Suldaan
Naasir suldaan Cabdi Ismaaciil oo dhaliilay
xukuumadda Riyaale
Waxa aan
xukuumada Somaliland ku dhaliilsanahay sida daciifka ah ee ay uga
hawl gashay maaraynta mashaqadan, gaar ahaan qaybta sharciga iyo
fullintiisaba:- sidaa waxaa yidhi suldaanka Guud ee Beesha Gabooye .
Hargeysa (Longlivesomaliland News)-Suldaan Naasir suldaan Cabdi Isma
aciil, oo ah suldaanka guud ee beesha Gabooyaha ayaa dhanbaal tacsi
ah u diray ehelada dadkii wax ku dhintay shaqaaqadii dhawaan ka
dhacday deegaanka ceel bardaale. Suldaanka oo u waramay shabakada
wararka ee Longlivesomaliland News, ayaa waxa uu hadalkiisa ku
bilaabay:
“ ugu horayn waxa aan jeclahay in tacsi u dirayo guud ahaanba
shaca bwaynaha reer Somaliland, gaar ahaana eheliyada dadkii ku
dhintay shaqaaqadii dhawaan ka dhacday deegaanka ceel bardaale,
waxaan u soo jeedinayaa labada beelood ee ku dagaalamaya in ay
dulqaad muujiyaan.
Maanta marxalada uu dalku ku
jiraa waa mid xasaasi ah, runtii waxa aad moodaa in doorkii ay
xukuumadu meesha ku lahayd, doorkii Bulshada iyo kii sedexda Xisbi
qaranba uu meesha ka baxay.mashaqadani in ay dhacdo Ilaahaybaa
sababay in ay dhacdo, hasa yeeshee, guud ahaanba masuuliyad ayaa
ummada saaran. Waxa wanaagsan in si dhab ah looga hawl galo xal u
helida mashaqadan. Hadii aan arintaa daacad laga noqonina waxay
keeni doontaa-sida aan u arko, fool xumo wayn oo Qarankan
waxyeelaysa. Waxaanan odhan lahaa ha laga baxo danta gaarka ah oo ha
la eego danta guud. Inkasta oo ay odayaasha reer Somaliland arintan
ay u kaceen, hadana, waxa wanaagsan In dedaalka la libin laabo.”
Suldaan Naasir, waxa uu xukuumada Somaliland Somaliland ku dhaliilay
sida ay arinkan uga hawl gashay “ waxa aan xukuumada Somaliland ku
dhaliilsanahay sida daciifka ah ee ay uga hawl gashay maaraynta
mashaqadan, gaar ahaan qaybta sharciga iyo fullintiisaba. Waxaanu u
soo jeedinaynaa in ay xukuumadu si intaa ka badan ay uga hawl gasho
xallinta dirirtan dhex martay laba beelood ee walaalaha ah.”
Suldaan Naasir Suldaan Cabdi waxa kala oo uu ka hadlay
doorashooyinka soo socda ee dhawaan la filayo in ay dalka ka
qabsoomaan iyo aragtida ay beeshoodu arintaasi ka qabaan,
“ Somaliland Beesha caalamka kama haysato aqoonsi caalami ah, waxa
kaliya ee aynu Ummadaha dunida ka iibin jirnay waa Dimuqraadiyada
iyo xasiloonida gayigeena ka jirta. Waxaad baryahan danbe moodaa In
ay dimuqraadiyadii ay sii dhimanayso oo ay gacmaheena ku dhimanayso.
Taa masuuliyadeedana waxa iska leh xukuumada maanta talada wadanka
haysa iyo Axsaabta Qaranka Somaliland. Xisbiyada siyaasadeed ee
wadankeena waxa aad moodaa in aanay lahayn istaraatijiyad
Siyaasadeed oo ay ku kala socdaan isla markaana ay iskugu diyaarin
lahaayeen In ay galaan tartan doorasho oo xalaal ah. Sideedaba hadii
aanay iyagu madmadaw galinayn Hay’ad ama cid kale oo ina caawisaa
madmadaw ma ay galiyeen. Halka ay wax ka socon la’yihiin ee ay ka
dhaqaaqi la’dahayna waa Xisbiyada. Waxaanan kula talin lahaa
xisbiyadu in ay ka tagaan siyaasadan is hororsiga iyo is jiid
jiidadka ah oo ay u ban baxaan tartan doorasho oo dalka ka qabsooma.
Hay’ada Interpeaca, waa Hay’ad
inoo maaraynaysa dhaqaalaha aynu dunida ka helnay si aynu doorashada
ugu qabsano, inaga ayayna tahay in aynu hawlaheena qabsano iyaguna
ay intaasuun inoo qabtaan, meesha ma taalo wax aynu iyaga ku
canaanano. Anigu ma qabo In komishanka doorashooyinka laga sii
dayriyo oo la saadaaliyo in ay noqon doonaan garsoorayaal xun xun oo
aan bari ina kala saari doonin, sababtoo ah iyaga oo sidan ay maanta
yihiin ka tamar daran, oo ka aqoon liita ayay doorashooyinkii hore
inaga soo saareen oo dalkeena ka hirgaliyeen doorashooyin ka
wanaagsan kuwa ka dhacda qaar ka mid ah dalalka caalamka. Kuwana waa
in aynu wixii khaladaad ah ee ay leeyihiin aynu u asturnaa iyagana
waxa u wanaagsan in ay ka baxaan is haysiga badan iyo is jiid
jiidadka, taasi oo ka dhigi karta in ay shacbigu u arkaan in ay
yihiin meel madhan. Waxana u wanaagsan in ay gartaan masuuliyada ay
ummada u hayaan.”
Suldaanku waxa uu sheegay in ay gabi ahaanba beeshoodu ka maqan
tahay xilalka sar sare ee wadanka inta ay arintu sidaa tahayna
sumcada Somaliland ay beesha caalamka ku leedahay aanay dhamaystirmi
doonin. “Waqtigan waanu u bislaanay waxyaabo badan oo markii hore
naga maqnaa. Taasi oo ay nala qabaan qaybaha kala duwan ee bulshadu.
Sida xaq raadsashadooda. Komishanada heer Qaran oo aanu imika ka
maqanahay xaq baanu u leenahay in anagana nalagu daro oo aanay noqon
in Beelaha Isaaq iyo Samaroon ay is xaq siiyaan oo kaliya, inta ay
arintu sidaa tahayna aanu qarankani talaabo qaadaynin. Anagu cusbo
ayaanu nahay, cusbaduna waynu ognahay sida ay cuntada muhim ugu
tahay.”
Longlivesomaliland News Desk
Hargeisa Somaliland
|