Munaasibad si heer
sare ah loo soo agaasimay ayaa shalay lagu soo dhaweeyay
saddex ka mida abwaanada magaca ku leh
Somaliland
Munaasibad si heer sare ah loo
soo agaasimay ayaa shalay lagu soo dhaweeyay saddex ka mida
abwaanada magaca ku leh Somaliland oo kala ahaa Abwaan Maxamed
Ibraahim Warsame (Hadraawi),Abwaan Cabdi Aadan Xaad (Cabdi Qays) iyo
Abwaan Yuusuf Cusmaan Xandule (Yuusuf-Shaacir) munaasibadaa oo ay ka
soo qayb galeen Guddoomiyaha Waxbarashada ee Mu’asasada Masno Mr C/raxmaan
Khayre Maamulka iyo macaliminta iyo waliba ardayda waxka barata
dugsiga sare ee Ilays ayaa waxa ugu horayntii waxa si heer sare
ahAbwaanada ugu soo dhaweeyay dugsiga koox ka mida ardayda dugsiga
oo ku jeeniqaarnaa ama uu ka muuqday labiskii Hidaha iyo Dhaqanka
intaa ka dib waxa ay Abwaanadu kala hadleen ardayda Daabuurka
Dugsiga iyagoo aad uga mahad naqay sida diiran ee loogu soo
dhaweeyay Dugsiga oo ay ku tilmaameen inay tahay mid taariikhi ah oo
aanay ilaabi doonin waxa ugu horayntii halkaa kala hadlay ardayda
Abwaan Maxamed Ibraahin Warsame Hadraawi Abwaanku isaga oo ka
hadlaya shucuurtiisa ku aadan munaasibadan ayaa waxa uu yidhi
“Xiisaha iyo kalgacalka aad nagu soo dhawayseen si looga abaal gudo
garan mayno anagu niyadbaanu u keenaynaa inaanu idinka mid noqono oo
marwalba idiin nimaadno waayo waxaanu arkaynaa culayska aad saarteen
Maamul, Macalimiin iyo Ardayba Munaasibadan iyo tii anigu aan joogay
ee ka horaysayba, anagu waxaanu doonaynaa mustaqbalka inaanu saaxiib
la noqono Dugsiga Ilays”
Abwaanku waxa uu aad ugu dheeraaday inay tahay xaq ay da’yartu ku
leeyihiin Waayeelka inay marwalba u tagaan waxna u sheegaan isagoo u
soo jeediyay ardaydu inaanay ku koobnaan oo kaliya duruusta ay
dhiganayaan balse ay tahay inay qalin iyo buug la hoos joogaan kolba
cida ay wax ku tuhmayaan
Abwaanku waxa uu aad ugu dhiiri galiyay ardayda inay yihiin madaxdii
wadanku tirsanayay mustaqbalka sidaa darteed ay tahay inay u diyaar
garoobaan loona baahan yahay inay sifo ka duwan tii dadkeena hore u
mareen xukunka iyo hogaaminta dalka ay u maraan ay tahayna inay
imika ay da’yartu ka qaybgasho hawlaha umadu leedahay.
Abwaan Hadraawi waxa uu halkaa ka soo jeediyay gabay aad u kooban
balse macnaha uu ku fadhiyaa aad u balaadhan yahay gabaygaasi oo uu
abwaanku sheegay inuu u hibeeyay Dugsiga Sare ee Ilays oo sanadkii
hore munaasibad tan oo kale ah oo u qabteen ardaydii hore ee dugsiga
ka baxday ugu balan qaaday inuu gabay Ilays ku cadahay soo samayn
doono kuna kaliftay sida uu abwaanku sheegay kalgacaylka iyo soo
dhawaynta uu kala kulmay Dugsiga waqtigaasi.
Waxa isaguna hadalka la wareegay Abwaan Cabdi Aadan Xaad (Cabdi Qays)
oo isaguna aad ugu mahadnaqay soo dhawayntaa ay kala kulmeen Dugsiga
isagoo ku tilmaamay inuu dugsigani yahay mid u qalma magaca Ilays
waxana uu u soo jeediyay inaanay ardaydu fududaysan oo aanay
yaraysan xilka culus ee sugaya.
Waxa isna halkaa kala hadlay Abwan Yuusuf Shaacir oo isna mahadnaq
ka dib tilmaamay inay sifo wanaagsan ku barteen Dugsiga waxa yaalana
ay indhahooda ku soo arkeen isla markaana ay kulamo dambe la yeelan
doonaan tanina tahay kulan isbarasho.
Intaa ka dib waxay Abwaanadu kulan kula yeesheen Ardayda dugsiga ka
baxaysa Hoolkii loogu talo galay xafladda.
Hadaba waxa ugu horayntii kulanka ka hadlay Maamulka Dugsiga Sare
Ilays Sh.C/raxmaan Axmed Cabdi oo uga waramay abwaanada in dugsigani
yahay mid aan u baahnayn in wax laga sheego oo uu yahay Dugsi guud
ahaan Dalka oo dhan magac iyo maamuus ku leh iyadoo guulihii ugu
waawaynaa ee uu soo hooyayna ay ugu dambaysay kaalmihii ay ka galeen
Imtixaanaadkii Qaranka ee ugu dambeeyay oo uu tilmaamay inay 15 kii
kaalmood ee ugu sareeyay Somaliland hablo iyo inamoba ay ku
lahaayeen saddex meelood meel ahaan taasina tahay hadafka dugsiga
iyadoo ujeedooyinka dugsiga loo aasaasayna ay tahay in la soo saaro
arday karti iyo aqoonba leh oo dhinac walba ka dhisan.
Waxa isna kulankaa ka hadlay Macalin ka mida macalimiinta dugsiga
wax ka dhiga Maxamed Axmed Beddel oo ah maclinka somaliga iyo
suugaanta ee dugsiga oo isna inbadan ka sheekeeyay taariikhda
Awaanadani kaga jiraan guud ahaanba somaalida isagoo talooyin wax ku
oolana usoo jeediyay ardayda ugana mahad naqay sida wanaagsan ee ay
u maamuseen abwaanada.
Intaa dabadeed waxa ay abwaanadu halkaa ka akhriyeen maansooyin
dhawra iyada oo Yuusuf Shaacir iyo Hadraawina aad u lafa gureen
silsiladii Siinley ee caanka noqotay iyo sida ku soo baxday .
Waxa kale oo kulankaa gabayo Carabi iyo Somaliba iskugu jiray oo ay
kaga hadlayeen dugsigan Ilays kuna soo dhawaynayeen Abwaanada ka soo
jeediyay qaar ka mida ardayda dugsiga wax ka barata .
C/risaaq Jaamac Nuux (Shariif) oo ku hadlayay magaca ardaydii
dugsiga ka baxsday ayaa isna aad ugu hambalyeeyay ardaydu sida ay u
soo dhaweeyeen abwaanadan qaaliga abwaanadana uga mahad naqay
waqtiga ay u soo hureen inay u si ay ugu faa’iideeyaan da’yarta.
Gabagabadii waxa abwaanada su’aalo waydiiyay ardayda ugu dambaytiina
waxay ay ardaydu gudoonsiiyeen abaal marino ay ugu talo galeen
abwaanada.
Maaha markii ugu horaysay ee munaasibad noocan oo kale ahi lagu
qabto dugsiga ilays ee waxa isna sanadkii hore ay si heer sare ah
ugu soo dhaweeyeen ardaydii hore ee dugsiga ka baxday Abwaan
Hadraawi.
Waaheen
|