Somaliland Oo Lagu Soo Bandhigay Lafaha Xoolaha Oo Laga Sameeyey
Qalabka Haweenku Isku Qurxiyaan
Mashruucan ah in lafaha xoolaha laga sameeyo agab la isticmaalo ayaa
waxa maal gelisa y........
Hargeysa (TNN)- Wasiirka xanaanada Xoolaha Somaliland Dr.Cabdi Aw
Daahir ayaa maanta u furey 80-hablood tababar ku saabsan sidii
lafaha xoolaha looga sameyn lahaa, Sabuunta, qalabka haweenku isku
qurxiyaan,sida Silsiladaha qoorta la gashado, Shuuliyada gamacmaha
la gashado, Dhagaha, Far-gallo, Saabuun ay u bixiyeen Bilan Soup iyo
waxyaabo kale oo bilic ah, iyo muqumad la cilmiyey sida weel iyo
waxyaabo la mid ah ayaa maanta lagu qabtey xarunta hay’ada SOMDA ee
Magaalada Hargeysa
Munaasibada furitaanka tababarka ayaa waxa ka soo qeybgalay Wasiirka
Wasaarada Xanaanada xoolaha Somaliland Dr.Cabdi Aw Daahir,
Xildhibaan Axmed Maxamed Diiriye (Nacnac) oo ka tirsan Mudanayaasha
Golaha Wakiillada Somaliland, Xildhibaan Yuusuf Kirix oo ka tirsan
xildhibaanada Golaha deegaanka Hargeysa, La-taliyaha madaxweynaha ee
arrimaha dhalinyarada Somaliland Cabdinajax Siyaad Aw
Cabdi,Xoghayaha Gobolka Maroodijeex Xamse Ciise Cabdi,Madaxa hay’ada
FOA Maxamed Jaamac iyo marti sharaf kala kale.
Mashruucan ah in lafaha xoolaha laga sameeyo agab la isticmaalo ayaa
waxa maalgelisay FOA iyo hay’ado kale, waxaana dhiirigelisay inuu
horumaro xukuumadda Somaliland.
Xoghayaha hay’ada Somaliland Meat Development (SOMDA) Siciid
Ibraahim Faarax oo halkaasi ka hadlay ayaa waxa uu u mahad-celiyey
dhamaanba masuuliyiintii ka soo qeybgalay furitaanka tababarka,
waxaanu yidhi “Waxaanu maanta halkan u joogna inaanu bilowno
tababarkii hore u socday ee ahaa wax soo saar dalka ku cusub oo ah
lafaha xoolaha oo laga sameynayo Saabuun iyo jewelrys ama waxyaabaha
dumarku isku qurxiyaan”
“Maanta waxaad arkeysaan Saabuuntii iyo qalabka ay dumarku isku
qurxiyaan waxaananina waxay ka soo baxeen alaab markii hore xashiish
ahaan jirtey,waana qalab aynu dibada u dhoofin karno waxa
waddankeena ka soo hadha, waxaanu hay’ad ahaan balanqaadaynaa inaan
fursadaa lumin doonin ee sida la rabo uga faa’iideyn doono dalka iyo
dadka Somaliland-ba.”Ayuu yidhi Siciid Ibraahim Faarax
Xoghaye Siciid Ibraahim Faarax Waxa uu mahadnaq balaadh u jeediyey
Madaxweynaha Somaliland Md.Axmed Maxamed Maxamuud (Siilaanyo) iyo
Madaxweyne Kuxigeenka Cabdiraxmaan Cabdilaahi Ismaaciil (Saylici),
isaga oo arrinta ka hadlayana waxa uu yidhi“Xukuumadda Somaliland
talaabooyinka geesinimada leh ee ay ku dhiiri gelinaysay in
mashruucani guuleysto waxay noqonayaan kuwo aanan weligayo ilaabin
doonin. Waxa tababarkan ka qeybgeli doona ardey dhan 80-qof, waxaanu
u socon doona muddo 12-bilood ah sida uu qorshuhu yahay oo bil bil u
kala qorshaysan. Waxa kale oo jira sida alaabtan loo sameeyey waa
aqoon iyo tacliin dalka u soo korodhay, maaddaama oo ay waxbasho
tahayna waxa qasab noqotay in Manhaj loo sameeyo, Hay’adda FOA waxay
naga aqbashay inay manhajkaas diyaariso oo dhawaan isagana la soo
bandhigi doono, Khabiirradii u yimina ay shalay uun dalka dib uga
laabteen, isla markaana ay daraasad iyo xog ururin sameeyeen,
annaguna wixii aannu ku kordhin karaynay ku kordhinnay, waxaana
markay ka soo baaraan-degaan dib loogu soo celin doonaa
Jamhuuriyadda Somaliland, waxaan idiin sheegayaa inaan Manhajkaasi
dalalka Afrika ka jirin siday noo sheegeen Khoboradu.”
