SHAHIIDKA DUUG, DHIIGA MAYDH, ILMADA ISKA TIR, GUNTIGA GIIJIYA OO GEEDIGA WAADA
Waa duni oo joogsi ma leh. Wax kasta oo dhacana isma taagto. Adigoo iloobin nabarka laguu gaystay, haddana waxaad nacaska fulayga ah ee dhabarka kaa wareemay aad kaga guulaysataa markaad muujiso adkeysi iyo inaanad dhayal u ciirin. Xusuuso hooyadu markay ubadkeedu dhaco.. waxay tidhaa iyadoo dhoolacadaynaysa ... hubbo oo kac...ma daransiiso xanuunka ku dhacay ee waxay u tustaa caado qof walba soo martay. Waana dariska ugu horeeya ee fadhi baradku barto... in la dhaco, la kufo oo la kaco.. Haddaba shahiidka duug, dhiiga maydh, ilmada iska tirtir, dhexda giiji oo geediga ha joojin. Waxa inoo socda ooynu ku jirnaa marxalad adag, hadafkeedu yahay inaynu ku guulaysano ooy noqoto mid midhaheeda jiil ka jiil la dacarsandoono. Waa diiwaangelin ay dabo socoto doorasho aynu ku salayno cidda masiirka ummaddan dhibta iyo taariikhda qadhaadha soo martay loo dhiibi lahaa. Waxa lagu gaadhi karaa midnimo. Waxaana xil inaga saran yahay inaynu u guntano sidii ruux kasta oo muwaadin ahi u heli lahaa inuu xaqiisa doorasho si hufan, furfuran, xalaal ah oon habrasho iyo cabsi lahayn u guto. Madaxdeenu shalayto si wacan oo wanaagsan oo isku duuban ayey arrinta qaraxa ka yeeleen waxay innoogu yeedheen midnimo, gacanta oo leys qabsado, wado shaqayn cadowga oon meelna loo banyan. Waa waajib wadani waana mid aan cidina su’aal ka keenayn. Is-jira oo wadajira oo foojignaada. Iskaashada oo isku duubnaada. Dawladda waxa la gudboon heer kasta ooy joogto, in nin kasta oo xil qaran hayaa manta u soo noqdo waajibaadka ka saran xilkaas. Inuu hawshiisa u guto sidii loogu aaminay. Askariga, sarkaalka, ciidanka booliska, kan difaaca, kan sirdoonka ah, ka maxaabiista ilaaliya, karaaniga qalinka ku shaqeeya, inanta computarka dul fadhida, maayara, dhiisiga, badhasaabka, macalinka, dhakhtarka, duubabka , madaxtooyada, wasiirada, barlamaanka, xeer-ilaalinta iyo tan ugu culus waa xaqsoorka waa maxkamadaha, waa gudiga doorashooyinka waa gudi kasta oo arrin garnaqsi loo saaray... waxa la gudboon inay waajibkeeda si cadaalad ah u gudato. Maanta waxa hiil u aha qarannimadeena, waxaa hoog u aha cadowgeena, waxaa samir u aha inta dhibtu si gaar ah ugu habsatay inaan gogalxaadhka doorashooyinka soo socda loo maro oo lagu qabto hab cadaalad ah, hab hufan, furfuran oo loo siman yahay. Qof kasta oo xil ka saran yahayna waa inuu waajibkiisa u gutaa si codka muwaadinku u gaadho cidda uu xaq ahaan u doortay. Waa taas tan fashilaysa hammadii daalinka soo duulay, waana ta xaqiijinaysa in dalkeenu noqdo xiddig ka dhex iftiima mugda Geeska Afrika. Gobal kasta, degmo kasta, magaalo kasta, tuulo kasta, beel kasta, reer kasta, jilib kasta, jufo kasta, iyo qoys kastaa, waa inay u furnaadaan seddexda xisbi oon meelna cid gaar ah iyo xisbi gaar ah u xidhnaan. Dadka ha loo siiyo fursad ay ku doortaan cidda ay dantooda u dhiiban karaan. Hantida dawladda, idaacadda, warbaahinta, iyo wax kasta oo la wada leeyahay waa in xisbiyadu u sinaanaadaan. Waa arrimahaas kuwa ina walaaleynaaya, ina mideenaayaa, ina xoojinaaya, wiiqaaya cadowgeena. Wax walba ku liq danta guud, shallayto haddaad garab ahayd manta noqo qof qarannimo ku hawl gala. Dalool kasta gufee, oo qaybta oodda qaranka kaaga beegan soo jiid, gaadhkeedana u yeel. Iskuduubnida ku ilaali cadaaladda, iyadaa ina deeqda ee u gunto. Illaahow xaqa na tus, nagu toosi, oo nagu dhaq. Allow balaayada inaga xijaab, na gees mari, nabadda noo adkee, inta lunsan ee xumaanta caadeystay Allow soo hadee, xumahooda Allow tus. U muuji inta ubad ay agoomeeyeen, qalbigooda tus inta waayeel ay dhegta dhiig u dareen. Allow nabad taam ah ku soo dabaal dhammaan inta cariga Soomali ku nooshay, ka badbaadi colaadda iyo abaarta ku habsatay. Allow Soomaliland ka yeel dal nabad iyo Cadaalad ku sifooba, sidoo kalena u gargaar dhammaan Soomali iyo Islaamka kaleba. Allow cidna xumaan uguma maqnin, ee kuwa noogu maqan fashili oo hadafkooda jabi. AAN IDINKU DHAAFO MAGACYADA DHIMASHO IYO DHAAWAC ILAA HADDA LA SHAACIYEY IYO WARGEYSKA OGAAL
1. Xildhibaan
Maxamed Cismaan Libaaxo (Golaha Guurtida) Madaxtooyada
|