Madaxweyne
Siilaanyo oo Xayiraadii ka Qaaday Wargeyska Madaxbannaan ee Hubaal
Maxkamadda Gobolka Hargeysa, ayaa 21 June 2013 xayirtay wargeyska
madaxbannaan ee Hubaal
Hargeysa (TNN):-Madaxweynaha Jamhuuriyada Somaliland Md. Axmed
Maxamed Maxamuud (Siilaanyo), ayaa maanta saamaxaad u fidiyey
Guddoomiyaha Wargeyska madaxbannaan ee Hubaal Mr. Maxamed Axmed
Jaamac (Caloolay) iyo tifaftiraha wargeyskaas Mr. Xasan Xuseen
Cabdillaahi (Keefkeef), kuwaasoo Maxkamadda Gobolka Hargeysa hore
ugu riday xukuno kala duwan, isagoo sidoo kale madaxweynuhu
ogolaaday in xayiraada laga qaado wargeyska Hubaal.
Maxkamadda Gobolka Hargeysa, ayaa 21 June 2013 xayirtay wargeyska
madaxbannaan ee Hubaal, iyadoo 3 July 2013 maxkamaddu guddoomiyaha
wargeyska Hubaal Mr. Maxamed Axmed Jaamac (Caloolay) ku xukuntay hal
sanno oo xadhig ah iyo ganaax dhan hal milyan oo shillinka
Somaliland, halka tifatiraha wargeyska Hubaal Xasan Xuseen
Cabdillaahi (Keefkeef) lagu xukumay laba sanno oo xadhig ah iyo
ganaax dhan 2 milyan oo shillinka Somaliland, kuwaasoo 4 July 2013
Maxkamadda Racfaanka Gobolka Hargeysa ku sii daysay damaanad.
Hasayeeshee, xubno Wasiirro ah oo ay ka mid yihiin Wasiirrada
warfaafinta, Madaxtooyada iyo Arrimaha Gudaha Somaliland iyo xubno
ergo ah oo ka tirsan masuuliyiinta saxaafadda Somaliland oo
muddooyinkii u dambeeyey wadahalo la xidhiidha wargeyska Hubaal u
socdeen, ayaa ku guulaystay in madaxweynaha Jamhuuriyada Somaliland
ka aqbalo cod ay u gudbiyeen oo ku saabsanaa in saamaxaad loo fidiyo
weriyeyaasha wargeyska Hubaal ee xukunka madaxkamaddu ku dhacay,
isla markaana wargeyska laga qaado xayiraada maxkamadda Gobolka
Hargeysa saartay, kadib markii ay raaligelin iyo xaal ka bixiyeen
warar wargeysku hore u qoray oo wax lagaga sheegay safaaradda
Itoobiya ee Hargeysa iyo arrimo khuseeya dalalka dariska ah ee la
saaxiibka ah Somaliland, gaar ahaan Itoobiya, kuwaasoo dhaawac ku
ahaa qaranimada Somaliland.
Masuuliyiin ka socday saxaafadda iyo ururrada bulshada rayidka ah ee
oo uu weheliyey Guddoomiyaha wargeyska xayiraada laga qaaday ee
Hubaal Mr. Maxamed Axmed Jaamac (Caloolay), ayaa maanta qasriga
madaxtooyada kula kulmay madaxweynaha Somaliland Md. Axmed Maxamed
Maxamuud (Siilaanyo) oo ay weheliyeen wasiirrada warfaafinta Md.
Cabdillaahi Maxamed Daahir (Cukuse), Madaxtooyada Md. Xirsi Cali
Xaaji Xasan iyo xoghayaha gaarka ah ee madaxweynaha Mr. Cali Axmed
Cali, kuwaaso madaxweynaha iyo dawladda Somaliland-ba raaligelin ka
siiyey wararkii dhaawaca ku ahaa qaranimada Somaliland ee uu
wargeyska Hubaal ka baahiyey safaarada Itoobiya, isla markaana waxay
madaxweynaha ka codsadeen inuu saamaxaad u fidiyo weriyeyaasha
maxkamaddu xukuntay, xayiraadana laga qaado wargeyska Hubaal,
arrintaasoo madaxweynuhuna aqbalay.
