Madaxda Kulmiye oo si
ballaadhan loogu soo dhaweeyay Degmada
Darasalam oo Xisbigu Xarun ka furtay
Dadweynaha ku dhaqan degmada
Daarasalaam oo ay hoosyimaaddaan degaanno ballaadhan oo ku yaal
woqooyiga caasimadda Hargeysa, ayaa shalay soo bandhigay culayska
taageerada miisaanka leh ee ay u hayaan xisbiga mucaaridka ah ee
KULMIYE.
Cududa bulshadaasi muujiyeen, ayaa lagu soo bandhigay xaflad
ballaadhan oo loo sameeyey xarun cusub oo xisbiga KULMIYE ka furtay
degmada Daarasalaam, ayaa waxa ka qaybgalay masuuliyiin sare oo ka
tirsan KULMIYE oo uu horkacayey guddoomiye-ku-xigeenka 1aad Md.
Muuse Biixi Cabdi, kana mid yihiin afhayeenka xisbiga Maxamed Kaahin,
xoghayaha guud ee KULMIYE Mdr. Kayse Xasan Cige, Axmed Muxumed Madar,
masuuliyiin kale oo xisbiga ka tirsan iyo boqolaal dadweyne ah oo ka
kala yimi deegaannada hoos yimaad Daraasalaam.
Munaasibada xisbiga KULMIYE ku furtay xaruntiisa Daarasalaam oo
ahayd mid si heer sare ah loo soo agaasimay, ayaa dadweynuhu weftiga
KULMIYE u soo dhaweeyeen si diirran, iyaga oo taxnaa waddada
magaalada dhexmarta, waxayna odayaasha iyo waxgaradka reer
Daraasalaam ee goobtaa ka hadlay soo bandhigeen dhibaatooyinka
laxaadka leh ee haysta bulshada oo ay ugu muhiimsanayd
diiwaangalintii xukuumadda Rayaale ka horjoogsatay deegaannada
woqooyiga Hargeysa ee ku teedsan xeebta.
Guddoomiye-ku-xigeenka 1aad ee xisbiga KULMIYE Md. Muuse Biixi Cabdi
oo ugu dambayntii xafladaas soo gunaanaday ayaa si wayn ugu mahad
naqay dadweynaha reer Daarasalaam, waxaanu sheegay in dhibaatada iyo
dulmiga ay tirsanayaandadweynuhu ay yihiin qaar ay abuureen dad ka
tirsan deegaannadooda.
Afhayeenka xisbiga KULMIYE Mr. Maxamed Kaahin Axmed oo munaasibaddaa
hadal ka jeediyey, ayaa sheegay in dhibaatooyinka dadweynaha reer
Darasalaam tirsanayaan yihiin qaar ay la wadaagaan dhammaan
gobollada iyo degmooyinka dalka, marka laga reebo diiwaangalinta loo
diiday oo iyaga u gaar ah saamayna ku yeelatay xuquuqdooda
muwaadininimo, isaga oo u soo jeediyey dadweynaha ku dhaqan
deegaannada waqooyiga in ay iska ilaaliyaan cadaawada uu Rayaale ka
dhex abuuro iyaga iyo deegaannada kale ee darsikooda ah ee la
leeyhay dhulbaa la siinayaa.
Waxaanu xusay in Burco oo ah magaalo madaxdii labaad ee dalka ay ka
shaqayso lacagtii giimbaarta ahayd ee Siyaas Bare, isla markaana
dhaqaalihii dalku baaba’ ku sugan yahay, sidaa darteedna aanu Daahir
Rayaale xaq iyo wax xuquuq ah oo lagu dooran karo ku dhex lahayn
bulshada dhexdheeda.
“Rayaale, wax xuquuq ah oo uu idinku leeyahay ma jirto, dhaqaalihii
dalka ayuu baabiiyey, waxaanu qaataa mushar ka badan ka madaxweynaha
Maraykanku qaato, baloodho xeedho laga iibiyey ayaa la leeyahay waxa
lagu dhisayaa biriijkii Hargeysa, lacagtii biriijkana waxaa qaatay
Ina Rayaale, tii dekedana wuu ku darsaday, markaa baloodhada xeedho
laga iibinayo waa in lagu horumariyaa Daarasalaam,” ayuu yidhi
Maxamed Kaahin.
Waxaanu intaa raaciyey “Daarasalaam waa meel taariikhi ah ee cid aan
garanayn doorateen oo xil u dhiibateen ee idinku Oromo iyo ajaanib
midna maydaan noqon ee waa la idn garan waayay, KULMIYE wuu idin
garanayaa, wuuna idila joogayaa horena wuu idiinla joogay markii la
gaajaysnaa ee halganka lagu jiray, hadii aad na doorataana waanu
idinla joogi doonaa, cashuurtiinana idinka cuni mayno oo waxbaanu
idiinku qaban doonaa.”
Waxa iyaguna madashaa hadalo isku ujeedo ku soo ururayay ka jeediyey
Axmed Muxumed Madar, Guddoomiyaha gobolka Hargeysa ee xisbiga
KULMIYE, Xamarje, Jiir Cali Madoobe iyo gudoomiyaha garabka Haweenka
KULMIYE ee gobolka Hargeysa, kuwaasi oo dhamaantood halkaa ka
jeediyey hadalo ku isugu soo biyo shubanayey dhaliilahah ragaadiyey
maamulka madaxweyne Rayaale iyo sidii bulshada reer Somaliland, gaar
ahaan dadweynaha Daarasalaam kaalin muuqata uga qaadan lahaayeen
sidii isbedel wax ku ool ah looga hirgalin lahaa dalka.