Siciid waxa uu sharraxay inay Lafaha Geela, Geesaha Lo’da iyo Adhiga
ay ka sameeyeen waxyaabaha Dumarku isku qurxiyaan oo dhan, sida
Silsilada qoorta la gashado, Shuuliyada gamacmaha la gashado,
Dhagaha, Far-gallo, Saabuun ay u bixiyeen Bilan Soup iyo waxyaabo
kale oo bilic ah, sida weel iyo waxyaabo la mid ah, kuwaas oo uu
xusay inay dhinacyo badan horumar u leedahay, sida wax-soosaarka
dalka, nadiifinta Lafaha oo Xashiish laga dhigi jiray oo la qubi
jiray iyo waxyaabahan oo dalka dibeddiisa laga keeni jiray.
Xildhibaan Axmed Maxamed Diiriye (Nacnax), oo ka tirsan Mudanayaasha
Golaha Wakiillada Somaliland, ayaa isaguna xafladdaa ka hadlay,
waxaanu yidhi; “Aad iyo aad baan maanta ugu faraxsanahay wax-soosaarkan
Hay’adda SOMDA soo bandhigtay, inaynu ka faa’iidaysanno Neefka
xoolaha ah oo aynu hore Xoolaha marka aynu Caanaha ka maalno, ee
Cadka ka cunno Lafaha waynu daadin jirnay waxa laga sameeyey
waydinkaa arkaaya, wax aynu adduunka u suuq-geyno (u dhoofinno) ayaa
laga sameeyey, Badhannadii baa ka dhiman ee iyagana waa laga samayn
doonaa haddii Illaahay yidhaahdo, waxa iyaguna dhiman Uuska iyo
Dhiigga oo aynu daadinno in waxyaabo badan laga samayn karo oo xataa
la shidan karo. Hay’adda hawshan samaysay iyo cidda ka taageertay-ba
aad baan ugu mahad-naqayaa, waxaynu maanta dadka tusaynaa sida aynu
uga faa’iidaysannay Neefkeenna Xoolaha ah, Illaahay iyo dadkii
hawshaa galay ayaa mahad leh.”
Xildhibaan Nacnac waxa uu u soo jeediyey dhalinyarada Haweenka ah ee
tabobbarka maanta loo furay inay ka faa’iidaystaan aqoonta la
siinayo, isla markaana Macallimiinta ttabobbarka bixinaysa oo
Keniyan ah kala hadhaan aqoonta, goor dhawna iyagu noqdaan kuwo
aqoontaa dufcadaha ka dambeeya ugu gudbin karaan.
Sidoo kale, waxa isaguna halkaa ka hadlay Madaxa Xafiiska Somaliland
ee Hay’adda FOA Maxamed Jaamac,waxaanu yidhi; “Waxaan u
mahad-naqayaa sidii ay Wasaaradda Xannaanada Xoolaha Somaliland noo
garab-gashay ee ay nooga aqbashay inaannu barnaamijyo badan oo kani
ka mid yahay ka hirgelinno dalka. Waxa kale oo aan u mahad-naqayaa
sida dedaalka leh ee xarragada leh ee ay SAMDA ugu dedaalaan inay
barnaamijkan ka midha-dhaliyaan, Macallimiinta Keniyanka ah ee
tabobbarrada bixinaya iyo Hay’adaha dawladiga ah ee barnaamijkan ka
qayb-qaatay inuu hirgelo iyo Khoborada Hay’adda FOA, waxaanan odhan
lahaa halkaa halaga sii wado dedaalka.”
Badhasaabka Gobolka Hargeysa ayaa isaguna kulankaa ka hadlay, isla
markaana aad ugu hambalyeeyey Hay’adda SOMDA iyo cid kasta oo ka
taageertay qabashada tabobbarkan 80-ka xubnood loo furay iyo wax-soosaarka
muhiimka ah ee ay dalka ka samaysay Hay’addani.
La-taliyaha arrimaha dhalinyarada ee Madaxweynaha Somaliland
Cabdinajax Siyaad Aw Cabdi, ayaa u mahad-celiyey cid kasta oo ka
qaybqaadatay in barnaamijkan dalka laga fuliyo, isla markaana wax-soosaar
fiican sameeyeen. Waxaanu sheegay in Qaran kastaa ku faani karo wax
soo-saarka dalkiisa, waxaanu xusay inay wax fiican oo horumar ah
maanta soo bandhigeen Hay’adda SOMDA. La-taliyuhu wuxu intaa ku
daray inay aad u dhiirrigelinayaan Ururka SOMDA inay dedaalkooda sii
wadaan, maaddaama oo ay wax guul, wax-soo-saar iyo dakhli-kordhin ah
dalka ka sameeyeen.
