Waraysi Khaas ah oo Jamhuuriya la Yeelatay Guddoomiyaha Urur Cusub oo Lagaga Dhawaaqay Washington

Waxa dhawaan lagaga dhawaaqay dalka Maraykanka, gaar ah caasimaddiisa Washington urur la magac-baxay Water for life Project si uu wax uga qabto biyo la'aanta ka taagan Somaliland.

Haddaba, si aanu waxa uga ogaano ururkan iyo hawlihiisa ayaa tifaftiraha wargeyska Jamhuuriya Times London Mr. Cabdixakiim Maxamed Sheekh la xidhiidhay guddoomiyaha ururkaas Marwo Nura Ahmed Waris, waxana ugu horreyn la weydiiyey sababaha ay u aasaaseen ururkan?

Marwo Nuura oo ka jawaabaysay su'aashaas waxa ay tidhi; "Waxa uu fikirkani nagu dhashay markaanu aragnay baahida biyo la'aanta ah ee ka jirta dalkeena gaar ahaana caasimadda Somaliland ee Hargeysa oo biyo la'aan xoog leh ka jirto, iyada oo maanta dadka Hargeysa ku nool lagu qiyaaso inay kor u dhaafeen hal milyan oo qof, halka biyaha magaaladaasna waagii hore loogu talogalay dad aan ka badnayn toban kun oo qof, waxana iminka Hargeyas ka jira baahi aad ah oo u baahan in wax laga qabto, waana sababta nagu kelliftay inaanu ururkan samayno si aanu intii awoodayada ah wax uga qabano baahidaas.

S: Sidee ayaad u hawlgalaysaan, waa maxayse tallaabada koowaad ee aad qaadaysaan?

J: Marka hore waxaanu doonaynaa in aanu samayno qorshe, qorshahaas waxa uu bud-dhig noqonayaa in aanu si qoto dheer u baadhno baahida biyo iyo sida ay suurtogal ku noqon karto in la sameeyo iskaashi ka yimaad dhinacyada dadweynaha, xukuumadda, qurba-joogga, hay’adaha calaamiga ah, gaar ahaanna kuwa Maraykanka si loogu hawlgalo wax-ka-qabashada baahidan darran ee biyo la'aantu keentay, taas marka la helo waxa markaas bilaabmi kara ku-dhaqaaqidda si hawshan wax looga qabto.

S: Goorma ayaad ku talo jirtaan inaad hawshan bilowdaan?

J: Waxaanu ku rajo weyn nahay in aanu sida ugu dhakhso badan aanu hawshan uu gudo-galno.

S: Arrintani waxay uu muuqataa mid aad u balaadhan, dhaqaale badana u baahan, markaa yaa idinka caawinayaa?

J: Horta su’aal aad uu ballaadhan ayaad ii weydiisay waanaad ku mahadsantahay, fikirkan markii uu nagu dhashay waxaannu ka eegnay dhinacayo badan, hawl kasta marka la galayana arrinteedu ma yara. Qorshahayaga waxaannu u qaybinay dhawr weji oo kala ah:

In ururkan aannu sharciyaynay oo uu ka diiwaangalinay dalka Maraykanka, taasina waxay noo suurtogalin doontaa inaanu dalka Maraykan ka samayno kaalmo ururin (Fund Raising) oo aanu hay'adaha samafalka, shirkadaha iyo kuwa khayriga ahba u weydiin doono dhaqaale, sida oo kalana aanu dadweynaha reer Somaliland ee qurba-joogga ah iyagana u bandhigno mashruucan si gacan uga geystaan, waaxannu markaas aad ugu rajo weynahay inay dadweynaheena gudo iyo dibadba ay mashruucan soo dhaweyn doonaan oo ay ka qaybqaadan doonaan sidii dalkeena baahiyaha biyo la'aneed ee ka jira aynu wax uga qaban lahayn innaga oo wadajir ah, waana tiirka koowaad ee nolosha biyuhu, iyadoo aanay cidna horumar gaadhi karin biyo la'aan.

S: Marwo Weris waxaad ka shaqaysay ama gacan ka geysatay ururro samofal oo door ah, dadweynaha wax ma uga sheegi kartaa ururrada aad ka soo shaqaysay ama aad imika ka tirsan tahay?

J: Waa runtaa waxaanan muddo aad u dheer intii itaalkay ah gacan ka geysanayay kolba meesha ama ururka aan u arko inuu dalka iyo dadkeena wax u qabanayo. Iminka waxaan xubin ka ahay ururka Somaliland Forum oo in badan ka qaybqaatay mashaariic horumarineed oo dalkeenna laga fuliyay, sidoo kale waxaan xubin ka ahay ururka saaxiibtinimada ee Edna Friends Hospital, Kulliyadda Badda ee Berbera oo aan iyadana ka qayb qaatay kaalmo ururinteeda, halkan Maraykankana waxaan ka mid ahaa guddiga sare ee Somaliland Community Minneapolis

wixii faahfaahin ah ee ururka ku saabsan waxaad kale xidhiidhi kartaan nurawaris@yahoo.com

 

Source:Jamhuuriya Online