Maareeyaha
Dekeda Berbera oo Ka Hadlay Qorshaha
Horumarinta Dekeda iyo arrimo kale
Maareeyaha Dekeda Berbera Eng
Cali Xoor-xoor, ayaa warbixin kooban naga siiyay sida ay Dekedu u
shaqayso, Dekedu heerka ay maanta marayso, Qorshaha horumarinta
Dekeda iyo saamaynta budhcad badeeda ee Dekeda.
Maareeyuhu isaga oo ugu horeyn ka
hadlaya sida ay dekedu u shaqayso waxa uu yidhi “Waxa aanu u
shaqaynaa si taabo gal ah, oo farsamaysan iyo nidaam dakadeed oo
dhamays tiran ayaanu ku shaqaynaa, wixii hawl ah ee dekeda yimaada
iyo wixii ka dhoofaya wixii soo degaya, dejintooda, raristooda ,
nidaamintooda , sida ay u shaqaysana ma soo koobi karo, 24-ka
saacadoodna way shaqaysaa” ayuu yidhi Maareeyaha Dekeda Berbera.
Maareeyaha Dekeda Berbera Eng Cali Xoor-xoor, isaga oo ka hadlaya
Dekedada halka ay maanta marayso waxa uu yidhi “Dekeda waxa aanu soo
gaadhsiinay heer deked caalami ah oo Soomaali oo dhan u shaqaysa ay
noqoto ayaanu soo gaadhsiinay, qalabkeeda iyo tababarka shaqaalaha
halka ay marayso maanta waa meel aad u saraysa, shaqaaluhuna dhinaca
aqoonta way ka dhisan yihiin oo waxa aanu la tartamaynaa Dekedaha
caalamka”.
Mudane Cali Xoor-xoor isaga oo sii wata hadalkiisa waxa uu yidhi
“Badeecaduhu way is bedelaan , waa tii raashimadu qaali garoobeen ,
inkasta oo ay qaali garoobeen hadana hoos u dhac caynkaas ahi ma
jiro , waxaad moodaa in intan danbe ay badeecaduhu Kontiinaro ku
imanayaan, laakiin badeecaduhu way kordheen sanadkan”.
Maareeyuhu isaga oo ka hadlaya Qorshaha horumarinta Dekeda waxa uu
yidhi “waxa noo qorshaysan in dekeda la dhiso oo dib u habayn casri
ah lagu sameeyo, oo la kordhiyo , mar kasta Dekedu way buuxdaa oo
badeecadaha soo degayaa way soo badanayaan weliba wakhtigan, markaa
waxa aanu u raadinaynaa maalin gelin Dekeda iyo in deked kale laga
ag dhiso”.
Mudane Cali Xoor-xoor isaga oo ka hadlaya saamaynta budhcad badeeda
Putland , waxa uu yidhi “Budhcad badeedu waa mushkilad weyn oo ka
jirta gobolka oo dhan, saamaynteeduna waxa weeyaan mushkilada
jaarkaagu kolay way ku saamaynaysaa, xaga badeecada wax saamayn ah
oo ay nagu yeelatay ma jirto hadda”.
Dekeda Magaalada Berbera ayaa beryahan dambe waxa ka muuqda horumar
weyn oo ay ku tallaabsatay , iyada oo bulshada reer Berbera intooda
badani ay u shaqo tagaan Dekeda oo ay ka helaan shaqooyin.
Source: Somalilandnation.com
|