Wada hadalka Somaliland iyo Somalia: Tab xeeladaysan oo Muqdisho dib
loogu noqonayo (qaybtii 8-aad)
Madaama ay wada hadaladi Somaliland iyo Somalia dib u bilaabmayaan
waxa aan halkii kasii waddi doonaa qoraaladaydii taxanaha ahaa ee
qadiyada wada hadalka aan kaga faaloonayay. Ciwaanka qoraaladaydan
sida aad akhrisateen amma ka dheehan karteen-ba aragti fog oo
foojiggan ayaa keentay oo runtii aynu maantaba arki karno inay
saxsaneyd madaama natiijadii wada hadaladii Somaliland iyo Somalia,
ee hore u dhacay, ay noqotay in addunku u turjumto in ay Somaliland
ka tanaasushay amma ka dabacday qadiyadii madaxbanaanidda sida
wasiirkeena ariimaha dibadu Golaha Guurtida ugu cadeeyay. Hadaba
badilka ciwaanka qoraaladaydani waxa ay ku xidhnaan doontaa jawiga
uu ku qabsoomo iyo natiijada kasoo baxda wada hadalada loo
balansanyay bishan January 15-keeda.
Intaas markaan hordhacaas ku dhaafo, waxa aan halkii kasii
amba-qaadayaa qormooyinkii dam be ee aan ku tilmaamayay dalalkii kala
baxay amma kala go’ay ee inaga horeeyay xaaladaha iyo dariiqooyinka
ay ku kala baxeen. Waxa aan qormaddan kusoo qaadan doonaa South
Sudan (Suudaanta Koonfureed) sidaan hore ugu balan qaaday. Dalka
South Sudan wuxu ka mid ahaan jiray dalkii la odhan jiray the
Republic of Sudan amma jamhuuriyada Sudan oo xoriyadda amma
madax-banaani ka qaadatay dalka Ingiriiska 1-dii January ee
1956-kii.
Kacdoonadii dhaliyay gooni isku taaga South Sudan
Inkastoo ay Somalilanders-ku yidhahdaan South Sudan reer galbeedkaa
dabada ka riixayay ilaa iyo madaxbanaanidii Sudan ka dib, xaqiiqadu
waxa ay tahay in Ingiriiska oo gumaysan jiray dalka Sudan oo South
Sudan iyo North Sudan oo isagu xukummo laakiin kala maamul ah
(administration) oo Khartoum iyo Jubba ay xaruumo maamuleed u kala
yihiin, uu isagu maamul qudha ka dhiggay 1946-kii si uu Masar iyo
markaas Carabtii waqooyiga Sudan daganeyd iyo guud ahaan bariga
dhexe uu dantiisa uga fushado. Mideyntii 2-da maamul markiiba waxa
ay reer Konfureedkii Sudan ku dhalisay dareen aan wanaagsaneyn
madaama aan lagala tashan. Dareenkii wuxu sii xoogaystay oo uu
dhaq-dhaqaaq siyaasadeed oo reer Koonfureedku xaqooda ku raadinayaan
isku badilay markii Ingiriiska iyo Masar heshiis ku gaadheen
1953-kii in Sudan xoriyad la siiyo.
Hadaba dareenkii xaq-duudsiga ahaa ee reer Koonfureedka Sudan qabeen
wuxu dagaal milateri isku badilay 1955-kii ka dib markii la
dhagaysan waayay dhawaaqoodii iyo in Koonfuurta Suudaan maamul gaar
ah loo sameeyo. Dagaalada kala dambeeyay ee xoreynta South Sudan
sababay waxa ay socdeen isku geyn 39 sanadood oo waxa ku naf waayay
dad lagu qiyaasay ilaa iyo labba milyan iyo badh (2,500,000).
Dagaalkii iyo Heshiiskii koowaad ee koonfurta Sudan (1955-1972)
Dagaalkii ugu horeeyay wuxu qarxay sanad ka hor xoriyadii
dalwaynihii Sudan oo waxa dhalata y jabhad la odhan jiray SSLM
(Southern Sudan Liberation Movement) oo uu hogaamiye ka ahaa Joseph
Lagu. Ka dib markii dad shan boqol oo kun (500,000) ahi ku naf
waayeen dagaalkii, jabhaddii Koonfurta Sudan ee SSLM-na xoogaysatay,
dhaqaalihii dalka Sudan-na horumar la’aan lasoo daristay, ayaa
madaxwaynihii Sudan ee wakhtigaas Korneyl Gaafar Nimeiry aqbalay in
uu la xaajoodo jabhaddii SSLM oo dadaal dhex-dhexaadineed oo ay ka
hawl galayeen 2-ba urur oo la kala yidhahdo Golaha Adduunka ee
Kaniisadaha (World Council of Churches, WCC) iyo Kulanka Kanisadaha
Afrika (All Africa Conference of Churches, AACC) ay aqbaleen
xukuumaddii Sudan iyo jabhaddii-ba.
