"Nabadgelyo
Xumada Wallaahi Bilaahi Ka Wada Ee U Khuurinaya Inay Wuxuun Dhacaan
Ee Reerkiisii Iyo Wixii Qiime Lahaa Ee Ka Yaalay Dibada U Diray Waa
Rayaale"
"Cawil Waa
Ninka Qoyska Madaxweyne Rayaale Baray Musuq Maasuqa"
Ismaaciil Yare
Wasiirkii hore Arrimaha Gudaha Somaliland Md Ismaaciil Aadan Cismaan
[Ismaaciil Yare] oo ka tirsan xubnihii xisbiga UDUB ee laga reebay
shirweynihii labaad ee xisbigaasi ayaa shir jaraa’id oo uu ku qabtay
Huteelka Xaraf ee magaalada Hargeysa wuxuu Labada Gole ee
Baarlamaanka ugu baaqay inay xilka ka xayuubiyaan Madaxweyne Rayaale,
oo uu sheegay inuu si qayrul sharci ah ku fadhiyo kursiga.
Ismaaciil Aadan Cismaan wuxuu shirkaasi si kulul ugu naqdiyay
Komishanka doorashooyinka, Haayada Inter-peace iyo xukuumada
Somaliland, isagoo shirkaasi ka hadlayayna wuxuu yidhi "Haddii aan
Komishanka Doorashooyinka Qaranka iyo Haayada Inter Peace waa
komishan Qaran oo kale oo ka sareeyaba Komishankeena, Inter Peace ma
aha shirkadii yaraa ee qandaraaska lagu siiyay hawlaha aynu
doorashooyinka ku gelayno inay inoo fuliyaan ee EU-du soo siisay,
intii u dambeysay ayaan soo qaadanayaa Komishanku Qaranku hawshii ay
galeen ee kirada waxa dhacday marka horeba hawshii ay galayeen ee
diiwaangelinta ku sheegeen inay u galeen si qayrul sharci ah oo ay
ugu tallo galeen in lixda gobol ee walaalaha ah ee wada dhashay ee
Somaliland la iska horkeeno oo la muransiiyo."
Wasiirkii hore ee arrimaha Gudaha Somaliland wuxuu ku eedeeyay
Madaxweyne Rayaale inuu raali ka ahaa in dadweynaha lagu wareeriyo
hawshii diiwaangelinta codbixiyeyaasha, waxaanu yidhi "Hawsha qaska
Rayaale wuu la waday komishanka waayo waa nin mar walba aan ku tallo
gashanayn in doorasho dhacdo, dadku inay is diiwaangeliyaan dad
xukuumada ka tirsan ayaa diidanaa, diiwaangelinta marka horeba
Rayaale diyaar umuu ahayn maalin kale ayaan halkan ka sheegi doonaa
waxa weeye qorshe lala galay ayuu marka horeba ku ogolaaday diiwaan
gelinta. Waxaa taas idiin caddaynaysa markii ay arrinta ku
noq-noqoshada diiwaan gelinta ee foosha xumi dhacday komishanku
waxay saddexda xisbi qaran kula heshiiyeen, Inter Peace oo
komishanka koowaad ah oo ka sii sareysaana goob joog ayay ahaayeen
waxa la yidhi sadexda xisbi in mid waliba saddexda xisbi uu soo
dirto laba nin oo mid wakiil ah iyo mid farsamo yaqaan ah oo hawlaha
Server-ka ka sheeqeeya si ay goob joog uga ahaadaan marka
macluumaadkii diiwaan gelinta Server-ka lagu shubayo, heshiiskii
lagu heshiiyay ee lala galay Komishinka iyo Haayadan yar ee ka sii
saraysa ee Rayaale u shaqeysa, waxa nasiib darro noqotay oo aad
garan kartaa in meesha guruub ka mid ah Komishinka, Rayaale iyo
Inter Peace ay isku xidhan yihiin oo ay yihiin Barmuudadii wax
liqaysay heshiiskii noocaas ahaa ee la galay iyadoo saddexdii xisbi
qaran aan midna loo yeedhin, ayuu ninkii komishanka masuulka uga
ahaa diiwaangelinta oo la yidhaahdo Ismaaciil, oo la ii sheegay in
xilkii laga qaaday lagamana qaadine meeshii wuu joogaa komishankii
ee hawshii loo diray ayuun buu dhammeeyay."
Ismaaciil oo hadalkiisa sii watay wuxuu yidhi "In lagu tallo galay
in qaskii iyo dhibaatadii socoto sidii ay ugu tallo galeen Rayaale
iyo ninka Sammora la yidhaahdo ee Inter Peace wakiilka u ah oo ah
mid u shaqeeya Rayaale."
Ismaaciil Aadan wuxuu sheegay in aanay doorashadu ku qabsoomayn
wakhtiga cusub ee komishanka doorashooyinku dib ugu riixay ee 31
bisha May, isla markaana aanay xisbiyada mucaaridka ah waxba meesha
u oolin.
