Warsaxaafadeed Xisbiga KUlmiye

Dastuurka Qaranka JSL wuxuu si tafatiran oon mugdi ku jirin u tilmaamaya madax banaanida Saxaafadda (Warbaahinta) Somaliland (Independence of Media) sida uu qeexaayo Qodobka 32aad, faqradiisa 3aad.

Haddaba xil-ka-qaadistii Guddoomiyaha Joornaalka Maandeeq ee Xukuumaddu maamusho Mustafe Cabdi Ciise (Shiine) waxa ka markhaati furaysa in xukuumadda uu madaxda ka yahay Md. Daahir Riyaale Kaahin aanay doonaynin saxaafad madax banaan ay ka jirto JSL, Dastuurka Qarankuna xornimada uu saxaafada u waajibiyey inay yeelato ay xukuumadu diidan tahay, Wasiirka Warfaafintuna uu yahay ilaalada Daahir Riyaale u adeegsado ku-xadgudubka cabudhinta saxaafadda, iyadoo ay horena in badan u dhacday gefaf aad u curfi iyo asluuba xun, Wasiirka warfaafintu kula kacay suxufiyiin badan iyo shaqaale wasaaradda ka tirsan, haddii loo baahdana la tixi doono.

Arrinta ugu weyn ee sida qotoda dheer u daah furaysay ujeedada Xukuumada Daahir Riyaale Kaahin ay ku raad -goobeysey in Saxaafadda Somaliland noqoto mid aan madax banaaneyn ay ahayd xeerkii la yaabka ahaa ee Wasiirka warfaafintu u soo gudbiyey Golaha Wakiillada, Goluhuna uu joojiyey xeerka ka soo jeeda fikiradihii Saxaafadda kelitalisyadii iyo nidaamyadii shuuciyadda ee haligmey dabayaaqadii qarnigii labaatanaad, qarnigan cusub ee kow iyo labaatanaad ee loogu wanqalay dimuqraadiyadda, xoriyatal qawlka iyo madax banaanida Saxaafadda.

Waxa muddan in la xusuusto arrinta saxaafadda in muddo dheer ay jirtay muran Xukuumadda, Xisbiyada Mucaaradka ah iyo aqoonyahanka Dalka, taasoo ah madax banaanida Saxaafadda, haddaba xil ka qaadista Guddoomiyaha Wargayska Maandeeq, waxa ay markhaati furaysa in Xukuumadda Daahir Riyaale ay si buuxda uga soo horjeedo madax banaanida Saxaafadda, taasoo ah waajib Dastuuri ah.

Waxa la yaab ah, sababta lagu eryey Mustafe Shiine, ay tahay Afhayeenka Madaxtooyada ayuu wax ka sheegay, haddaba maxay tahay Afhayeenka Madaxtooyadu waxa uu sameeyey:-

Guddoomiyaha Urur Saxaafadeedka SOLJA, ahna Guddoomiyaha Maandeeq, Afhayeenka Madaxtooyada uu ku naqdiyey falkii foosha xumaa, dhaqankeenana curfiga ku ahaa, kaasoo uu ku fara saaray madal Gabadh Suxufiyad ah Muuna Casayr, goobtaasna uu fadhiyey Madaxweynuhu.

Guntii iyo gebagebadii ku-xad-gudubka Saxaafadda ee Xukuumaddu caadaysatay waa burbur Dastuurka Qaranka ah, sidaas darteed, waa in Guddiga arrimaha bulshada ee Saxaafadda qaabilsan ay Wasiirka warfaafinta talaabo ka qaado (Malaha Madaxweynuhu curfiyadaa wuu la ogolyahay). Sidoo kale ururada saxaafaduna waa in ay kulan isugu yimaadaan, arrintaana talaabo ka qaadaan.
 

Wa Billaahi Tawfiiq
 

Md. C/raxman C/qaadir Faarax
Guddoomiye ku-xigeenka 2aad ee Xisbiga Kulmiye