Somaliland oo markii u horaysay lagu soo ban
dhigay qalab si fudud Hawada uga samaynaya
Biyo iyo qaabka loo adeegsanayo
“ Hawada ka Cab”
Hargeysa (Longlivesomaliland
News)-Munaasibada furitaanka qorshahan cusub oo Maanta lagu soo
bandhigay huteelka imperial ee magaalada hargeysa, waxa kasoo qayb
galay masuuliyiin ka tirsan xukuumada Somaliland, culimaadiin,
aqoonyahano dhakhaatiir iyo dadweyne kale, waxaana ugu horayn
furitaankii munaasibada aayado quraan ah ka akhriyay la taliyaha
sharciga ee golaha wakiilada Sheekh Axmed Cali kaahin oo ku
tilmaamay talaabada qorshahan la doonayo in lagaga hirgeliyo
Somaliland mid faaido weyn u leh bulshada, maadaama ay biyuhu yihiin
baahida ugu weyn ee maanta dunida ka jirta, isla markaana aanay
la,aantood suurta gal ahayn nolosha aadamaha, xayawaanka iyo
deegaankuba.
Sheekh axmed waxa uu ku sifeeyay qorshahan mid baahi weyn loo qabo,
iyadoo la ogyahay in dunidu maanta ka cabsi qabto dagaalo ka dhasha
dhinaca biyaha, isla markaana uu ganacsiga noocan oo kale yahay mid
ay dadka sameeyaa ajri iyo xasanaad ka helayaan, maadaama uu yahay
wax ay bulshadu u baahtahay.
Marwo Shukri Aadan jaqaf iyo ifraax cumar hadraawi oo ah haweenka
qorshahan oo loogu magacdaray “Hawada ka cab” ku soo kordhiyay
Somaliland,waxa magcooda ku hadlay Maxamed Axmed oo qoraal kooban oo
uu ku iftiiminayo ujeedada qorshahan munaasibada ka akhriyay,
wuxuuna yidhi,
“ Ma u baahanahay inaynu helo Biyo nadiif ah oo aynu Hawada ka cabno?.
Hadii ay jawaabtu tahay haa, waa inaynu ka faa,idaysano fursadan oo
ah qaabka horumarka dhinaca sayniska iyo tignoolijiga laga gaadhay
ee mishiinada hawada dusheena kasoo nuugaya Biyaha, kuwaas oo
caafimaad ahaan iyo nolol ahaanba wax weyn ka taraya dhibaatooyin
badan oo caafimaad oo mujtamaca aduunku kala kulmeen biyaha aan
filtargayasnayan iyo biyaha aan nadiifta ahayn ee ay cabaan oo
sababay inay galaaftaan xaalada caafimaad ee noloshooda malaayiiin
qof oo dunida ah.
Qaar badan oo ka mid ah bulshooyinka dunidu ma helaan biyo ku filan
oo nadiif ah, iyadoo aynu ognahay inay sanadii u danbeeyay dunida
soo foodsaartay cabsi iyo wer-wer laga qabo in dagaalka sadexaad ee
dunidu noqdo mid biyaha ka dhasha, isla markaana saadaasha noocaa
ahi tilmaantay dalal badan iyo dadyow sanadaha soo socda laga cabsi
qabo inay biyo la,aani soo food saarto.
Hadba Somaliland oo la rumaysan yahay inay ku jiraan dhulka
hoostiisa biyo badan oo mudooyinkan ku filan, waxa jirta in aanay
bulshooyinka magaalooyinka ku nool iyo kuwa reer guuraaga, ama
dhulka miyiga ahi helin biyo ku filan, iyadoo ay yar yihiin inta
hesha biyo nadiif ah oo ay cabaan, taas oo xaalada caafimaad iyo
nolosha bulshadaba ku yeelatay saamayn.
