PUNTLAND INAY SOMALIYA
KA GODO MA OGOLIN GUDOOMIYAHA UCID ENG FAYSAL CALI WARAABE
“Cabdillaahi Yuusuf markuu Garoowe tegay wuxuu
yidhi ‘waxaanu doonaynaa inaynu samaysano dal inoo gaar ah oo aynu
Harti isugu keeno”
Guddoomiyaha xisbiga Mucaaradka ah ee UCID Inj. Faysal Cali Waraabe,
ayaa sheegay in Cabdillaahi Yuusuf Axmed oo todobaadkan iska casilay
Madaxweynenimada dawladda Ku-meel-gaadhka ah ee Soomaaliya uu haatan
dhaqdhaqaaq uu ku doonayo inuu gooni ugu jaro maamul-gobolleedka
Puntland ee Waqooyi/bari Soomaaliya ka wado magaalada Garoowe oo tan
iyo intii uu is-casilay ku sugnaa.
Faysal Cali Waraabe oo uu xalay waraysi la yeeshay Ogaal, waxa uu
jawaab kulul ka bixiyay dhawaaqyo hanjabaado ah oo ka dhan ah
hirgelinta Diiwaangelinta gobolka Sool oo dhowaan ka soo yeedhay
Madaxweyne K-xigeenka Puntland. Isla markaana waxa uu tilmaamay in
haddii maamulka Garoowe ku dhaqaaqo falal dhan ka ah Diiwaangelinta
Sool, uu Somaliland kala kulmi doono dhibaato saamayn ku yeelata
dhulka deegaamada maamul-gobolleedkaas.
“Horta wax dareemo ah oo xumi ma jiraan, waxayna ku xidhan tahay
dadka deegaanka degen. Ta labaad, waxay ku xidhan tahay sida uu
maamulka Somaliland uga hirgalay dhulka aynu hawsha Diiwaangelinta
ka qabanayno. Hadduu shacbigu rabo, laakiin aanay Nabadgelyo jirin
oo aanay dawladdu ka shaqaynaynin sida Dhahar iyo Badhan (Barriga
Sanaag) ka dhacday, dadku way rabaane maamulkii baan gaadhin.
Markaa qof kastaa qas wuu ka samayn karaa, laakiin wax ay hayaan oo
maamulka Garoowe uu khatar inagu gelin karaa ma jirto. Waanu u
sheegnay oo hadduu Maamulka Garoowe soo farogeliyo Diiwaangelinta
Somaliland, wuxuu kala kulmi doonaa dhibaato, waananu uga digaynaa.
Waxaan aad ugu rajo badnahay in shacbiga reer Sool ay diyaar u
yihiin oo maanta uu ciidankeena qaranka iyo Boolisku ka shaqaynayo
Laascaanood, markaa ay ka duwantahay Dhahar iyo Badhan.” Sidaa ayuu
yidhi Faysal Cali Waraabe.
Guddoomiyaha oo su’aal laga sii waydiiyay degmooyinkaa Barriga
Sanaag ee uu carabaabay iyo wixii uu kala kulmay maadaama uu ka mid
ahaa Masuuliyiinta kormeerayay diiwaangelintii gobolka Sanaag, waxa
uu ku jawaabay “Dhahar shacbigeeda iyo odayaasheeduba diyaar bay
ahayeen. Laakiin, degmada Badhan waxa khalkhal geliyay Suldaankooda
oo markii horena balanqaaday, markii dambena Addis Ababa iska tegay
oo maamulka Garoowe ee Cadde Muuse iska raacay, intuu odayaal kaga
tegay ku yidhi, ‘waxaad tidhaahdaan hanoo keenina (Diiwaangelinta)’
masuuliyaduna isaga ayay saaran tahayoo waa lala xisaabtamayaa.
Sababtoo ah wuxuu jabiyay heshiiskii 1991-kii oo kii 1993 buu
jebiyay, balantii uu u qaaday Guddigii xaqiiqo-raadintana wuu
jabiyay. Markaa arrintaasi waa mid lagula xisaabtami doono Suldaan
Siciid, dawladduna waxay ka gaabisay inay dhulkaa (Barriga Sanaag)
Boolis geyso oo ay maamul hagaagsan ka dhisto. Laakiin, labada
meeloodba (Sool iyo Barriga Sanaag) dadku waa diyaar waana dad reer
Somaliland ah, xaalad uu BBC-da ka sii daayay Yuusf Garaad-na kama
joojinayso xuquuqdooda muwaadinimo ee Somaliland.
”Guddoomiyaha oo la waydiiyay aragtidiisa ku saabsan dhawaaqii
Madaxweyne Ku-xigeenka Puntland Xasan Daahir Af-qudhac ee la
xidhiidhay hawsha Diiwaangelinta Sool, waxa uu sheegay in aanay
Puntland awood u lahayn falal ay ku carqaladayn karto Diiwaangelinta
Sool.
“Waxa weeye, qof Mikirifoon loo dhiibay wuxuu doono ayuu ku hadlayaa.
Xasan (Madaxweyne K-xigeenka Puntland) wuxuu ka soo jeeda Ceerigaabo,
halkaasna waatii Diiwaangelintu ka dhacday.
