Riyaale Iyo Kuwii
Muddo-Kordhinta Sameeyay Waxay Dalka La Sugayaan Inta Dawladda
Shariif Xoogaysanayso
“Madaxweyne Ku-Xigeenka Aamus Baa
Lagu Yidhaahdaa Oo Talo Lama Weydiiyo, Ee Wax Loo Diro Uun Buu Soo
Qabtaa” Eng. Maxamed Xaashi Cilmi – Wareysi
“Xisbiga KULMIYE mar buu khalad galay laakiin tii hore ayuu wax ku
bartoo wuu isu soo jeedaa, ina Cigaal iyo Ina Riyaalena waxay ku
kala duwan yihiin, Ina Cigaal marka laga toosan yahay wuu qaadan
jiray, laakiin Ina Riyaale aynu wada-hadalno ceeb buu u haystaa,
tanaasulkana fulaynimo.” Sidaa waxa yidhi Eng. Maxamed Xaashi Cilmi,
Gudoomiye ku-xigeenka 1aad ee urur-siyaasadeedka QARAN ee bah-wadaagta
kula jira xisbiga mucaaridka ah ee KULMIYE oo shalay wareysi uu
siiyey Telefiishanka Madaxa banaan ee SLSC iyo wargeyska Haatuf,
kaas oo uu kaga hadlay arrimo xiiso badan oo la xidhiidha xaaladda
dalka iyo arrimo kale, waxaanu wareysigaasi u dhacay sidan:
S: Waxaad tahay injineer, oo dhinaca dhulka iyo dhismayaasha danta
guud wax badan xog ogaal u ah, marna maayar ka soo ahaa caasimadda,
markaa waxaad si faahfaahsan uga warantaa dhulkan danta guud ee
xukuumaddu iibisay?
J: Arrimahan waa kuwo cusub sida loo galayna aanay ahayn si
hagaagsan.magaaladu waxay u qaybsanayd laba dhinac waxay ahayd
shacab Area iyo dhinac dadweynuhu deganayeen, ingiriiskuna wuxuu ka
degi jiray magaalooyinka dhinaca galbeedka ama waqooyi galbeed,
qorshe wadooyin iyo dariiqyo ah umuu samayn ee wuxu ugu talo galay
guryo gooni gooni fiilo ah oo ay dhirtu kala qariso, sidaas ayaanu
talogalkii hore ahaa. Anigu markii aan maayarka noqday waxaan arkay
hunguriga ka haya dadka dhulka shacabka, dhagax baa meel walba ka
dhigtay oo ninba meel buu seegtay, taasna waxaan ku soo xidhay
baarlamaanka ayaan geeyey talo aan leeyahay shacab Area wax dambe oo
dadweyne ka dhisa yaanay jirin, si looga baxo boobkii dhulkaas ku
socday, baarlamaankii way ansixiyeen, madax weynihiina digreeto ayuu
kusoo saaray kolka shacbigan waxay ahayd inaanu shacab Area dhul
dadweyne laga iibiyaa jirin.
Haddaba nasiib daro kolka dan gaar ahi jirto, danta gaarka ahi
sharciga waa u col, sharcigana wixii dan guud ah ayaa loo sameeyey,
marka wax la boobayo dan gaar ah ayaa imanaysa oo sharcigii waa la
jiiidhayaa, markii aan maayarnimadii aan ka tagay ayaa barnaamij kii
la baabi’iyey, dabadeed waxaa soo galay niman tijaarta, musuqmaasuqa
ugu weyn ee dalka haystaana waa nimanka maalqabeenka ah, waxoodii oo
xalala ah ayey xaaraan ka dhigaan, waxa jira xadiis Nabewi ah oo
odhanaya shibir yar oo dhul ah luquntaa laguu sudhayaa aakiro,
markaa dhulkan waaweyn ee ay haystaan kama bixi karaan, laakiin dad
aakhiro-ba ujeeda maaha. Waxa jira qodob distoori ah oo odhanaya
dawladu way munaafacaadsan kartaa, kirayn kartaa, waanay iibin
kartaa, laakiin waa inay sharciga waafaqsanaataa oo waxan la
iibinayaa dadka u dhexeeyaa oo la yidhaahdaa halkaasaa la iibinayaa
yaa iibsanaya ee aanay noqon ka iibiya hebel uu hebel wato iyo hebel
xisbiga udub taageera. Marka la iibiyo ee sharciga la mariyo kadibna
waa in dakhligu gala miisaaniyada qaranka, nasiib darada waxa ka mid
ah waaxdii garsoorku way dhimatay, xeer ilaalintina way dhimatay,
Hanti Dhawrkii wuu dhintay oo hanti ummadeed oo uu ka warhayaa ma
jirto, hanti dhawrka ayey ahayd inuu daba galo. Marka horena waxay
ahayd hanti dhawrka in la dhaariyo, oo aan la eryi karin
baarlamaanka oo la ansixiyo mooyee, immikase erigaa ka kaga weyn
waxan yar ee ay qadanayaan, haddaba lacagayowga lagu iibiyey dhulkan
mid galay miisaaniyaddu kuma jiro. Markaa waa xaaraan waana sharci
daro iibka dhulka danka guud.