Waxa kale oo masuuliyiinta kulankaas ka hadashay ee saxaafadda ka
socday sheegeen inay saxaafad ahaan ka xun yihiin wararkii sababay
in wargeyska Hubaal la xayiro, isla markaana xukuno lagu rido
weriyeyaasha wargeyskaas, kuwaasoo madaxweynaha ka hor caddeeyey
inay damaanad qaadayaan in aannu wargeska Hubaal baahin doonin warar
ka baxsan xeerarka iyo anshaxa saxaafadda Somaliland, isla markaana
aanay dib u dhici doonin in warar meel-ka-dhac ah laga faafiyo
dalalka jaarka ee xidhiidhka saaxiibtinimo ka dhexeeyo Somaliland
iyo wixii wax u dhimaya qaranida iyo masaaliixda guud ee Somaliland.
Waxa kale oo xubnahaasi madaxweynaha u sheegeen inay saxaafad ahaan
diyaar u yihiin in dib-u-eegis iyo dib-u-habayn lagu sameeyo xeerka
saxaafadda Somaliland, balse ay waajib tahay in saxaafaddu qayb
libaax ka qaadato, tallo badana ku yeelato wax-ka-beddelka iyo
dib-u-habaynta lagu samaynayo xeerka saxaafadda, kuwaasoo sidoo kale
caddeeyey in bahda warbaahintu qayb ka tahay horumarka iyo hannaanka
dimuqraadiyadeed ee ka hanno qaaday dalka Somaliland, iyagoo xusay
in dawlad ahaan iyo saxaafad ahaanba ay waajib tahay in markasta la
ilaaliyo danta guud iyo qaranimada Jamhuuruiyada Somaliland.
Wasiirrada Madaxtooyadda iyo Warfaafinta Md. Xirsi Cali Xaaji Xasan
iyo Md. Cabdillaahi Maxamed Daahir (Cukuse) oo iyaguna madaxweynaha
ka hor kulankaas ka hadlay, ayaa sheegay inay bahda saxaafadda kala
shaqeeyeen sidii xal looga gaadhi lahaa arrinta wargeyska Hubaal,
kuwaasoo sidoo kale xusay inay diyaar u yihiin sidii wadashaqayn
fiicani u dhexmari lahayd saxaafadda iyo dawladda Somaliland, isla
markaana saxaafadda loo madaxbannaaneeyo wax-ka-beddelka iyo
kaabista xeerka saxaafadda Somaliland.
Madaxweynaha Jamhuuriyada Somaliland Md. Axmed Maxamed Maxamuud (Siilaanyo)
oo ugu dambayntii hadal ka jeediyey kulanka uu la yeeshay guddida
ergada ah ee ka socotay bahda saxaafadda Somaliland, waxa uu
caddeeyey inay xukuumad ahaan iyo dawlad ahaanba diyaar u yihiin
sidii loo xaq-dhawri lahaa madaxbannaanida iyo xoriyatul-qawlka
Somaliland, isla markaana aanay xukuumad ahaan dhibsanayn
dhalliilaha toosinta ah ee saxaafaddu baahiso, balse waxa uu xusay
in dawlad ahaan, saxaafada ahaan iyo dadweynahaba meel looga soo
wada jeedsado ilaalinta masaaliixda iyo danta guud ee qaranida
Somaliland, maadaama dalku leeyahay cadaw badan, isla markaana aannu
wax icitiraaaf ah ka haysan beesha caalamka, isagoo xusay in aannu
aqbali doonin wixii wax u qarinada Somaliland, waxaannu madaxweynuhu
sheegay inuu aqbalay codsida ergayada saxaafadda ka socotay u
gudbisay ee la xidhiidhay sidii saamaxaad loogu fidin lahaa
weriyeyaasha xukunku ku dhacay ee wargeyska Hubaal iyo sidii
xayiraada looga qaadi laha wargeyskaas.
Kulanka dhexmaray masuuliyiinta ka socday saxaafadda iyo
madaxweynaha Jamhuuriyada Somaliland, ayaa muujinaya sawir tilmaan u
ah in xubno aan xilal qaran hayn ay ka ergeeyaan, isla markaana
waanwaan ka galaan arrin khilaaf abuurtay, socdaana ilaa halka ugu
saraysa ee dalka looga talliyo, kadibna xal ka gaadhaan muran taagan,
taasoo Somaliland mooyaane aan inta badan ka dhicin dalalka caalamka,
iyadoo arrintaasi tilmaan u tahay hab-dhaqanka wada-tashiga ee
Somaliland ku caano-maashay.
Timacade News Desk
Hargeysa , Somaliland
|