Guddoomiyaha Xisbiga
Kulmiye Oo Lala Yeeshay Waraysi Xiiso Badan
Gudoomiyaha Xisbiga Mucaaridka ee
KULMIYE Axmed Maxamed Maxamuud ( Siilaanyo ) ayaa dhaliilay
saameynta siyaasada Xukuummada Somaliland ee arrimaha dibada,
Islamarkana waxa uu tilmaamay inaanay uga dhex muuqan sidii la
filayay Saaxada lagu lafa-guro arrimaha siyaasada Afrika ee Nairobo
Kenya.
Gudoomiyaha Xisbiga Kulmiye iyo wafti uu hogaaminayo ayaa maal-mihii
ugu danbeeyay socdaal howleed ku joogay Magaalada Nairobi ee xarunta
dalka Kenya. Sidaa daraadeed, wargeyska Ogaal si uu wax uga ogaado
dhaq-dhaqaaqyada Waftiga Kulmiye iyo waxyaabaha ay ka wadda hadleen
Saraakiil sar sare iyo dublamaasiyiin uu la kulmay ayaa waxa uu
khadka Isgaadhsiinta ku xog-waraystay Gudoomiye Axmed Siilaanyo.
Waxaana uu sheegay Gudoomiyaha Kulmiye in shirarka ay la yeesheen
Siyaasiyiinta dalka Kenye iyo Safiirada ku sugan Nairobi maalmaha
kooban ee ay dalkaa ku sugnaayeen inay uga soo baxday inaanu jirin
olole iyo dedaal ku wajahan qadiyada madaxbanaanida Somaliland oo
xukuumada ka fuliso wadanka Kenya oo udub dhexaad u ah siyaasada
Qaarada Afrika.
“Waxaanu arragnay Madaxweyne ku xigeenka dalka Kenya Kalonzo Musyoka,
waxaa la noogu maqan yahay kullan aanu la yeelanayno
Raysal-wasaaraha, waxaanu is arragnay Safiiro. Waxaanu la kulanay
Saraakiisha Hayadaha qaramada midoobay…waxaasoo dhan waxaanu ka
wadda hadlaynay arrimaha Somaliland oo ay ka muuqatay inaanay
qaarkood war badanba ka heyn, xitaa waxaa nooga dha-dhantay
Madaxweyne ku xigeenka Kenya markaanu la kulanay in weli ay u
haystaan in Edna aadan Tahay Wasiirka Arrimaha dibada. Waan yaabnay
meesha ay tegi jireen Cawil Iyo Cabdilaahi Maxamed Ducaal. Mar haduu
soo qaadayna (Edna) waxaa noo cadaatay inaanay malaha is aragba
marka Qoladaasi (Wasiirada Xukuumada Somaliland) Kenya yimaadaan,
runtu waa sidaa” Sidaas waxa yidhi Axmed Siilaanyo.
Gudoomiyaha Kulmiye waxa uu sheegay in loo baahnaa in mar hore laga
gallo Kenya dedaal dheeraad ah oo dublamaasiyadeed. Waxana
hadalkiisa ka mid ahaa oo uu yidhi, “Waxaa noo muuqata inay waajib
ahayd in mar hore Somaliland Xafiis balaadhan ku yeelato halkan
Kenya, waa meesha siyaasada Afrika laga hago ee ay ka socota,
dunidana xidhiidho badan la leh” Gudoomiye Siilaanyo waxa uu sheegay
in xukuumada Somaliland wakiil u magacawday Dalkaas, balse aanu
jirin xafiis u furan iyo meel uu leeyahay toona. “Wakiil uunbaa la
magacaabay, laakiin Xafiis iyo meel loo furay ma jirto..ninbaa ku
magacaaban laakiin, wax lala qabtay iyo meel loo furay mid-na ma
jirto. Balse, waa nin aad iyo aad u shaqeeya oo aanu ku
hanbalyay-nayno dedaalkiisa.”
Waxa uu sheegay Axmed Siilaanyo inay Xisbi ahaan u tageen dalkaasi,
aadna loogu soo dhaweeyay, mar uu arrintaa ka hadlayay-na waxa uu
yidhi, “Si aad iyo aad ah oo laxaadleh ayay dadka reer Somaliland ee
ku dhaqan Kenya noo soo dhaweeyeen, dhalin yaro iyo waayeel Caleemo
qoyan ayaa lanagala hor yimid..,…Allbaabo fiican ayaa noo furmay ..
kulan weyn ayaanu Axada (Beri) la yeelan doonaa Dadka reer
Somaliland ee ku dhaqan dalkan oo aanu ugu waramaynaa..”
Gudoomiyaha Kulmiye su’aal laga sii weydiiyay goorta ay u
balansanyihiin kulanka Raysal-wasaaraha waxa uu sheegay in lagu jiro
Qorsheynta Kulankaasi.
Ugu danbeyna waxa uu ku dooday in socdaalkoodani u muujiyay meel
looga baahanaa in xukuumadu uga ololeyso qadiyada madax-banaanida
Somaliland, balse aan la sameyn. “Markaan soo ururiyo, waxaa nooga
muuqda inay tahay meel aad la inooga baahnaa, inaynu dareen culus
siino la inooga baahan-yahay. Waa meel Afrika oo dhami isugu timaado,
dunidana xidhiidh fiican la leh weeye, Markaa, waxa la inooga
baahnaa inaynu awood weyn iyo muuqaal weyn ku yeelano hadaynu
doonayno in qadiyadeenu horumar sameyso.” Ayuu sii raaciyay
hadalkiisa.
Ogaal
|