S: Dhulka danta guud ee magaalada yaa masuul ka ah, ma wasaaradda
hawlaha guud mise maayarka?
J: Berigii aan maayarka ahaa ayaa Alle ha u naxariistee Quraab oo
ahaa wasiirka Hawlaha Guud waxaanu isku qabsanay shacab Area, anigu
waxaan istaagay daaraha ayey dawladda dhexe leedahay, dhulkuse wuxuu
ka tirsan yahay dhulka magaalada ee maayarku xukumo, waayo shacabku
maaha bogcad ka go’an magalaadda, ka dibna waxaanu isula tagnay alle
ha u naxariistee cigaal, sidaas ayaanu ku kala baxnay oo anigu ku
shaqo lahaa shacabka manuu soo geli jirin wasiirka hawlaha guud.
S: Markaa dhulkan danta Guud ee la iibiyey sidee loo dhaxal
wareejiyey ma maayarkaa iibiyey mise Hawlaha Guud?
J: Dhulkan waxa lagu dhaxal wareejiyey magac inagaga yimid Somalia
markii aynu isku darsanay oo la leeyahay Hawlaha Guud baa ku shaqo
leh, marka ninka madaxweynaha ahi ka leexdo danta caamka ah
naasnuujin baa timaad. Calaa kuli xaal, waa hawl si xaaraan ah lagu
iibiyey, xoolo xaaraan ah baa la siistay oo nin lagu caawiyey, anigu
waxan qabaa maalinta illaahay dawlad wanaagsan keeno inay halkeedi
ku noqon oo kuwa khasaarana iyaga noqon doonaan, waayo xoolo ay nin
siiyeen kuma iibsan karaan xoolo ummadeed, iyagana waxa u roon in
xaaraanta laga dulqaado, sharci ay ku iibsadeena ma jiro oo
dariiqadii sharciga ahayd may soo marin.
Markii dhexdhexaadintii Rayaale iyo shariif - iyagu may wada
fadhiisan ee waa loo kala shaqaynayey - waxa ku jirtay inay isku soo
noqdaan muddo siddeed bilood ah ka dib, codsiga Riyaale ka dalbaday
guurtida ee lixda bilood ah ee uu isagu yar dafiray laakiin ay isla
ogaayeen oo uu isagu u diray iyo kuwii u ansixiyey muddo kordhinta
waxay ku waddo jiraan dambi qaran oo ah in dalka dib loo dhigo inta
Somalia iyo shariif qoladiisu ka xoogaysanayso.
S: Madaxweyne ku xigeenkiina wuxuu ka tegay Djibouti, ee dayaxa iyo
dugsiga maxaa isku beegay?
J: Waxyaabo badan baa isku beegmay ee madaxweyne ku xigeenku markuu
sii tagay wuxuu si yidhi islaamka ha lagu dhaqmo oo sharciyadi hala
sameeyo iyo wax caynkaas ah, islaamka ma shalay uu xusuustay, maxaa
isku begaydii bay kuso noqonaysaa, toddobadi sanadood ee u fadhiyey
muxu islaam uga hadli waayey, maxaa imika keenay, horta ninkii
Djibouti tagaaba shakigiisa ayuu leeyahay waayo Djibouti noqotay
meel dhibaatadeenu ka kow tahay waxay ka shaqeeyaan, bililaqaysi
ayey ku jiraan, xoolaheeni waa ta loo raray, ilaahay cudur buuse ku
sahday oo shan markab oo xoolo ah baa ka khasaaray, xataa iddi bay
qaadeen oo ciid kale dhigeen, haddana xoolihii way bukoonayaan,
waxaaba hadda socota in xoolaha halkoodii lagu soo celiyo, waana
ayanak dadkani leeyahay.