Kulammo badan oo 2-da dhinac yeesheen ka dib, isla markaana
dhex-dhexaadinayeen WCC iyo AACC, waxa ay ku kala saxeexdeen
jabhaddii SSLM iyo xukuumaddii Sudan bishii March ee 1972-kii
magaalada Addis Ababa ee caasimada dalka Ethiopia heshiiska loo
yaqaano Heshiiskii Addis Ababa (Addis Ababa Agreement).
Heshiiskaasi oo soo afjaray 17 sanadood oo dagaal ah, wuxu sababay
in dastuurkii dalkii Sudan la isku odhan jiray la badilo oo markaas
Koonfurta Sudan la siiyo maamul madax-banaan (Southern Sudan
Autonomous Region) ee laakiin ka mid ah dalwaynihii Sudan.
Muddo 11 sanadood ah ayuu heshiiskii Addis Ababa nabad galyo keenay
inkastoo tacadiyadii ay reer Koonfureedku tirsanayeen heshiiskaasi
wada daboolin taasoo sababtuna aheyd dalwaynihii Sudan oo sidiisaba
ahaa dal milateri ka taliyo xasilooneyna. Heshiiskii Addis Ababa
wuxu si buuxda u burburay 1983-kii markii madaxwaynihii Sudan mudane
Gaafar Nimeiry uu amar sharciyeed soo roogay kaasoo uu dalkii Sudan
kaga dhiggay dal sharciyan Islaami ah (Islamic State). Halkaa waxa
ka bilaabmay dagaalkii 2-aad ee sokeeye ee dalkii Sudan oo waxa
samaysmatay jabhaddii la odhan jiray SPLA (Sudan People’s Liberation
Army) ee uu hogaamin jiray John Garung. Waxa xusid mudan in SPLA
aaminsaneyd midnimada dalwaynihii Sudan intii horoo dhan taaso aad
ka garan kartid magaca ay la baxeen.
Dagaalkii labaad iyo heshiiskii labaad ee Koonfurta Sudan
(1983-2005)
Dagaalkan oo 22 sanadood socday wuxu maray marxalado kala duwan iyo
kulanno badan oo la iskugu dayayay in heshiis laga gaadho
dagaalkaas. Waxa xusid mudan in 1986-kii, ka dib markii furfurnaan
siyaasadeed ka hirgashay dalka Sudan oo xisbiyo siyaasadeed ka
hirgaleen, in heshiis ay wada galeen SPLA iyo xisbi la odhan jiray
DUP (Democratic Unionist Party). Heshiiskaasi wuxu dhigayay in la
laalo sharcigii Islaamiga ahaa (Sharia Law) isla markaana la qabto
shirwayne qaran oo Dastuur lagu diyaariyo laakiin waxa diiday
heshiiska in uu ansixiyo Raysal-Wasaarihii Sudan ee wakhtigaas
mudane Sadiq-Al-Mahdi. Taasi waxa ay keentay in xisbigii DUP uu ka
baxo xukuumaddii Sadiq-Al-Mahdi, rajadii SPLA ka qabtay Sudan
midaysana ay halkaas ku hadhay. Dhacdadaasi waxa kale oo ay keentay
inay SPLA taageero siyaasadeed ka hesho qaybihii kalee mucaaridka
ahaa ee Sudan iyo jabhadihii kalee jiray inay is xulafaystaan.
Xooggii milateri iyo kii siyaasadeed ee SPLA gudaha Sudan ka
haysatay waxa soo afjaray Korneyl Cumar Xasan Al-Bashir oo 1989
talada dalkii Sudan kula wareegay af-gambi milateri. Cumar Xasan
Al-Bashir isla markiiba wuxu bilaabay innuu jabhadii SPLA iyo kuwii
kalee jiray-ba kala qaybiyo oo wuxu isticmaalay fikirka awood
sheegashada ah ee kala qaybi si aad u hogaamiso (divide and rule).
Siyaasadaasi waxa ay keentay inay wiiqdo xooggii jabahadii SPLA oo
milatirigii Al-Bashir iyo maleeshiyaad-kii uu kasoo uruursaday
jabhadihii la dagaalamayay waxa ay weerar baaxad leh oo ay qaadeen
July 1992-kii ay gacanta ku dhiggeen xaruumihii fadhiisinka u ahaa
SPLA. Dagaalkaasi waxa uu sababay khasaare baaxad leh waxaana
Koonfurta Sudan dib uga bilaabmay addoonsiga dadka. Taasi waxa ay
keentay in indhaha reer Galbeedka (The West) soo jiidato taageero-na
SPLA ka hesho dalalka bariga Africa ee Ethiopia, Eritrea iyo Uganda.
