Taariikh : 26/11/2012
Tixraac : SSE/Fr – b025 BAAQ
Baaq ku wajahan doorashada Mudanayaasha Golayaasha Deegaanada
Soomaaliland iyo weliba soo saaritaanka saddexda xisbi qaran ee
tobanka sanno ee soo socda:
Dallada SSE oo ay ka bahoobeen jaaliyadaha ama ururada Somaliland ee
Yurub waxay halkan ku muujinayaan kuna bogaadinayaan dhammaan
dhinacyada ay khuseyso ee sida sharaftu ku jirto ku soo gabogabeeyay
ololayaashii tartanka doorashada oo run ahaantii si xasilan ku
bilaabantay isla markaana si degan lagu soo afjaray maalintii Axada
ee 25ka November.
Ururka SSE waxa uu baaqan idinkula qaybsanayaa dareeenka uu ka qabo
doorashada Mudanayaasha Golayaasha Deegaanka ee Somaliland oo loogu
talo galay inay dalka ka qabsoonto maalinta Arbacada ee ay bisha
Novembar tahay 28ka, 2012.
Komishanka Qaranka
Ugu horreyn si diiran ayaanu u soo dhoweynaynaa in Komishanka
Qaranku ay si rasmiya daaha uga faydeen ama si cad u qayaxeen in
dhinacooda wax qabyo ahi aanay ka jirin, oo wax walba sidii loogu
talo galay ay u socdaan. Waa arrin fiican, laakiin doorashada
wakhtigani waa mid aad uga duwan tii toban sanno ka hor dalka ka
dhacdey markii lagu tartamayay golayaasha deegaanka ee maanta jira.
Degmooyinka laga codeynayaa way ka badnyihiin kuwii hore. Waxa kale
oo jirta in wakhtigan loo codeynayo musharaxa oo aan xisbiga loo
codeynaynin. Tirada musharixiinta ma yara oo waa 2368 qof oo ku
tartamaya 353 mansab. Waynu fahmi karnaa sida tartanku u culusyahay
iyadoo weliba ay dheertahay 7 isugu jira xisbiyada iyo ururada oo ku
tartamaya saddexdii xisbi qaran ee saaxada siyaasadda Somaliland ka
muuqan lahaa 10ka sanno ee soo socda. Waa doorasho leh
xasaasiyadeeda iyo hawsheeda oo Komishanka Qaranka xil iyo culeys
gaar ahi ka saaranyahay in ilaa daqiiqada u dambeysa ay wax walba u
dhacaan si hufanaani ku jirto si looga hortago in wax madmadow ahi
ay ku yimaadaan inta lagu gudo jiro wakhtiga doorashada. Ururka SSE
si fiican ayuu u ogsoonyahay mas’uuliyadda miisaanka leh ee idin
saaran laga soo bilaabo qorsheynta iyo hawl-galka hawlaha
doorashooyinka, ilaalinta sumcada doorashooyinka, sare u qaadaida
wacyigelinta, diyaarinta goobaha doorashada iyo wixii agab ah ilaa
laga gaadhayo tirinta codadka iyo ku dhawaaqida natiijada. Dedaal
dheeri ah ayaa la idiink baahanyahay, maadaama aad dhex u tihiin
dhinacyada tartamaya. Ilaahay ayaan idiinka baryaynaa inuu
caddaalada idinku sugo oo aad asiibtaan sida danta dalka iyo dadku
ku jirto.
Xukuumadda
Dallada SSE waxay rumaysantahay in iyadana mas’uuliyad gaar ah oo
aan cid kale saarnayn ay xukuumadda haysato, si qaabka iyo natiijada
doorashadu ugu dhammaato jawi xasilan oo nabdoon. Waxa aanu ku
boogaadinaynaa xukuumadda iyo Golayaasha kale ee Qaranka sida
nabadgelyada iyo xasiloonidu ku jirto ee ay ku soo gabogaboobeen
tartankii doorashada, waana mid Ilaahay loogu mahadiyo. Anaga oo
qadarinayna culeyska iyo hawlaha balaadhan ee doorashada ayaa
Dallada SSE waxay talo ahaan soo jeedinaysaa in:
- Xukuumaddu dhex ka ahaato tartanka doorashada isla markaana laga
dheeraado wax kasta oo abuuri kara farogelin iyo weliba ku takri-fal
si gaar ah waxa ummada u dhaxeeya.
- In aad loo dhowro maamuuska iyo madax-bannaanida Komishanka
doorashooyinka isla markaana si hagar la’aana ay xukuumadda iyo
Golayaasha Qaranku ula shaqeeyaan.
- In laga shaqeeyo xoojinta kalsoonida iyo wadashaqeynta
tartamaaysha doorashada oo labo dhinac ah (tartamayaasha
mudanayaasha Golayaasha Deegaanka iyo soo saarida saddexde xisbi
qaran ee mustaqbalka).