Markaa tegistiisu (madxweyne ku xigeenka) inkastoo isagu wixii loo
diro uun nin ku soconaya yahay, tallana kuma laha oo marka la doono
naga aamus baa lagu yidhaahdaa.
S: Markaa ma waxay ahayd markii aad golaha wasiirada ku jirtay?
J: Maya dhawaan raggii wada hadalka la galay baa nool markii uu
ooyayey, kelmad buu yidhi aanan xasuusnayn, markaasu Riyaale yidhi
dadku waxay I waydiiyaan xagee baad ka soo qaadatay ninkan, isagii
oo taagan buu sidaas ku leeyahay, waxay ahayd inuu yidhaahdo halkii
Cigaal kaa keenay baad iga soo qaadatay, kuma dhaco, sida runta ahna
nin jira maaha ee wax loo diro uun buu soo qabtaa.
S: Wakhtigii golaha wasiirada ku jirtay waxa la yidhaahdaa cawil oo
kale, wax buu qorqoraa, oo buugaag buu diyaariyaa, ma jirtay
arrintaasi?
J: Horta Cawil buug hore ayuu qoray oo ah kii siillaanyo mucjisada
ku sheegay, laakiin cawil cidiba rumaysan mayso, oo jaamac yare waa
kii yidhi waa beenaale.
S: Waxa la yidhaahdaa dhulkan la iibiyey waxa laga dhisayaa daaro
dhaadheer oo bilicdii wax ka bedelay, taas ka waran?
J: Horta guryahan waxa loogu talo galay shaqaalaha dawladdu inay
galaan oo kiro jaban bixiyaan, shaqaalihiina meesha way ka baxeen,
ma xuma in daaro dhaadheer laga dhiso, laakiin waxay ahayd in
sharcigii loo maro dakhligii lagu daro miisaanidda Qaranka, markaa
mashruuc ummadda loogu samaynayaa ma jiro ee waa dhulkaa la boobayo.
S: Xukuumadda dhaliilo badan waa loo soo jeediyaa, sharci jebin
badani way samaysaa haday hanti la boobayo noqoto iyo haday mid
qaranka ahba, laakiin dhibaatadu wa shacbiga oo la yidhahdo kama
damqanay aan arrimahan, mana aha mid wax diidi karaya, masalan tan
dhulka, dadkii iyagaa tijaarki la doonanaya, mana jiran shacbi ka
hadlaya boobka dhulkan oo isu soo baxaya, markaa miyaan la odhan
karin shacbia iyagaaba kuogol raggani inaysii joogaan?
J: Shacbi markaynu leenahay waa dad balaadhan, baahina way haysaa oo
sicir barar iyo abaaro ayaa isu galay, shaqo la’aan, laakiin halka
laga dhintay waxa weeye Baarlamaan baan jirin, waaxdii garsoorku waa
hore ayey dhimatay oo ninkan magacaabay ayaa wuxuu doonayaa cid u
dhego nugul ee lama raadinayo cid meeshii u qalanta, taasina way
wada baaba’day, waxa ku xiga baarlamaankii oo laba ah Wakiilo iyo
Guurti, Guurtidu iyadu beri hore ayey talada laabatay. Waxa soo
hadhay wakiilada, golaha wakiilada waxa la ogyahay inuu sannad walba
ansixiyo miisaaniyad uu ogyahay in dakhli badani ka dhiman yahay oo
ay iyagu sheegaan, cid ay dacwad kusoo ogeena ma jirto, markaa halka
uu dalku ka dhintay waa baarlamaanka oo aan daba galayn
miisaaniyadda mushaharka madaxweynaha golaha wakiiladdu 2006 ayey u
gudbiyaan shirgudoonkooda in laga dhimo. Mushaharkan badan ee uu
qaadanayo weli shirgudoonka ayuu la yaallaa 2007 kii ay dib loogu
celiyey welina shirgudoonku ayuu la yaalaa markaa qoladiinan
saxaafadu intaad Cabdiraxmaan cirro u tagtaan waxaad weydiisaan
maxaad u gudbin waydeen ilayn dadka intaas oo lacag ah ayaa ka
luntay intii aad hayseene, kolkaa halkaa laga dhintay dadweynaha
maaha waayo dadka intiisa badani waa dad wanaagsan, waa dadkii intay
dalkoodii oo buuxa ka qaxeen wax dawarsanaya la waayey. Waadadka
wixii laga dumiyey dib u dhisay in badan oo kalena ku soo kordhiyey,
ee jaamacadaha dhisay, isgaadhsiinta sameeyey, muddadaa cid ay
waxaasi ku dhaceen oo ku wax qabsataa meelna kama jiro, Eed kale
malaha shacbigu ee dirxibaa ka galay madaxa, oo madaxdii baa
illaahay ka dilay. Baarlamaanka ayuu ahaa kii daba geli lahaa, bal
may maalin kaliya yidhaahdaan intaas oo lacag ahi waxay ku baxday
hebel iyo hebel, oo waxa weeye markay iyagu xeer illaalintii u
gudbiyaan dambigii wuu ka hadhay, ummadduna way ogaan lahayd ninkii
wax lagu leeyahay ee qariskan ayaa ninkii asturaysa.
