Wasiirka Arr. Dibada JSL Oo U Kicitimay Dalka
Ingiriiska In Uu Halkaas Kaga Qayb Galo Shir Caalami Ah
Wasiirka Wasaaradda Arrimaha
Dibada Somaliland Cabdillaahi Maxamed Ducaale, ayaa maanta socdaal
shaqo ugu kicitimay dalka Ingiriiska, halkaas oo uu sheegay in uu
kaga qaybgalayo Shir caalami ah oo lagaga hadlayo Xuduudaha
wadamadii uu Gumaysan jiray dalka Ingiriisku, gaar ahaan kuwa
qaaradda Afrika.
Wasiirka oo maanta ka duulay Madaarka Diyaaradaha ee Magaaladda
Hargeysa, intii aanu ambabixin ka hor, waxa uu Warbaahinta
faah-faahin ka siiyay, ujeedada socdaalkiisani la xidhiidho, isla
markaana waxa uu sheegay in uu Safarkiisan ku sii mari doono dalka
Itoobiya oo uu caawa ku hakan doono, waxaanu intaa daray in
safarkiisani ka dambeeyay Martiqaad rasmi ah oo uu ka helay
Ingiriiska, kaasoo ujeedadiisu ahayd inuu ka qaybgalo Shir Caalami
ah oo lagu qabanayo wadankaas, Shirkaas oo uu Wasiirku Sheegay in
lagaga hadlayo Xuduudaha wadamadii uu dalka Ingiriisku gumaysan
jiray ee qaaradda Afrika.
Wasiirka Arrimaha Dibada ee Somaliland, waxa uu sheegay in Shirkan
uu ka qayb galyo oo ah mid Caalami ah, inuu uga faa’iidaysan doono
gudbinta qaddiyadda Somaliland, isla markaana uu khudbad ku saabsan
Somaliland sooyaalkeeda taariikheed, xaaladaha ay wakhtigan ku sugan
tahay, hanaanka dimuquraadiyadeed ee ka jira iyo xuduudaha ay
Somaliland leedahay ka jeedin doono Jaamacad Ingiriiska ku taalla.
Si kastaba ha ahaatee, Safarkan Wasiirka Arrimaha Dibada ee ku
saabsan Xuduudaha ayaa ku soo beegmay Xili Xuduudkii Somaliland ee
Ingiriisku ogaa, gaar ahaan Xukuudka Somaliland Maamulka Puntland/Somalia
la wadaagtaa aanu ku wada jirin Gacanta Somaliland, inkasta oo
Ciidamada Qaranka Somaliland kulaalayaan Xadkaas.
Hadhwanaagnews
|