Axasaabta iyo Ururada tartamaya
Tartanka aad ku jirtaan waa mid
loo baahanyahay isla markaana u adeegaya waxyaabaha aynu higsanayno
ee kow ay ka tahay in bulshada caalamku bal mar uun garowshiiyo ka
bixiyaan wanaaga aynu ku soo kordhinay caalamka, gaar ahaan
mandaqada aynu ku noolnahay oo ah mid aan xasilnayn isla markaana
dab iyo dagaal ka ooganyahay. Si heerka dimuqraadiyadeed iyo
furfurnaanta Somaliland ay u hano qaado ayaa loo baahanyahay tartan
si xalaal ah u dhaca. Waxa hubaal ah in aan marnaba la gaadhi Karin
doorasho ku dhacda qaab xor iyo xalaal ah haddii idinka laftiinu
aydaan la iman mas’uuliyadda idin saaran oo ah in tartankiinu uu
noqdo mid toosan oo ka dheer madmadow iyo in la dhaafo ama lagu xad
gudbo soohdimaha loo jeexay si ay wax u hagaagaan.
Dallada SSE waxay Axsaabta iyo Ururada ku tartamaya doorashadan si
xushmadi ku jirto uga codsanaysaa in aan la hilmaamin kaalinta muga
weyn leh ee aad ku leedihiin in la helo doorasho caafimaad qabta oo
natiijadeeda lagu wada calool fayowyahay. Wada shaqeyntiinu waxay
aasaas iyo sees adag u tahay in tartankiinu uu noqdo mid ku dhaca
jawi nabadeed oo xasilan oo taasi maankiina ay ku jirto.
Musharixiinta ku tartamaya Golayaasha Deegaanka ayaa iyagana aanu
xasuusinaynaa in waajibaad balaadhani saaranyahay oo ah inay qaab
caddaalad ku salaysan aad wax ku doontaan isla markaana ka
dheeraataan wax kasta oo wax u dhimaya hab maamuuska iyo nabada
doorashada. Dallada SSE way idinku boogaadinaysaa hanka aad la
timaadeen ee waxa inaga dardaaran ah ku baraarugsanaanta danta guud.
Codeeyayaasha
Dhammaan shicibweynaha reer Somaliland ee ka qayb qaadanaya
coddeynta u tartamayaasha Golayaasha Deegaanka mas’uuliyad balaadhan
oo qof walba lagala xisaabtamayo ayaa garbahiina saaran.
Qof kasta waa ku waajib ilaalinta habsami socodka doorashada si
Somaliland ay uga dhacdo doorasho ku dhacda jawi qurxoon.
Dallada SSE waxay idin xasuusinaysaa inaad u codeyneysaan dadkii
beri qaabayn lahaa nolosha deegaanka aad ku nooshihiin sidii uu
noqon lahaa mid tayo fiican leh ama mid tayo liidata ah. Waa
mahuraan inaad codkiina siisaan musharaxa ku habboon ee leh awood
wax-qabad, mas’uuliyad iyo qof leh astaamaha anshax hufan.
Dardaaranka Dallada SSE waa codkaaga u meel day oo marnaba
gacantaada ha isku gowricin. Ha hilmaamin in Alle kaala xisaabtamayo
codka aad maanta bixinayso oo aad qof mas’uuliyad ku saarayso.
Warbaahinta
Warbaahinta oo door laxaad badan ku leh qaabka iyo nidaamka
doorashadu ku dhacayso ayaa waxa hubaal ah inaad nala
dareensantihiin saameynta xooggan ee aad ku leedihiin bulshada
Somaliland. Waxa aanu rajaynaynaa inaad la timaataan miisaanka loo
baahanyahay inaad ku yeelataan inta tartanka doorashada socdo. Si
xushmadi ku jirto ayaanu idiinka codsanaynaa in warka aad
gudbinaysaana uu noqdo wax la hubo si aanay u dhicin in la fidiyo
war hurin kara khilaaf iyo shaki carqalad iyo culeys ku noqda
habsami socodka doorashada. Dallada SSE waxay idin xasuusinaysaa
karaamada iyo xushmada aad ku leedihiin bulshada reer Somaliland oo
waajibka idink saarani uu yahay fidinta wax hubaal ah 100% ah oo ah
mid salaysan xaqiiqada iyo sida ay wax u jiraan. Waxa aanu ku rajo
weynahay inaad sare u qaadaan wacyiga ummadiina ee la xidhiidha
hawlaha doorashada iyo natiijada ka soo baxaysaba.
Boogaadin
Dallada SSE waxay abaal iyo xasuus gaar ah u haysaa cid kasta oo
taageero iyo taakuleyn la garab istaagay sidii doorashadani u noqon
lahayd mid si guul ah ku dhammaata.
Ugu dambeyn waxa naga dardaaran ah ama xasuusin ah in kii ku
guuleysta doorashada ee ku soo baxa iyo kii laga guuleystaaba ay
seeska u adkaynayaan hoyga jiritaankeena ummadeed. Insha Alla ha
lagu dadaalo in hawshu sugnaan iyo saxar-la'aan ku dhammaato, si
guushu ay u noqoto mid inaga wada dhaxaysa. Ilaahay waxaynu ka
rajaynaynaa inay doorashadani ku dhammaato sida kheyrka iyo wanaangu
ugu jiro Somaliland dadkeeda iyo dalkeedaba.
Alle ayaa mahad leh,
Guddigha fulinta
|