Siilaanyo iyo Riyaale waxaan kula talinayaa inay Xasuusta dib u celiyaan!

Waxan salaanta islaamka u dirayaa dhamaan shacabka Somaliland ee jecel nabadda iyo xasiloonida.

In badan ayay Gacantu ka maagtay inay Qalinka soo qaadato,qalbiguna diiday inuu qoro qadiyadaha qalafsan,xeeladaha xargagan ee Kooxo loo yaqaano Siyaasiyiin iyo Mujaahidiin ay caadaysteen inay hadba Wejiyo kala duwan Shacabka la soo hor fadhiistaan,maanta se gacanta qaban kari waayay,qalbiguna xejin waa xanuunka ay weli xulufadii xumaanta ku bahawday hadba ay shacabka xero ugu oodayaan.

Muran kama taagna inuu Mudane Silaanyo yahay oday siyaasada muddo dheer soo dhex dabaashay,maamulkii looma aayaan ee S.Barre waxuu ahaa wasiirka dhaqaalaha,waxaanu noqday mucaarid,ururkii SNM waxuu ahaa gudoomiyihii ugu muddada dheeraa,dhibaatooyinkii ugu xumaa ee soo mara SNM-na mudadaasay dhaceen,berigaa waxa ururka ka dhex
abuurmay qaybsanaan iyo iska hor-imaad u gaar ahaa saraakiishii dagaal gelinta iyo Silaanyo,isagoo mucaarid ah ayaa dalka la soo galay,dawladii Marxuum M.I.Cigaal-na wasiir ayuu ka noqday,waqtigaasi dalka waxa ka qarxay dagaaladii ugu qadhaadhaa ee sokeeye,kaas oo ahaa aar-goosi iyo cadaawad raagtay oo soo ifbaxday,waa tii ragg maanta la tix geliyo
loona yaqaano mujaahidiin ay lahaayeen "Anigoo dagaalami kara duco qaadan maayo", gaar ahaan M.Biixi ayaa laga hayaa ,taariikhdu ma tiranto.Siilaanyo kooxdaas ayuu markaana ka mid ahaa.Shacabkana waatii loo kala qaybiyay maryo-alool iyo maleeshiya.Markaana Siilaanyo dagaalkii sokeeye dabadii waxuu noqday mucaarid.

Mudane Siilaanyo isagoo mucaarid weli ah waatii dalka laga curiyay nidaamka xisbiyada badan,kuna guulaystay ayaamihii ugu danbeeyay diiwaan gelista xisbiyada inuu curiyo xisbiga maanta uu ka yahay gudoomiyaha ee KULMIYE. Tartankii ka dhaxeeyay xisbigiisa iyo xisbiga uu hogaamiyo Riyaale waxuu ahaa uun laba xaq daro ku heshiisay,xaqay ku coloobaan, labada ururba waxay ka abuurmeen kooxdii maryo alool. Inkastoo Silaanyo lagaga guulaystay hadana si adag ayuu ku qaatay go´aankii maxkamada,welina waa mucaarid balse Riyaale oo ay isku kooxdii maryo alool ka wada tirsanaayeen ayuu shacabka indhahooda damcay inuu rinji mariyo,yidhaana: labadayadan maryo alool anigaa idiin roon ee isoo daba gala,guri barwaaqo ah ayaan idiin ogahaye!

Dhacdooyin badan oo aan isoo joogay kuna saabsan Silaanyo iyo kooxdiisa mujaahidiinta lagu sheego ee maanta u kala fadhida labada garab ee Kulmiye ayaanan jeclayn inaan maanta halkan ku soo qaado.Balse way iman doontaa maalin aan taariikhda dib u raaci doono hadii hab socodka siyaasadeed ee Kulmiye iyo Udub waxa laga bedelin.Hala dhawro himilooyinka sinnaansha shacabka Somaliland.

Hadaba Silaanyo iyo ina Riyaale ma waxay u haystaan shacabku inay aqoon la´aani xero ugu dabartay,inaan labadooda midnaba shacabku xiiso u hayn inay dalka hogaamiyaan sannadaha soo socda miyaanay ogayn. Mise xaalkoodu waa wanka ilaa la gawraco indhihiisu cirka ma arkaan. Shacabku waxuu xeerinayaa jiritaanka,nabadda iyo xasiloonida ee Riyaale-na muddadaa looma adkaysteen, Silaanyo-na maanta muu hungureeyeen inuu madaxweyne isu taago!

Silaanyo iyo Riyaale waxan kula talinayaa inay xasuusta dib u celiyaan, dalka iyo shacabkana u tudhaan, kana foo jignaadaan rabshado iyo xasilooni darro inay shacabka dib ugu soo xambaaraan.
 

Hadaan nabad, xasilooni iyo horumar doortay oo aynu ku heshiinay, kumaan talo gelin caddaalad darro,caga-juglayn, cabudhin iyo kursi midabbo loo yeelo iyo xaq-darro lagu xeeleeyo tartanka hogaaminta dalka.

Somaliland ha jirto.

Hussein Badmah
Köln,Germany
hargeysawi2001@yahoo.de