| UDUB UK oo hambalyo u diraya Xukuumadda, Axsaabta Qaranka, Ciidamada JSL iyo Shicibka
Xisbiga UDUB UK waxa uu hambalyo
iyo bogaadin u diraya Xukuumadda, Axsaabta Qaranka, Ciidamada JSL
iyo Shicibka Sanaag sida habsamida ah ee hawlaha Diiwaan galintu uga
socdaan gobalka Sanaag taas oo ka dambaysay go’aankii Xukuumadda
Somaliland ganafka ku dhufatay kagana soo horjeedsatay go’aankii
qaldanaa ee qolooyinka Miisaaniyadda Diiwaan galinta bixinayey iyo
talooyin cid aan xogogaal ahayni ay soo jeediyeen kuna saabsanaa in
layska ilaawo oo aan diiwaan galintu ka dhicin deegaamadii aan
doorshooyinkii hore ee Somaliland ka qabsoomin. Xukuumadda JSL iyada
oo aanay jirin wax dhaqaale ah oo laga helay qolooyinkii bixinayey
inta badan kharashka diiwaan galinta taas oo ka dhigan inay diidan
yihiin talaabadan danta u ah dadka iyo dalkaba ayaa Xukuumadda JSL
ay dusha u ridatay masuuliyadda ah in diiwaan galintu ka dhacdo
deegamadaas , iyada oo ka jawaabaysa tixgalin weynna siinaysa
dareenka iyo baahida bulshada Sanaag Bari taas oo ay soo caddeeyeen
guddiyadii xaqiiqo raadinta ahaa ee hore loogu diray soona maray
dhamaan deegaamadaas kuwaas oo soo xaqiijiyey inay bulshada
deegamaasi doonayaan inay si buuxda oo la mida sida walaalahooda
kale ee Somaliland uga qayb qaataan is diiwaan galinta. Xukuumadda
JSL iyada oo siinaysa muhimadda uu leeyahay gobalku tix galinaysana
deeranka iyo duruufa ku xeeran degaamadaas ayaa waxa dhawaan gaadhay
magaalo madaxda gobalka Sanaag ee Ceerigaabo wafti uu hogaaminayo
K/X Madaxweynaha JSL mudane Axmed Yuusuf Yaasiin halkaas oo ay hore
u sii joogeen Wasiiro ka tirsan xukuumadda JSL iyo Gudoomiyayaasha
Axsaabta Mucaaridka ah oo dhamaantood u jooga dhiiri galin iyo wacyi
galin ku saabsan hawlaha diiwaan galinta oo door muhiim ah ka
qaadanaysa ka midho dhalinta geedi socodka dimoqraadiyadda iyo
dedaalka Ictiraaf doonka ama Aqoonsiga caalamiga ah ee JSL.
Ujeedooyinka booqashada Waftiga Madaxweyne ku xigeenku hogaaminayo
waxaa ka kale oo ka mid ah kormeer guud iyo sidii loo sii adkayn
lahaa heshiisyadii fidinta maamulka Somaliland iyo adeegyada
bulshada ee ay wada galeen April 2007 waftigii uu hogaaminayey K/X
Madaxweynaha JSL mudane Axmed Yuusuf Yaasiin iyo Wax garadka iyo
Hogaamiyayaasha qaybaha kala duwan ee bulshada ku dhaqan deegaanada
Sanaag bari. Madaxweynaha JSL mudane Daahir Rayaale Kaahin ayaa ku
dar dar galiyey Wasaaradaha Maaliyadda , Arrimaha Gudaha,
Gaashaandhiga iyo Hawlaha Guud iyo Guryeynta iyo dhamaan hayadaha
kale dawliga ah ee ku shaqada leh inay siiyaan gobalkaasi tixgalinta
uu mudan yahay. Sidaasi oo kale Xubno ka tirsan Golayaasha
Wakiiladda iyo Guurtida Somaliland, Commissionada Doorashooyinka iyo
Is diiwaan galinta, Axsaabta Qaranka iyo guud ahaan qaybaha kala
duwan ee bulshada ku dhaqan gobalka Sanaag ayaa heegan ugu jiraan in
si nabad galyo ah oo la mid ah ama ka heer saraysa gobaladii ka
horeeyey ay Diiwaan galinta gaobalka Sanaag ku dhamaato. Ugu
dambayntii Xisbiga UDUB UK waxa uu canbaaraynayaa hadalada majaro
habowsan ee xasaradda iyo xaalad abuurka looga dan leeyahay kana soo
baxay Af qudhac iyo Af miinsharada kale ee u adeega taliska
gabalkiisii dumay ee ay shuraakada ku ahaayeen Cabdillahi Yuusuf iyo
Cadde Muuse. Waxaana la xasuusinayaa haddii ay jiraan xubno yar oo
khalad fahamsan in hawshan Diiwaan galinta cidda ugu horaysa ee dani
ugu jirtaa ay tahay dadka ku nool deegamadaas sidaa darteedna waxaa
lagu boorinayaa dadweynaha inay ka faaiidaystaan oo aanay iska lumen
fursaddan qaaliga ah ee lagu siiyey inay is diiwaan galiyaan si ay u
helaan xuquuq la mid ah ta walaalahooda kale ee Somaliland.
|