Si hadaba culayska iyo cidhiidhiga keenaya biyo yaraanta loo yareeyo,
isla markaana loo helo biyo nadiif ah oo aanay biyaha ku kaydsan
dhulka hoosena gabaabsi inoogu noqon , waxaanu qorshaynay in la helo
biyo nadiif ah oo safaysan oo laga dhalinayo hawada, kuwaas oo wax
ka taraya dhibaatooyinka biyo yaraanta iyo helitaanka biyo nadiif ah
oo xaalada bulshada ee dhinaca caafimaadka iyo nolosha wax ka taraya.
Qaabkan soo nuugista biyaha cirka oo magaciisu yahay hawada ka cab,
waa kii ugu horeeyay ee noociisa ah ee Somaliland yimaada, waxaana
ku rajaweynahay inuu xaalada nolosha caafimaadka iyo baahidii biyaha
nadiifta ah ee bulshada wax weyn ka bedeli doono. Qorshahan wuxuu si
gaara fursad ugu yahay Huteelada waaweyn, xafiisyada, goobaha
ganacsiga ee kale, guryaha iyo inay bulshadu uga faaidaysato wax soo
saar ganacsi oo dhinaca biyaha safaysan ee hawada oo kuu suurta
gelin kara hab casriya oo aad uga ganacsanto biyaha adigoo
isticmaalaya hadba heerka awoodaada dhaqaale ee kuu saamaxaya
mishiinka aad u baahantahay iyo xadiga inta litir ee uu soo saarayo
maalintii.”
Sidoo kale Sarkaal ka socday dalka India oo hirgelinta dhinaca
farsamada ayaa munaasibada ku soo bandhigay muuqaalo iyo qoraalo ka
waramaya habka qalabkan hawada loogaga dhalinkaro Biyo, iyadoo la
adeegsanayo qalabka mishiinada oo wax soosaarkoodu kala duwanyahay
iyo awooda mishiin waliba u leeyahay inuu soo saaro maalintii oo
biyo safaysan oo nadiif ah, isla markaana wuxuu dadkii munaasibada
kasoo qayb galay usoo hor dhigay biyihii uu sameeyay mishiinka
goobta yaalay, taas oo qof walba ku dhiiri gelisay inuu cabo,
wuxuuna sheegay in qorshahan iyo hidisahani yahay mid dunida ku
cusub oo wadamo yar oo dunida ah ka hir galay.
Wasiir-Dawlaha Caafimaadka Somaliland Axmed Cali Shire oo hadal
kooban ka jeediyay halkaa ayaa ku tilmaamay talaabada qorshahaa mid
wax weyn ka tari kara baahida biyaha ee ka jirtay Somaliland, isla
markaana uu suurta gelinayo inay dad badani lasoo baxaan biyo nadiif
ah oo ay cabaan.
Sidoo kale, waxa isaguna halkaasi hadalo ka jeediyay Wasiirka
Duulista iyo Hawada Sare Cali Maxamed Waran-cade oo aad uga
sheekeeyay sida uu ula dhacsan yahay qorshan cusub oo uu sheegay in
ay Bulshada wax wayn u tari doonto. Waxa uu wasiirku u ku dhiiri
galiyay in ay Isticmaalaan Adeegan Cusub Xafiisyada Dawlada,
Huteelada iyi Guryuhu.
Cali Maxamed Warancade, wasiirka Duulista Hawadu, waxa uu Madasha ka
balan qaaday in uu noqon doono qofka ugu horeeya ee Isticmaala.
Adeegan Cusub ayaa ah kii ugu horeeyay Noociisa oo Dalka laga
hirgaliyo. Hadii lagu guulaystana waxa uu noqon doonaa mid wax wayn
ka tara Baahida Biyo La’aanta ah ee Dalka ka jirta.
Mustafe Abdikariin Ali (Mustafe Future)
Longlivesomaliland News Reporter
Hargeisa/Somaliland
mccfuture@hotmail.com
|