Sheekh
Aadan-Siiro Oo Ka Digay Isbedel Khalkhal keena
Sheekh Aadan Xaaji Maxamuud
Xiirey (Aadan-Siiro) oo ka mid ah culima da wadanka ayaa bulshada
Somaliland ugu baaqay inay ilaashadaan nabadgelyadooda, maadaama oo
lagu jiro xilli xaasaasi ah.
Sheekh Aadan-Siiro, oo hadal ka jeediyay xaflad ay siyaasiin
mucaarad ahi hadal ka jeediyeen oo shahaadooyin lagu guddoonsiiyay
arday ka qallin jebisay Machadka Nuuradiin, waxa uu sheegay inay
bulshadu ka soo horjeedo isbedel nabadgelyada dhaawac u gaysta.
“Kalmada aan ku soo khatimayaa waxa weeyaan nabadgalyadeena aynu
ilaashano, waxa maanta lagu tartamayaa oo aan Axsaabtana ku
waaninayaa waar nabadgalyada yeynaan cudur ka qaadin, isbadal wixii
hore ee la hayay wax ka badalaya gabi ahaantii waynu ka soo
horjeednaa, isbadal nabadgalyada waxyeelaya waynu ka soo horjeednaa,
cid alla cidii doontaa ha wado magaca uu doono ha yeesho, markaa
dadka waxaan ku waaninayaa waar nabadgalyada aynu meel uga soo wada
jeedno, oo yeynaan ku halayn inta dirayska xidhan oo kaliya."Ka
maanta jooga Ilaahay ayuu la hor tagayaa intii uu hayay oo
masuuliyadeedii waa la waydiinayaa, ka danbe ee imanayaana waa sidaa
si leeg, markaa anigu waxaan odhan lahaa waxaynu u samaysanay codkaa
in ninkii wax doonayaa ku adkaado, dadka wax doonayaa maaha dadkii
ay umadu soo xulatay, ee dadka wax doonayaa iyaguna waxbay doonayaan
horumarna waanu samaynaynaana way inoo soo bandhigeen, laakiin
taladeenu waxa ay tahay waar waxaa dadku samaysteen ha lagu kala
adkaado, sidaasi ayaynu xisbiga talada haya ku waaninaynaa, sidaasi
ayaanu Asxaabta kale ee mucaaradka ku waaninaynaa, oo doorashadii si
xalaala loo qabto oo loo sinaado, laguna kala adkaado si xalaala,
umaduna waxay ka warwarsan tahay in wakhti madhan soo baxo, waayo
wadan yar oo jilicsan ayaynu nahay, taana waxaanu ku waaninaynaa
Asxaabta Qaranka, maanta umaddu isbadal bay doonaysaa, waynagaa
maanta arkayna dareenka umadda 95% isbadal bay doonayaan, laakiin
waxay doonayaan isbadal Caafimaad qaba oo aan waxeenii hore waxba
yeelin."
Sheekh Aadan-Siiro, oo si gaar ah ula hadlaya asxaabtu waxa uu yidhi
"Markaa waxaanu doonaynaa anaga oo xor ah oo nabad haysana uu
isbadal inoo yimaado, waxaan Axsaabta Qaranka ugu soo jeedinayaa si
guud, waar isbadal wuu imanayaa Ilaahay baanuna ka rajaynaynaa,
laakiin xikmad iyo caqli halagu daro."
Ugu dambayn waxa uu Sheekh Aadan, hambalyo u diray ardayda qallin
jebisay iyo maamulka iyo macaliminta machadka Nuuradiin oo uu ku
ammaanay kaalinta ay kaga jiraan horumarinta waxbarashada dalka.
Wargeyska Geeska Afrika
|