Maareeyaha
Dekedda Berbera Oo Sheegay In Ay Dekadu
Camirantahay Maraakiibtuna Ay Toos Uga
Maareeyaha Dekedda Berbera Somaliland Eng. Cali Cumar [Cali
Xoor-xoor] ayaa shaaca ka qaaday labadii todobaad ee u danbeeyey
inay Dekeda soo gaadheen Maraakiib-waaweyn oo laga rogay 65 Kun oo
tan badeecado ah. Isla markaana ay Dekeda ku soo waajahan yihiin
Maraakiib-waaweyn oo uu rajaynayo inay labada sanadood ee soo socda
badeecadaha ka soo dega dekedu ay gaadho 1 Milyan tan.
Sida waxa uu Maareeyuhu ku sheegay Wareysi uu siiyey Idaacada BBC-da
Laanta ku hadasha Afka Soomaaliga
"Dee waxa weeyaan waadigaa arka oo way camiran tahay Dekaddu, imika
waxaanu rognay 56 kun oo Tan 13kii maalmood ee u dambeeyay, sanadkii
hore Dekadda waxa ka soo degay 156 Milyan oo tan. Labada Sanadood ee
soo socdana waxaanu ku rajo waynahay in aanu gaadhno 1 Milyan oo
Tan, taasoo dhaqaalaha wadanka wax wayn ka tari doonta. waxaan u
arkaa dhaqaale wadanka u soo kordhaya iyo dhaqaalaha oo kor u sii
kacaya." ayuu yidhi Maareeyaha Dekeda Berbera Cali Xoor-xoor oo ka
hadlayey sida uu yahay dhaqdhaqaaqa Dekeda Berbera ee wakhtigan iyo
waxa u soo kordhay amase hoos uga dhacay.
Mar uu Maareeyaha Dekeda Berbera Eng. Cali Xoor-Xoor sharaxaad ka
bixinayey Maraakiibta wakhtigan soo gaadhay Dekeda Berbera halka ay
ka yimaadeen, waxa uu uu yidhi "Waxay ka yimaadeen Hindiya iyo
Brazil, Sibidhka Bariiska ayaa ka yimi Hindiya iyo Pakistan,
Ramadaantii wixii ka danbeeyay iyo ilaa imika ayaa badeecaddu aad u
badan tahay oo aanu rognay, walina dekaddii way buuxdaa maraakiib
kalena way soo socdaan"
"Inkasta oo ay badeecaddu iska badan tahay, Sonkorta ayaa aad u
badnaa Koontiidharada, Sibidhka Daqiiqda iyo Saliidda. Maraakiibtani
toos ayay uga yimaadeen Brazil halkan ayay ku soo xidheen waxaa leh
Ganacsatada reer Somalialnd,"ayuu intaasi raaciyey Xoor-xoor.
Eng. Cali Xoor-xoor waxa uu ku dooday inay jiraan ganacsi ay
leeyihiin dadka reer Koonfureedku ay maraan Dekeda Berbera, isla
markaana uu soo korayo Ganacsigoodu,"Reer Xamarku Baddeecado ayey
keenaan, Ganacsi badan oo ay leeyihiin ayaa mara Dekadda wuu soo
korayaa Ganacsigoodu."ayuu yidhi.
Mar uu ka jawaabayey Eng, Cali Xoor-Xoor Su'aal ahayd, Inay
Ganacsatada reer muqdisho badeecadaha ay kala soo degaan Dekeda ay u
gudbiyaan koonfurta Soomaaliya, waxa uu yidhi"Si joogto ah ayay
Doonyahaduu u keenaan badeecadaha, Bariis badan ayay Doonyo ku
keenaan reer Xamarku, Hindiya iyo Pakistan ayay ka keenaan.
Ganacsigan ay Reer Somaliland sameeyaan ayay la sameeyaan. Laakiin
toos waxba uma gudbiyaan."
Mar iyana la weydiiyey Su'aal ahdy saamaynta ay badaha Somaliland
iyo Dekeda Berbera ay ku yeelatay Budhcad-badeeda ka qawlaysata
Xeebaha Soomaaliya waxa uu yidhi: "Horta arrinkaasi wuu jiraa waana
Masiibo ku soo korodhay, ma jirto wax saamayn ah oo ay nagu yeesheen
ma jirto, waxaanan rajaynaynaa in aanay dhibaatadu nagu soo kordhin."
Mar iyana la weydiiyey inay Somaliland iska dhicin karto
Budh-cad-badeeda haddii ay ku soo fidaan Xeebaha dalka, waxa yidhi "Ciidan
Badeed ayaanu leenahay, Somaliland badeehadu waa ammaan oo budhcad
malaha, xeebaha Somaliland waa ammaan min Bari ila Galbeed,
ilaaladooduna waa ilaalinaa, haddii nalaga gar-darraado maxaanu u
soo furan waayay haddaa miyaa laga fadhiyayaa, hadii ay waxaasi
yimaadaan."
Waxa uu sheegay Maareeyaha Dekedda Berbera inay Maraakiibta siday 56
kun ee tan ay ka rogeen Xamaaliinta iyo Geeleyaasha, isla-markaana
marka ay Maraakiib badani timaado ay dadweynaha ku dhaqan magaalada
Berbera ku war-geliyaan inay alaabta wax ka rogaan oo dadka kala
shaqeeyo arrintaas
Mar iyana wax laga weydiiyey, inay saamayn ku yeelatay ganacsatada
la soo dega Bagaashka cashur-kordhintii Wasaaradda Maaliyadda
Somaliland."Waxa weeyaan Bagaashka Cashuurtiisa Laba jeer ayay
dhintay Wasaaradda Maaliyaddu cabasho badan oo ka taagana maan arag,
markaa arrinkaasi wuu iska soo dhamaaday ayaan filayaa."
Source: Hadhwanaagnews
|