Intuu dagaalkaasi socday waxa ay dalal badani oo waliba Africa ahi
isku dayeen inay dhex-dhexaadiyaan SPLA iyo xukuumaddii Sudan.
Dalalka Masar (Egypt) iyo Libiya ayaa 1999-kii usoo bandhiggay 2-da
dhinac qorshe dib-u-heshiisineed laakiin waxa ku gacan seedhay SPLA
madaama qorshahaasi meesha ka saarayay ammaba ayna ku jirin in dadka
Koonfurta Sudan ay u madax-banaanaadaan aayo ka talintooda
(Self-determination).
Wuxu dagaalkaasi socdaba waxa ugu dambeyntii ku guulaystay in ay
qorshe heshiis lagu gaadho soo saaraan urur-ka IGAD siiba ay horyaal
ka ahaayeen dalalka Kenya iyo Ethiopia. Waxa magaalada Naivasha ee
dalka Kenya John Garung iyo Cumar Xasan Al-Bashir ku saxeexeen
bishii January ee 2005-tii heshiiska loo yaqaano “Heshiiska
Dhamayska tiran ee Nabadda” (Comprehensive Peace Agreement).
Heshiiskaasi wuxu dhigayay in dagaalku joogsado, ciidamada lakala
gurto, khayraadka iyo tallada la qaybsado afti-na laga qaado dadka
Koonfurta Sudan in ay madax-banaani qaataan iyo in ay kusii jiraan
dalwaynihii Sudan. Waxa xusid mudan in October 2007-dii SPLA
xubnihii ugu jiray xukuumaddii Sudan ay ka baxeen madaama ay
xukuumaddii Al-Bashir fulin wayday qodobo ka mid ah heshiiskii
Naivasha oo ay ka mid ahaayeen in ciidamadii Sudan lagasoo saaro
degaankii Koonfurta. Taasi waxa ay keentay, ka dib cadaadis kaga
yimid SPLA iyo dhex-dhexaadiyaashi xukuumaddii Al-Bashir, in January
2008-dii shan iyo toban kun (15,000) oo ciidan ah lagasoo saaray
Koonfurta Sudan, geedi socodkii heshiiskii Naivasha-na uu
dhamaystirmay 9-kii January 2011-kii markii la bilaabay afti-dii ay
dadka Koonfurta Sudan ku cabbirayeen rabbitaankooda qaranimmo.
Natiijada aftidaasi waxa ay noqotay in 98.83% ay u codeeyaan
madax-banaani oo markaas sababtay in reer Koonfurta Sudan iyagoo
wada ilmaynaya ay u dabaal daggan calan saarka Jamhuuriyada
Koonfurta Sudan 9-kii July 2011-kii.
Su’aashu waxa ay tahay maxay Somaliland ka baran kartaa geedi
socodka amma dariiqyada ay 2-da dal ee Eritrea iyo South Sudan, iyo
dhammaan dalalkii lasoo noqday madaxbanaanidoodu, amma ka go’ay
dalalkay ku jireen, ku gaadheen himiladoodii qaranimo. Khibrada aynu
ka dheehan karnaa waxa weeye, oo udub dhexaad geedigoodaas u ahaa,
waa mitidnimo (determination) iyo qorshe qota dheer oo ay ku
xoojinayeen waxa ay kaga duwanyihiin dalkii iyo dadkii ay ka go’een.
Waxa kaloo aynu dalalkaas iyo guud ahaan taariikhdu-ba markhaati
inooga yihiin in umad dal ka go’day amma ka baxday, oo samaysatay
dal kale dabadeedna magac ulla baxay, aanay dib uga noqon
go’aankoodii qaranimo.
Qormadan gunaanadkeedu wuxu yahay oo aan umadda reer Somaliland kula
dardaarmayaa in jahawareerka siyaasadeed iyo maamul wanaag la’aantu
tushuush inagu furin oo meelo kale la inooga gacan haadin ee aynu
miciinsano mitidnimo iyo midnimo dhexdeena ah waayo taasaa hubaal ah
inaynu guul ku gaadhayno.
La soco qormadda 9-aad iyo natiijada wada hadalka 15-ka January
haddii ilaahay yidhahdo.
Wa bilaahi tawfiiq,
Iid Xasan Aw Muuse,
Somaliland Activist
iidsl@hotmail.com
London
|