Masuuliyada na saarani waa inaanu garaacno albaab kasta" Madaxweyne Rayaale

Madaxweynaha Jamhuuriyada Somaliland Mudane Daahir Rayaale Kaahin oo beryahanba socdaalo ku kala bixinayay dalal ka tirsan qaaradan Yurub imikana ku sugan Magaalada London ee dalkan Britain ayaa waxa uu maanta kulamo isdaba joog ah kula yeeshay huteelka uu degan yahay masuuliyiin kala duwan oo ka kala socday jaaliyadaha Somaliland ee ku nool Magaalooyinka London, Bristol, Cardiff, iyo Sheffield, iyada oo sidoo kale uu Madaxweynuhu kulamo sidan oo kale ah la yeeshay masuuliyiin ka socotay Xisbiyada Qaranka ee Somaliland gaar ahaan Xisbiga UCID iyo Xisbiga UDUB. Tafatiraha Somali Voice Kaysar Cabdilaahi oo Madaxweynaha salaan sharaf maanta ugu tagay huteelka uu ka degan yahay London isla markaas ka qayb galay kulamadaas qaarkood ayaa warbixintan inooga diyaariyay kulamadaas:

Madaxweynaha Jamhuuriyada Somaliland Mudane Daahir Rayaale oo ilka cadaynaya ayaa kasoo degay qaybta sare ee huteelka ee uu deganaa waxaana uu salaan ku bilaabay dad badan oo hor dhoobnaa goobta kulanka oo sugayay inay la kulmaan Madaxweynaha, iyada oo aad arkaysay dadku inay aad u xiiseynayeen aragtida Madaxweynaha.

Xoghayaha gaarka ah ee Madaxweynaha oo si firfircoon u kala horayay dadka huteelka gudahiisa joogay ayaa dadweynaha u sheegay in Madaxweynuhu uu diyaar u yahay inuu la kulmo dadkiisa, waxaana uu ka codsaday in ay si koox koox ah ula kulmaan Madaxweynaha maadaama ay wakhti badan qaadanayso hadii qof kastaa uu doono in uu si gaar ah uu Madaxweynaha ula kulmo, taasi oo dadka madasha joogayna ay aad ugu garaabeen.

Ugu horrayn Madaxweynuhu waxa uu kulan gaar ah la yeeshay masuuliyiin ka tirsan Xisbiga UDUB gaar ahaan Gudiga Fulinta ee Xisbiga UDUB ee dalkan UK, waxaana kulankaasi oo muddo saacad ku dhow qaatay ay Madaxweynaha iyo xubnaha Xisbigiisu ka wada hadleen arrimo u gaar ahaa xisbigaasi oo la xidhiidhay kobcinta xisbiga iyo sida uu xisbigaasi ugu diyaar garoobayo doorashooyinka fooda inagu soo haya.

Shirkaas ka dib waxa uu hadana Madaxweynuhu la kulmay Masuuliyiin ka socotay magaalooyinka London, Bristol, Cardiff, iyo Sheffield waxaana uu uga warramay xaalada guud ee uu imika dalku ku sugan yahay “ Anaga masuuliyada na saarani waa inaanu dalkayaga u shaqayno oo aanu garaacno albaab kasta oo aanu u aragno in dani ay noogu jirto, ka nasan mayno inaanu qadiyadeena gaadhsiino meel kasta oo aanu gaadhsiin karayno” ayuu yidhi Madaxweyne Rayaale oo hareeraha ka fadhiyeen Wasiirka Maaliyada Mudane Xuseen Cali Ducaale (Cawil) iyo Safiirka Somaliland u fadhiya UK Mudane Aadan Muuse Jibriil.

Madaxweynaha oo oo dadka madasha joogay la hadlayay waxa uu tilmaamay sida ay lagama maarmaanka u tahay in bulshada Somaliland ee qurbaha ku nooli ay ugu middoobi lahaayeen sidii ay qadiyada Somaliland uga dhaadhicin lahaayeen dalalka ay joogaan, isla markaasna gacmaha ay gacmaha isu qabsan lahaayeen ee ay uga qayb qaadan lahaayeen dib u dhiska iyo horumarka dalkooda hooyo ee qaaliga ah ayuu yidhi Madaxweyne Rayaale.

Wasiirka Maaliyada Somaliland Mudane Xuseen Cali Ducaale oo isagu kulamo gaagaaban si gaar-gaar ah ula yeelanayay dadka reer Somaliland ee soo booqanayay huteelkan ay wafdiga Madaxweynuhu ku sugnaayeen ayaa mar uu kulan gaar ah la yeeshay Masuuliyiin ka socotay Jaaliyada Somaliland ee Bristol oo ay ka mid ahaayeen Caaqil Maxamuud Cade Gude, Oday Cabdi Gamuute, Axmed Ducaale Qambi, Axmed Naasir Xirsi Maxamed iyo Kaysar Cabdilaahi ayaa waxa uu wasiirku tilmaamay in dawlada Somaliland ay xoogga saarto sidii uu dhaqaalaha Somaliland u noqon lahaa mid deggan, waxaa kale oo uu tilmaamay in dhaqaalahan hoos u dhacay ee dunida imika ka jiraa uu saamayn balaadhan ku yeeshay Somaliland, hase yeeshee wasiirku waxa uu tilmaamay in dadweynaha reer Somaliland ay yihiin qaar iimaan qaba oo Allahooda isku xidha una sabrra dhibaato kasta oo soo waajahda, iyaga oo caado ay u tahay reer Somaliland inay dulqaad iyo dedaal kaga gudbaan dhib kasta oo soo waajahda, waxaana uu sheegay in dhawaan laga gudbi doono dhaqaale xumada dalka ka jirta, taasi oo uu tilmaamay in Somaliland ay la qabto dalalka kale dhaqaalo xumidan imika dunida ka dhacday.

“ Dalalka Afrika miisaaniyadooda waxa la kabaa ugu yaraan inta u dhaxaysa 40% waxaanay dunida ka helaan caawimo malaayiin ah, Somaliland ma jirto miisaaniyad ay aduunyadu naga kabto ama dhaqaale nala siiyaa, hase yeeshee waxaanu isku filaysiinaa waxa aanu dalkayaga kala soo baxno anaga oo garabsanayna dadweynahaga geesiyiinta ah, waana taas guusha Somaliland ay ku faani karto ee ay kaga duwan tahay afrikada la taageero ee hadana daalaa dhacaysaa” ayuu yidhi wasiirka Maaliyada oo ay kalsooni badani ka muuqatay.

Dhinaca kale waxa uu Madaxweynuhu kulan gaar ah galabta la yeeshay Safiirrada Somaliland u jooga dalkan UK Mudane Aadan Muuse Jibriil, Wakiilka Somaliland ee Ireland Mudane Cabdifataax Siciid Axmed Iyo Safiirka Wareega Mudane Aar, Shirkaasi oo uu gudoominayay Madaxweyne Rayaale waxaa goob jog ka ahaa wasiirka Arrimaha Debada Mudane Cabdilaahi Maxamed Ducaale iyo Wasiirka Maaliyada Mudane Cawil, waxaana uu Madaxweynuhu ku boorriyay safiirradaas uu la kulmay inay dardar galiyaan hawlahooda siina laban-laabaan dedaalkooda.
 

Kaysar Cabdilaahi
Tafatirka Somali Voice
www.thesomalivoice.co.uk