Sheekh
Xasan Aweys Oo Ka Hadlay Qaraxyadii Hargeysa
Guddoomiyaha isbahaysiga dib u
xoraynta Somaliya, gaar ahaan garabka Asmara Sheekh Xasan Daahir
Aweys, ayaa daboolka ka qaaday aragtidiisa ku waajahan qaraxyadii 29
Oktoobar, 08 ka dhacay magaalada Hargeysa ee lala beegsaday
Madaxtooyada, Somaliland, Xafiiska Itoobiya iyo xarunta hay’adda
UNDP ee Hargeysa.
Xasan Aweys, oo isaga oo ku sugan magaalada Asmara ee wadanka
Ereteriya, xalay waraysi gaar ah siiyay wargeyska Geeska Afrika oo
Telefoonka kula xidhiidhay, waxa uu sheegay inaanu raali ka ahayn
weeraradaas, isaga oo xusay inaanu ururkiisuna ku lug lahayn.
Waraysigaas uu Geeska Afrika, la yeeshay Xasan Daahri Aweys, waxa uu
u dhacay sidan:
Sidee ayaad u aragtii weeraradii foosha xumaa ee dhawaan ka dhacay
magaalada Hargeysa, kuwaas oo lala beegsaday Madaxtooyada, Xafiiska
Itoobiya ee Hargeysa iyo xarunta hay’adda UNDP?
Walaaloow, waxyaabahaas (Qaraxyadaas) way dhici kartaa in annaga la
nagu soo leexiyo, laakiin wax shuqul ah oo aanu ku leenahay ma jirto.
Shakhsi ahaana waxyaabaha noocaas ah ma jecli sida runta ah, waayo,
waxyaalaha dad iska jooga oo aan waxba galabsan dhibaya, markay
cadowga tahay waa ka gaar oo cadowga waanu la dagaalanaa oo
waxyaabaha loo isticmaalo waa ka mid, laakiin ummadii aan dambiga
lahayn iyo dadkii maganta ahaa Diin ahaan in la ilaaliyo weeye,
maaha in iyaga la dhibo, markaas in loo isticmaalo wixii cadowga loo
isticmaalayay munaasib ilama aha, dadka waxaas samaynayana ma
garanayo waxay ula jeedaan. Sidaas daraadeed annagu waxyaabaha
noocaas ah shuqulna kuma lihin, raalina kama nihin.
Cidda falalkan samaynaysaa maxay kuula muuqdaan, maadaama oo ay
dhibayaan dad aan waxba galabsan oo ay galaafanayaan naftoodii?
Way dhici kartaa in dadku iyagoo is leh wax wanaajiya inay wax
biiyaan, laakiin wixii wax biinaya cidna laguma waafiqi karo.
Somaliland oo nabad ku naaloonaysa, oo xiitaa hoy u noqotay dad
badan oo ka soo qaxay dagaalada Somaliya, in la soo weeraro sidee
ayay kuula muuqataa?
Meesha amniga ah in amniga laga qaado annagu kolayba ma qabno,
meeshii aanay hadda dhibi ka jirina in dhib la geliyo ma wanaagsana.
Dadkii qaraxyadaas ku geeriyoodayna tacsi ayaanu gaadhsiinaynaa,
illaahayna bedel khayr qaba ha siiyo.
Xilligii ay Maxkamaduhu awoodda lahaayeen, waxa jirta hadal la
sheego in lagaa soo xigtay oo ah inaad tidhi ‘Dadka Somaliland waxay
caabudaan Sanam nabad la yidhaahdo.’ Hadalkaasi horta ma jiray
wakhtigaas?
Warar badan oo la sheego waxba kama jiraan, warkaasna maba odhan
aqaano, wararkaygana ka mid maaha, markaas anigu maan odhan
hadalkaas.
Sheekh Shariif, waxa uu nidar ku maray oo uu ku hawlanyahay inuu
hirgelin doono heshiiskii xabad joojinta ahaa ee uu dhawaan la galay
dawladda Cabdillaahi Yuusuf. Adiga aragtidaada heshiiskaas iyo xabad
joojintaasi ma hirgalaysaa?
Inta cadowgu dhulka ku jiro qofna ma odhan karo xabadda waa la
joojinayaa, xataa haddii uu Madaxweyne yahay ma odhan karo waa la
joojinayaa, markaas cadowgu haddii uu wadanka ku jiro, xiitaa dad
aanu dagaalku waajib ku ahayn sida dumarka iyo carruurta ayuu ku
wada waajibayaa. Markaas waxaasi wax soconaya maaha, xabad la
joojinayaana ma jirto.
Source: Wargeyska Geeska Afrika
|