Udub-eey Jiilaalba awr
baa dhaamiye Kulmiye iyo Ucid- baa kalkan leh..!
Waxay dadka reer Somaliland ku
maahmaahaan, marka ay dhib iyo dheef-wadaaga is xasuusinayaan ee ay
isku dardaarayaan inaanay cid kali ah uuni waxtarka iyo hawshu u
gaar ahayn ee hadba dhan ama gacan quminteeda laga sugayo ,
maahmaahda tidhaahda '' Jiilaalba awr baa dhaamiye'' , oo loo jeedo
marba ama xiliba waa ku nine (qof-e) adna kaayahaagii waad gashay si
uu ahaaba, ama waad sugaysaa ee ka soo bax xilka ku saaran. Soof
maqaleedkaa gaaban dabadeed hadaan hadaba isha iyo halka aan
binaystay een u socdo yara tafaqsado waxan leeyahay,Udub-eey wax
badan baad qabatay ood qotimsay, wax badan-na waad qabyaysay ood
qumin kari wayday !.
- Udub waxa u qabsoomay.-
Marka aynu Somaliland ka hadlayno intay jirtay ee ay goonida u
taagnayd, waxaynu u kala qaybin karnaa laba qaybood, oo kala ah qayb
ka horaysay samayntii xisbiyada, oo ahayd qaybihii kala guurka iyo
kala miiranka ee aynu ka soo muruxsanaynay dalkii aynu isku jirnay
markii hore ee Soomaaliya, oo ay talada dalka Somaliland iskaga
danbeeyeen, labadii madaxweyne ee dhintay ee, marxuum C/ raxmaan
Maxamad Cali iyo marxuum Maxamad X. Ibraahim Cigaal, oo labaduba
hawl culus u soo qabtay dadka iyo dalka, iyo qaybta labaad oo ah
intii aynu xisbiyada samaysanay oo talada dalku ay gacanta ugu
jirtay xisbiga Udub, hadaba Xisbiga hada talada hayaa waa Udub-e
waxa uu qabtay oo u suurta gashay kuna amaanan yahay arimo badanoo
aad jiritaankeena muhiim ugu ah, sida, ku fidinta maamulka
Somaliland dhulka qaranka hoos yimaada badankiisa, waxa u suurta
gashay oo kale soo celinta xidhiidhka sokeeyenimo ee dalalka aan
jaarka nahay, siiba Jabuuti oo aan hada wax xurguf ahu ina dhex ool,
waxa kale oo u suurta gashay inuu sii dheereeyo dhawaaqeenii ahaa
gooni isu taagista iyo inaynaan marnaba iyo sinaba uga mid noqonayn
dalkii aynu ka midka ahayn ee Soomaaliya iyo weliba doorashooyin
qabsoomay iyo qaar soo dhaw, intaasi waa inta ugu muhiimsan ee lagu
xasuusan doono Xisbiga Udub.
- Udub waxay qabyo-tiri kari
wayday.
Intii ka horaysay samaysanka xisibiyada badan iyo doorashooyinka
waxa dalku ku jiray sidaan hore u soo sheegay geedi, isku
guur-guuris iyo guri yagleel, oo waxyaabo badan ayaan hoos loogu
fiirsanayn ee laga eegayay xaga san iyo danta guud oo la is-lahaa,
waa hayaanka waayahiisa-e ee dhawaan ayaa ay is bedeli oo sidii
heesihii caruurta lagu sabi jiray oo kale ay niyadu ku deganayd oo
ku samayd '' hooyo caano i-sii iyo horta reerku ha dego '' oo la
rajaynayay in marka salka la dhigo ee nabadi timaado, ee heeryada
iyo rarka la furo ee kabaha la iska saaro, ayaa qoonka la dhayi,
qodaxda la iska guri, oo luunka la iska jabin, oo dib loo eegi
cadaabtii la soo maray iyo daalkii, hagardaamidii, oonkii, cabsidii
iwm oo dabadeedna gurigii aynu beri hore ka guurnay ( Somaliland )
inta la yidhaa Haakah iyo xalaaleey ! iyo dhuloow kaama kaco ! si
fiican loo xaadhxaadhan oo onaha laga biin oo meel kasta laga gufayn
oo laga foogo tiri, oo mood iyo nool waxii la haystana si qiimo leh
loo dhaqaalaysan oo lexejeclo badani inaga gali, oo kab iyo karinba
la dhawran, oo xanjo iyo foox la isku dhajin, laguna hamiyi sidaan
uga soo kaban lahayn waxii ina soo maray. Cawodarase waxa ah inaanu
taasi xisbiga Uduh ee talada hayaa marnaba hanan, sababta .....? !
Waa hubaal iyo waxaan la qarin karin in xisbiga talada hayaa ku
sifoobay maamul hanti boobis iyo laaluush hagaasiyay oon hirasho iyo
han jeebkooda dhaafsan lahayn, waxa kale oo uu ku guuldaraysaty inuu
maamul eexlaawe ah oo ku salaysan cadaalad dalka ku hago, oo waxaynu
wada ognahay sida uu garsoorka dalku u liicsan yahay, waxa uu ku
guuldaraysaty inuu dadka ku jaheeyo oo uu u horseedo inay wax
qabsandaan oo ay iyagu isku xisaabtamaan, sida iska wax u qabso oo
kale, oo waxaynu ognahay in dalkeenu uu gacmaha hoos haysto goor
kasta hayado wax kastana iyaga ka sugayao, xataa Biriish- yar oo
dawlada hoose dhisi karto ! ayaa hayad la waydiisanayaa ! waxa kale
oo xisbiga talada dalka hayaa baabiiyay ilo badan oo dhaqaale dalka
ka soo gali lahaa sida dekeda Berbera oo kale, oo dad kale oo wax
kala soo degaa haba kaa maqnaadee xataa muwaadiniintii reer
Somaliland ka wareegeen cashuura qaali ah iyo hanaan xumo shaqada
dekada ah datreed, intaa aan dusha ku sheegay iyo in ka badan ayaanu
xisbigan talada hayaa marnaba ku guulaysan inuu wax ka qabto, waana
qabyo u baahan in si degdeg ah loogu hawlgalo.
- Haatan iyo gabogabo markaynu intaa yaree kooban ee dhaliisha ah
een dusha ku soo sheegay oo kali ah eegno, miyaanay cadayn inaan
bedel u baahanahay oon ku sandulaysnayn inaynu raadino Jiilaalkan
soo socda cid kale oo hagaro dhaanta Udub iyo muur kale oo bulshada
badbaadiya? Allaylehe waxay ila tahay inay gar iyo dawba tahay
inaynu bilkaydino doorkan maanta ah dar cusub oo hor leh ( Kulmiya
ama Ucid ) oo tabtooda, tamartooda, taladooda iyo taagtoodaba iskugu
geeya inay daldalooladaa badan ee naafeeyay qarankeena jiritaankiisa
awdaan..
Somaliland ha
jirto oo ha joogto
Qoraagii
Weynaa:Cali Cumar Xasan |
|