqabadaha ku noqon kara qabsoomidda
doorashada, isagoo madaxda UDUB ee uu la kulmay u caddeeyey in aanay
iyagu xaq u lahayn inay ku soo farogaliyaan qaabka Somaliland
doorashadeeda u qabsanayso, basle waxa uu ballanqaaday in ay
taageero la barbar joogaan sidii doorashadu ugu qabsoomi lahayd
hannaan xor ah oo madaxbannaan.
Mr. Cumar Jaamac waxa uu xusay in ay safiirka u sheegeen in xisbi
ahaan iyo xukuumaddaba ay ka go’an tahay sidii ay doorashadu
wakhtigeedii u qabsoomi lahayd, isla markaana saxeexeen shuruudihii
seefarka diiwaangelinta, xukuumadduna shubtay lacagtii saami ahaan
kaga soo hagaagay dhaqaalaha ku baxaya doorashada, sidoo kalena u
caddeeyeen in Komishanka Doorashooyinku yihiin hay’ad madaxbannaan
oo aan xisbi iyo xukuumad toona lagu farogalin karin shaqadooda,
axsaabtuna rabitaankooda xubinta ay neceb tahay ku beddeli karin,
mid ay jecel yihiina ku joojin Karin.
Waxa kale oo guddoomiyuhu xaqiijiyey i ay safiirka u sheegeen in
xisbiyadu dib isugu noqon doonaan lana dhammayn doono wixii khilaaf
ah ee jira, kuna wargeliyeen haddii la xoojiyo guddida kormeerka
dooroshooyinka ay kala hagi karaan haddii axsaabtu ku murmaan
arrimaha doorashada.
Guddoomiye-ku-xigeenka Komishanka Doorashooyinka Md. Cali Maxamed
Cabdulle (Biikolo) oo aannu isagana wax ka weydiinay waxyaabihii ugu
muhiimsanaa ee dhinacooda safiirku kala hadlay, waxa uu ku jawaabay;
“Nuxurka kulankayaga waxa ugu muhiimsanaa munaaqisho ku saabsan
arrimaha doorashada, waxaannu safiirku nagu yidhi, bal intaad wax
kale oo dhan meel iska dhigtaan waxaad u guntataan sidii doorashadu
u qabsoomi lahayd waqtiga loo qoondeeyey, isla markaana looga
hawlgeli lahaa in si miyir qabta loo xalliyo waxyaabaha lagu
muransan yahay, caalamkuna waxa uu indhaha ku hayaa doorasho laysku
waafaqsan yahay oo xilligeeda ka dhacda Somaliland,” ayuu yidhi Mr.
Biikolo
Jamhuuriya Online
|