S: Markaad magaalada dhexmarto arkaysaa dhalinyaradii oo rajo beel
taagan, waxanay qaarkood odhanayaa markii doorashadii qabsomi way
ayey rajo dabarku ka qabeen isbedel dhamaatay boqolaal baana tahriib
miciinsaday, taas ka waran?
J: Wax Alle ummad siiyo bina adamkaa ugu qaalisan illaahayna wuu
karaameeyey, malaa’iktaa la yidhi u sujuud, waxaanu illaahay bini
aadamka u abuuray inuu caabudo, kow kana camiro inuu qiimo darada
iyo inay dhalinyarada badda isku tuurto waa awood inaga luntay waa
dadkeenii oo dalkii gabin ee dawladeedii gabtay wixii waxay ku soo
noqnayaan waxan yaa u hagaajin lahaa, dee kii ay doorteen, saddexda
waaxood inay isdheeli tiraan baa loo sameeey, markaa xeerdeyntii
inay ka hadlaan bay ahayd sharcigan la jabinayo iyo sida xun ee wax
loo wado, kuwa shaqadoodii gaba waa fulintii oo musuqmaasuq ku
kacday iyo xeer dejintii oo qaban wayday.
Masalan sow dhowaan Berbera lacag lagama soo dejin, siddeed gaadhi
bay ahaayeen, afar baanka ayaa lagu rogay baa suuqa ku jirtay,
afartii kale meeye, yaa baadhi lahaa? Waxaa baadhi lahaa
baarlamaanka oo guddi u diri lahaa soo baadha, oo dacwad ku soo
oogta haddii wixii meeshii laga waayo ma jiraan, qaarkood waxay
sugayaan in wax laga siiyo waxaan la lunsanayo oo bahal dhaameelka
ahi imaankii buu ka madhay o odayaashii u gooteyey muddo kordhinta
qaar sheikh hebel la yidhaahdo intay waxoogay meel kaa qaateen
markii la yidhi madaxtooyadii baa wax bixinaysa intay tii iska
celiyeen tii kale qaatay, waana sheikh nasri ayaa illaahay uu si
dhakhso ah u keeni siday doonayaaa noqonimayso ee sidaa illaahay
yidhi ayey noqon. Waxaan layaabaa toddobaddii sannadood ee uu
Rayaale joogay saddex doorasho iyo ciidankaa uu bari geeyey mooyee
wax allaale wax uu dalka ka qabtay ma jiraan, fasal kamuu dhisnayn.
S: Haddii Riyaale shandada qaato waad isku yaacayaan baa wasiirada
qaar uu cawil kamid yahay yidhaahdeen?
J: Cawil waa beenaale ee waxba ha ka soo qaadin hadalkiisa, hortii
miyeynaan nabadda ku jirin, ma isagaa [Riyaale] keenay nabadda.
S: Dadka qaar waxay yidhaahdeen muu isku shaandheeyo golihiisa,
markaa hadii ragga qaar sida Cirro, Cawil iyo wasiirka khaarajiga
haddii la bedleo ina wax ma idinka bedeli lahayd?