Markaa meel aanu isagu awood ku lahayn inuu yidhaahdo ka dhici mayso,
waa iska af-gobaadsi oo doorasho ayuu ku jiraayoo wuxuu is leeyahay
halagugu doorto. Laakiin, hadii la qash-qash geliyo Diiwaangelinta
Somaliland, Garoowe-na doorasho ka dhici mayso bisha sideedeeda (8
january 2009 – doorashada Madaxtinimada Puntland) oo taasaanu ugu
balanqaadnay.” Sidaa ayuu yidhi.
Guddoomiyaha xisbiga UCID oo la waydiiyay sida uu u arko iscasilaada
Cabdillaahi Yuusuf iyo dhaqdhaqaaqyo sida la sheegayuu maalmihii u
dambeeyay ka waday Garoowe, waxa iscasilaada Madaxweynihii hore ee
TFG ku tilmaamay waacusub oo u baryay shacabka Soomaaliya, waxaanu
mar uu arrintaa ka hadlayay yidhi, “Horta, waacusub baa u soo baxay
Soomaaliya. Cabdillaahi Yuusuf wuxuu ahaa dhibaatada ugu weyn ee
hortaagan dib-u-heshiisiinta iyo Nabadda Soomaaliya.
Cabdillaahi Yuusuf iyo kooxo la mid ahi waxay ahaayeen dadkii
kharibay Midnimadii Soomaalida, kuwii Soomaaliya fashiliyay ee
umadda qaybiyay. Wuxuu ka mid ahaa dadkii inaga Somaliland ahaan
kuwii ina qaybiyay ee beelaha inaga dhigay inagoo dad reer
Somaliland ah, isku dhaqan ah, isku Calan ah oo shan Soomaaliyeed
doonayna.
Markaa waxa farxad weyn ah in isaga iyo jiilkiisii fikradaa qabay ee
Soomaali kharibay ay ka baxeen siyaasadda, waxaana hadda ka sii
hadhay ninka la yidhaahdo Cabdirisaaq Xaaji Xusseen (Raysal-wasaarihii
Soomaaliya sannadihii u dhexeeyay 1964-1967) oo isna taariikho been
ah ka sheegta idaacaddaha.
Sidaa darteed, waxa halkaa inaga dhammaaday jiilkii Soomaali
kharibay ee qabiilka u kala saaray ee shantii Soomaaliyeed ee la
doonayay qabiilka ku bedelay, markaa waa laga nasanayaa Cabdillaahi
Yuusuf. Wararka waxaanu ku helaynaa in markii uu Garoowe yimi markii
uu Saxaafadda u waramayay markii dambe yidhi Kamaraddaha iyo
Rikoodhada iga bakhtiiya, oo uu yidhi ‘waxaanu doonaynaa in aynu
samaysano dal inoo gaar ah oo Isir (qabiil) ku salaysan oo Maamulka
Garoowe aan ka dhigno mid Madaxbanaan oo aynu Harti isu keeno,
dawladna u samayno…’ Markaa haddii taasi dhabowdo oo uu dhaqdhaqaaq
Somaliland iyo Xuduuddeheeda ka soo horjeeda sameeyo, balan waxaanu
ugu qaadnay in inta aanu waxaanu hayno iska joojino in arrintu noqon
doono dhulka lagu dagaalamaaayaa inay dhulkooda noqon doonto.
Waanu u sheegnay oo fariin baanu u farnay, Isimadooda waanu u
sheegnay shacabkoodana waanu u sheegaynaa. Dhulkii la odhan jiray
Jamhuuriyaddii Soomaaliya, meel aan lagu dagaalami oo intii
dagaaladii Soomaaliya ka dambaysay koray oo magaaloobay waxa jira
Boosaaso iyo dhulkaa ay iyagu (Puntland) degaan.
Markaa haddii ay Nabaddooda xejisan waayaan oo ay jaarnimadooda nagu
ixtiraami waayaan, anagu (Somaliland) wax ma daandaansanee wax baanu
iska celin doonaa.”
Injineer Faysal Cali Waraabe waxa uu tilmaamay in aanay qaddiyada
Somaliand iyo guud ahaan Soomaaliya waxba u dhimayn haddii ay
dhabowdo abaabulka Cabdillaahi Yuusuf ku doonayo inuu Puntland kaga
jaro Soomaaliya inteeda kale, taasoo uu xusay in aanay Somaliland
iyo Koonfurta midna aqbali doonin. “Waxba ma yeelayso. Laakiin, waa
inay ku ekaato labadooda gobol ee Nugaal, Barri iyo badh Mudug ah.
Markaa labadaa gobol iyo badhkaas bay leeyihiine ama haku dareen
Soomaaliya ama dawlad-gobolleed ha ahaadeen ama ha noqdeen mid
madaxbanaan….. Soomaaliya ogolaan mayso oo berri baa la soo qaban
doonaa, sababtoo ah anagoo (Somaliland) dawlad ahaan jirnay oo
Xuduud leh ayaanu Soomaaliya ilaa hadda la la’nahay na Ictiraafa.
Markaa Mudug oo xad kala dhexmaro inay go’do ogolaan mayso, anaguna
ma ogolin in Soomaaliya kala goo’godo,” ayuu yidhi Guddoomiyaha
xisbiga UCID.
Xg: Ogaal
|