Mr. Kayd Xaaji Ismaaciil oo ka mid ah odaayaasha reer Daarasalaam,
ayaa caddeeyey in bulshada ku dhaqan deegaannada woqooyiga Hargeysay
dulmi badan ku qabaan dastuurkii dalku lahaa, isaga oo xusay in
madaxweyne Rayaale horjoogsaday xaqii shacbigu u lahaayeen in ay
noqdaan muwaadiniin codayn kara.
“Meeshan UDUB ayaa shakaal ku xidh-xidhay oo wax allaale iyo wax loo
qabtay haba yaraatee ma jirto, xaqii aanu u lahayd codayntana meel
kasta waanu la marnay oo waxaannu dhaafin kari waynay xafiiska
Rayaale, isagaana si badheedh ah isu hortaagay, laakiin insha Allaah
waxaanu ku beddeli doonaa awood shacbi, taladana KULMIYE ayaannu u
dhiiban doonaa,” ayuu yidhi Kayd Xaaji Ismaaciil.
Idiris Cabdillaahi oo ka mid ah odayaasha qurbo-joogga ah ee reer
Daraasalaam oo munaasibaddaa ka hadlay, ayaa sheegay in bulshada
Somaliland fursado badan iska lumiyeen markii ay doorteen Daahir
Rayaale Kaahin, sidaa awgeed aanay wakhtigan qurux badnayd in la
calaacalo, balse loo baahan yahay sidii aan mar labaad dayacaadda
looga ilaalin lahaa fursadda la haysto, waxaannu ka digay haddii
taliskaa jira dib loo doorto in calanka Somaliland baabi’i doono.
Isaga oo arrimahaas faahfaahinayeyna waxa uu yidhi; “Dadkani fursado
badan ayay iska daayaceen, in wakhtigan la calaacalona maaha,
dhulkiinii baa laqaatay oo loo diiday in aad ku heshaan wixii aad
xaqau lahaydeen, taliskaa maanta jira ee Ina Rayaale hadduu mar
labaad innagu soo noqdo calanku wuu baaba’ayaa. Dhibaatooyinka idin
haysta dalkoo dhan baa idinla qaba oo Hargaysa oo caasimaddii
Somaliland ah waxay noqotay xero qaxoonto oo ballaadhatay, biyo
la’aan baana dishootay, waxaanay markasta indhahaagu ku dhacayaan
hooyooyin iyo dumar tabaalaysan oo caagado madhan biyo la raadinaya
amma sidii qaxootiga saf dheer ugu jira kaalin biyood. Markaa waxaan
leeyahay hadii KULMIYE doorashada guulaysto dhulkii, dalkii iyo
dadka wada baaba’ay ayuu dib-u-dhis ku samayn doonaa, innaguna sidii
taasi u hirgali lahayd aynu ka wada shaqayno.”
Waxa kale oo xafladdaa ka hadlay Cilmi Jaamac oo ka mid ah odayaasha
ugu da’da wayn degmada Daarasalaam, waxaannu yidhi; “Maanta Ina
Rayaale Oromo iyo Jaarso ayuu naga dhigay oo wuxuu noo diiday
kaadhkii muwaadinimada iyo kii codbixntaba, dalkana wax allaale iyo
wax xaq iyo xuquuq ah oo aannu ku leenahay ma jirto. Aniga oo
da’daas ah ayaa la iga horjoogsaday in aan codeeyo oo ciddii aan
doono ku soo saaro rabitaankayga, wixii aanu arrintaasi ka
yeelaynana waannu ka tashan doonaa haddaanu nahay dadweynaha ku
dhaqan deegaannada woqooyiga, waxaanan leeyahay UDUB Ilaahay naarta
ha ku fogeeyo dhiiggii bay naga jaqday oo xuquuqdayadii bay naga
lumisee.”
Odayaasha iyo waxgaradka reer Daarasalaam ee munaasibaddaa ka hadlay
waxay xoog uga cawdeen waxqabad la’aanta iyo tayo xumada xukuumadda
Rayaale, iyagoo ku dooday in aanay wali arag madax ka socda
xukuumadda oo baahidooda qiimeeya, waxna ka qabta, waxayna odayaashu
xuseen in deegaanka oo ah beeralay aanu weli wasiirka beeruhu u iman
si uu xogogaal ugu noqdo duruufaha qallafsan ee beralayda haysta.
Waxa kale oo dadweynuhu cabasho weyn ka muujiyeen cawdeen wado
xumada haysata deegaannada woqooyiga, iyaga oo sheegay in cashuurta
dalwaddu ka gurato dadka deegaanku ay dabooli lahayd dhaqaalaha ku
baxaya dhismaha iyo dayactirka waddada maristeedu dhibaatada badan
tahay ee isku xidha Hargeysa iyo Daraasalaam.
Ururrada haweenka degmada Daarasalaam, ayaa iguna soo bandhigay
dhaliilaha ay dumar ahaan u hayaan xukuumadda talada haysa, iyaga oo
si buuxda u ballanqaaday in ay hiil iyo hooba la garab taagan yihiin
sidii xisbiga KULMIYE gacanta ugu dhigi lahaa talada dalka.
Somaliland.Org |