Wasiirkii hore daakhiligu wuxuu sheegay in ninka Madaxweynaha
Somaliland jarka ka tuurayaa uu yahay Wasiirkiisa maaliyada, isagoo
arrintaasi ka hadlayayna wuxuu yidhi "Cawil laba waxyaabood oo qudha
ayuu u hayaa, wuxuu ku yidhaahdaa Isaaq anigaa aqaana sida loola
macaamilo been buu kuu sheegayaa ee walaahi inaanu aqoon ee wuu iska
hadlayaa, ma aha tii Siyaad Barre ee uu u shaqayn jiray ee uu dadka
sanaaduuqda ugu guri jiray, isagaa sanduuq halkan lagaga ridi doonaa,
ta labaad ee uu yaqaanaa oo uu ku yidhi anigaa lacag kuu samaynaya,
dharaar dhawayd wuxuu yidhi Cawil Anigu Kenya waxba kuma lihi oo
waan bakhtiyayaa Riyaalena waxba kuma laha. Afar Guri ayuu Kenya ku
leeyahay Cawil kaligii, Todoba baabuur oo VolVe-na wuu ku leeyahay
ninkaasi Jabuutina Kambani ayuu ku leeyahay uu 350 kun oo dollar oo
saami ah ku leeyahay, Rayaale Ta uu Kenya uga furay Saxaafada dambe
ayaan uga sheegayaa Rayaale aqal kuma laha laakiin wuxuu ku leeyahay
waan ogahay."
Eng Ismaaciil Aadan Cismaan, wuxuu sheegay Wasiirka Maaliyada
cilmigiisu uu gudhay oo uu ku xidhan yahay kii 1960-kii berigii la
xidhay ee uu isagu inqilaabkii ka dhuuntay, waxaanu yidhi "Cawil-na
cilmigiisu waa kii gudhay oo uu ku xidhan yahay kii 1960-kii berigii
la xidhay ee uu isagu inqilaabkii ka baxsaday, dadku waxay moodaan
inuu inqilaab dhigayay wuu ka baxsaday isaga oo baxsad ah oo
dhuumanaya ayaa la qabtay intii heshiiskii la galay kuwii fashiliyay
ayuu ahaa inqilaabkaasi. Cawil-na waa ninka Rayaale iyo Qoyskiisa
musuqmaasuqa baray."
Wasiirkii hore wuxuu ku eedeeyay Madaxweyne Rayaale inaanu dhammaan
heshiisyadii uu galay aanu hor keenin Baarlamaanka, waxaanu yidhi "Sharciyan
wixii uu saxeexay heshiisyadii caalamiga ahaa wax ka jiraa ma jiraan,
waan arkayay qolooyin gaalo ah oo carcarayay, waar waxaan shirkadaha
caalamiga ah u sheegayaa wixii aad la gashaan Rayaale wax allaale
iyo wax ka jiraa ma jiraan. Todobadaa sanadood kuwii uu la galayna
heshiis qudha baarlamaanka muu horgeyn."
Md. Ismaaciil Aadan wuxuu labada gole ee baarlamaanka Somaliland
Wakiilada iyo Guurtida u soo jeediyay inay xilka ka xayuubiyaan
Madaxweyne Rayaale oo uu ku eedeeyay xil gudasho la’aan.
"Nabadgelyo xumada Wallaahi bilaahi ka wada ee u khuurinaya inay
wuxuun dhacaan ee reerkiisii iyo wixii qiime lahaa ee ka yaalay
dibada u diray waa Rayaale, maanta waa maalintii aynu halganka ku
jirnay oo kale Rayaale wuxuu doonayaa inuu shacbiga Somaliland iska
hor keeno oo uu mar walba shan qof TV-yada soo fadhiisiyo, Shacbiga
waxaan leeyahay Rayaale Waa Dhurwaaye yur dhaha,"ayuu yidhi
Ismaaciil Aadan Cismaan.
Md. Axmed Sandoon Xasan oo ka mid ahaa murashixiintii doonayay inay
Rayaale kula dhex tartamaan xisbiga dhexdiisa ee laga hor istaagay
inay shirweynahii labaad ka qeyb galaan ayaa hadal uu shirkaasi ka
jeediyay ku sheegay in ay dhammaatay mudadii xil haynta xukuumada
Somaliland ee tallada dalka haysa, waxaanu Labada gole ee
baarlamaanka ugu baaqay inay isu yimaadaan oo ka tallo bixiyaan
xaalada adag ee dalku galay ka dib dib u dhicii doorashada
madaxtooyada oo hore loogu cayimay inay qabsoonto 29-ka bishan
March.
Axmed Sandoon wuxuu sheegay in aanu garanayn waxa ay xukuumada
Somaliland ku diidan tahay in labada gole ee baarlamaanku isku
yimaadaan oo ay ka arrinsadaan xaalada wadanka.
Xasan Jaamac, oo ka mid ah qurba jooga xisbiga UDUB oo ka hadlay
shirkaasi ayaa Madaxweynaha Somaliland u soo jeediyay inuu is casilo
waxaanu ku eedeeyay inuu jabiyay dastuurkii dalka iyo xeerkii
xisbigiisa ee lagu dhaariyay.
Shirkaasi waxa goob joog ka ahaa Xildhibaano ka tirsan Golaha
wakiilada kaga jira xisbiga UDUB iyo xubno kale oo ka tirsan Golaha
dhexe iyo Guddida fulinta.
Ramaasnews
|