Gabo-gabadii Xafladdaa waxa soo xidhay Wasiirka Wasaaradda
Xannaanada Xoolaha Somaliland, Dr. Cabdi Aw Daahir Cali, waxaanu
sheegay inuu aad ugu faraxsan yahay in mashruuc sidan u qiimo badan
dalka laga hirgeliyo. Wasiir Cabdi Aw Daahir, waxa uu yidhi; “Waxaan
aad iyo aad u hambalyeynayaa cid kasta oo ka soo qaybqaadatay
mashruucan dalka, dadka iyo qoyska-ba faa’iidada badan ugu fadhiya
mahad ballaadhan baan u jeedinayaa. Runtii waa hawl la isugu tagay,
wax kasta oo la isugu tagaana wuu hirgalaa. Halkan maanta waxa innoo
yaalla waxyaabihii laga sameeyey Lafaha Xoolaheenna ee aynu tuuri
jirnay.”
Wasiirka Xannaanada Xoolaha Somaliland mar uu ka hadlayey muhiimadda
barnaamijkani waxa uu yidhi; “Lafahaasi markii hore laba dhibaato
ayey innagu hayeen oo qashin bay ahaayeen meesha lagu daadiyo loo
bixiyo lafoolay, lafa-badan iyo wax la mid ah, iyo in kharash
innagaga baxo ururintooda. Waxa uu yidhi Khabiirku waxa sannadkii
wax-soosaarka Lafaha ka soo xeroon kara dakhli dhan 150,000 (boqol
iyo konton kun) oo Doollar, awal horena waxa dhacayey in hawsha
ururinta iyo soo daadinta ay ku baxaysay 150,000 –kaa kun ee
Doollar.”
“Anigu waa markii saddexaad ee aan imi kulan SOMDA qabatay, maalinba
maalinta ka dambaysana waxaanan hore ugu arag ayaan ku arkaa, markaa
waxa ii muuqata inay xagga horumarka iyo wanaagga u sii jeeddo,
maalintii aan furay, maalintii labaad iyo maanta faraq aad iyo aad u
wayn baa u dhexeeya, markaa waxaan ku dhiirrigelinayaa inay dedaalka
halkaa ka sii wadaan, aad iyo aadna waan ugu mahad-naqayaa, cid
kasta oo adduun, arrin iyo gacan ka geysatay hirgleinta mashuurcan.”
ayuu yidhi
Wasiir Cabdi Aw Daahir. Waxaanu ballan-qaaday in Wasaarad ahaan
iyaga oo matelaya Xukuumadda Madaxweyne Siilaanyo ay Hay’addan iyo
cid kasta oo wax sidan u fiican qabanaysa ay hiil iyo hooba isla
garab-taagaan.
“Maanta munaasibaddan waxaynu u furaynaa dhalinyaro Hablo u badan oo
tabobbarkan ka qaybqaadanaya si ay iyagu u beddalaan berrito ay
halkay innoo joogaan Macallimiintan reer Kenya iyagu innoo fadhiista
oo beddela, oo iyagu kuwa ka dambeeya tabobbara, oo magaalada isku
ballaadhisaan, gobollada kale gaadhaan, degmooyinka tagtaan halkii
aad Hargeysa oo keliya maanta ku kooban tihiin laba sannadood ama
saddex sano ka dib, Tuulo kasta oo Muqumad iyo Lafo-yaallaan aynu ka
helno wax-soo-saarkan fiican ee Dumarku isku qurxinayaan, Saabuunaha
iyo wixii la mid ah.” Sidaa ayuu yidhi Wasiirka Xannaanada Xoolaha
Somaliland, Dr. Cabdi Aw Daahir.
Waxaanu Wasiirka oo hadalkiisa sii wataa intaa ku daray oo uu yidhi;
“Markaa, waa inaad waxa la idin baro fikir ku kordhisaan, oo taniba
fikir bay ka dhalataye inaad wax ku kordhisaan, isla markaana aanay
duruus aad qaadataan uun noqon aqoontani ee aad ficil u beddashaan,
waxaanan Illaahay ka baryayaa in Illaahay idiin fududeeyo tabobbarka
maanta idiin bilaabmaya.”
Timacade News Desk
Hargeysa , Somaliland
|