J: Ninbaa tagsi yar buu lahaa oo niman macalimiin ah ayuu ugu
shaqayn jiray, tagsigii ayaa ka xumaaday oo uu u geeyey
farsamo-yaqaan, markaasuu ku yidhi waxaan ka bedel oo kan ka bedel,
dabadeed makaanigii oo og ninkani inuu baayacay ayaa isagoo doonaya
inuu iska joojiyo wuxuu ku yidhi gaadhigani in ilaa darawalka la
bedelo ayuu doonayaa, markaa illaa ina Rayaale la bedelo ayey
doonaysaa.
S: Dhinaca kale waan waanta waxa la leeyahay qoloda Kulmiye waa lala
heshiin kari lahaa ee qolodiina Qaran ayaa meesha ku jirta oo la
mari la’yahay, taas maxaa ka jira?
J: Horta KULMIYE mar buuu khalad galay markii uu ka qaybgalay
kordhiskii dabadeed waxay dadku u qabaan inuu khalad kale geli
lahaa, annaga taas baa imika nalagu eedeeyaa, laakiin kulmiye tii
hore ayuu wax ka bartoo isagaa isu soo jeedda. Ta kale ninka
waan-waanta marka la gelayo halkee ayay ku hoyataa? Wasiir kastaa ha
soo wad-wado, ina Riyaale ayey ku hoyanaysaa. Alla ha u naxariistee
Ina Cigaal iyo ninkani [Riyaale] waxay ku kala duwan yihiin, Ina
Cigaal marka laga toosan yahay wuu qaadan jiray, ceebna umuu qabin.
Laakiin aynu wada hadalno ninkani ceeb buu u qabaa, tanaasulkana
fulaynimo ayuu u qabaa, wax kastana waan ogahay buu yidhaahdaa.
Kolkaa waxay doonaanba hawada galeen oo haku wada hadleene nin talo
ka socon karto sidiisaba Riyaale maaha. Ta kale qolada tidhaahda
dhexdhexaadin baanu samaynaynaa ee aan wasiiradiisan iyo ahayn waxa
lays weydiinayaa dadku markuu wax dhexdhexaadinayo wuxuu
dhexdhexaadinayaa laba qof oo is-haysta oo aanu isagu qayb ka ahayn
waxan laysku haysto. Markaa waxaad isweydiinaysaa tallow nimanku ma
Masar bay ka yimaadeen, mise Nairobi, waxa laysku hayaana waa sidii
dalkan loo maamuli lahaa. Markaa waa kelmad iyagaba ku ceeb ah wax
baanu dhexdhexaadinaynaa ee waxay ahayd inay sharciga eegaan oo kii
khaldan yidhaahdaan waad khaldan tahay, ka toosana la saftaan iley
Ajnebi maahee.
S: Qoloda dhexdhexaadinta imika ku jirtaa waa guddidii daba-galka
(monitoring) doorashooyinka oo xubno ka mid ahi dhexdhexaadintii
hore ku jireen iyo Akaademiga oo taas hore soo shaxeeyay, markaa ka
ururka QARAN ahaan iyo ka KULMIYE ahaanba maxaad xal u aragtaan?
J: Aniga ra’yigaygu waxa weeye qoloda Akaadamigu waa dilaaliin,
mushahar ballaadhan bay qaataan, kaas inuu u socdo oo aanu ka
dhammaan bay jecelyihiin doorashana dhicin, hadal-haynteedana aan la
deyn, waa la qaadacayaana aan la odhan ee ay isk socoto uun. Qolodan
kale ee Daba-galka, doorashaba ma dhacayso oo bahalkan Server-ka la
yidhaahdo waa iska cimri-dheeraysi uun ee asalku waxa weeye
wada-hadalkaa Djibouti wado (Somaliland iyo Somalia) cidii ka
qayb-geli lahayd inuu Ina Riyaale noqdo oo aan doorasho dhicin,
waxan kale oo dhami waa xaabadii dabk lagu shidayey.
S: Waa maxay ra’yigaaga ugu dambeeya ee aad dadka u jeedin lahayd?
J: Horta kuwan (xukuumadda) muddadoodii way dhammaatay ee waa in
dadweynuhu isu tago oo dawlad ku-meel-gaadh ah samaysto. Qolodan
wakhtigoodii wuu dhammaaday, Golaha Guurtida wakhtigoodii wuu
dhacay, goleyaasha degaanka wakhtigoodii iyagana wuu dhacay, waxaad
odhan kartaa sifaha aynu maanta ku jirnaa waa qaran baaba’ay oo kale
(Failed State).
Haatuf
|