|
Shaxda deelka laga
dago
Anoon wali ka daanshoon
Degalkeeda aan dagin
Murtidana ka daydayin
Baa xiiso duug ihi
Gaar iigu daaroo
Inaan deelka ka higado
Igu doco doceeyoo
Da’da daabac igu yidhi
Dalba juuqna ka ogaw
*******
Afartaa afeef dub ah
Wixi deelka igu gubay
Afar kalena daymada
Waxay daaran tahay waa
*******
Diirane dhulkeenaas
Daayin keen barwaaqada
Dockastaba ka jiifshee
Degelkiisu wacan yahay
Durdurada biyaha iyo
Dooxyadu is celiyeen
Waa dagal barwaaqoo
Ninka daymo raacee
Hadba dacal ka eegee
Dalxiis ugu baqoolee
Ku dakeeya raaxada
Naftu waa u dagaysaa
*******
I. Ninkadaymo aadee
Dagalkii jacaylkiyo
Saylac daafaheediyo
Sacaadadiin dabaashee
Qol ujeed dadkeediyo
Lawyacado dacalkii
Dalka koonihiisii
Maalmo yara dawaafee
Buurta saw dusheediyo
Dihineey camuud iyo
Laalays docdeediyo
Dila iyo wajaaliyo
Baki daamaheedii
Awdal oo dhan dacalada
Boorame ku daanshada
Naftu waa u dagaysaa
*******
II. Dalaga iyo saraciyo
Daangada bislaatiyo
Cunto wada daraayoo
Dal shisheeye ka imaan
Ninka yara daneeyee
Gabilay ka doontee
Arabsiyo ka daydaya
Saylana dalxiisee
Caanaha durduurtee
Alleybadayna yara daga
Baligubadle daamaha
Salaxlayna daawada
Dararweyne yara mara
Cadaadley dixdeediyo
Sabowanaago doogloo
Danbarsame ku hooriyo
Dhamaan dagalka waaheen
Almis daafaheediyo
Daarosalaam dhankeediyo
Durdurkii biyaha iyo
Darkii lagu shahiidiyo
Geed-deeble halacsada
Maroodijeex dixdeediyo
Halka laga dabqaatee
Dalka ugu horaysee
Caasimadi doorka ah
Dalsan waa hargeysee
Ninka daymo daymada
Baryo nolol ka daydaya
Indhahana ku doojiya
Naftu waa u dagaysaa
*******
III. Dugsigii labaadee
Jacaylku uu dakeeyiyo
Batalaale dagakii
Boodhari ku duugnaa
Xeebta daafaheediyo
Badda doobinaysiyo
Adoo daawasho utaga
Dacarbudhuq qadiimkii
Daarihii isdhalan rogay
Duugeeda bullo xaar
Adigoon kadigo rogan
Dariskii mandheeriyo
Dadxejiye halkuu haa
Duuduub adoon galin
Dusha uun ka daawada
Sheekooyin doorana
Maskaxdaa ku duubtoo
Buuraha dulmeeroo
Warshadii doraatiyo
Cumar ku jog dalxiis wacan
Nafta ugu daneeyoo
Duburaha biyaha wadhan
Macdantaa dul joogsada
Dabadeed dalxiis kale
Dagalkii tacliintiyo
Cimilada dirsooca ah
rabbi deeq usiiyee
Dambarsamaha roobkiyo
Dooguna ka diga rogan
Barti loogu dawgalay
Dagalkeeda sheekh daga
Maalmana dul meeree
Aad yara dakaantide
Dawgeeda laba mara
Duuduub dhamaantiis
Saaxil oodhan daafaha
Halka doobiga u culan
Anfacaan dajinaynaa
Halka uu ka soo dago
Dakada iyo haamaha
Ninka daymo aadee
Baryo diifta roga ee
Badda diibta wacan iyo
Daamaha berbera iyo
Saaxil oodhan dacalada
Soo dalxiisa waayaha
Naftu waa u dagaysaaa
*******
IV. Duunyada nimcada iyo
Deegaanti xooluhu
Daaqsinkeeda buuxeen
Sayladoodi dagalkii
Laga soo daldali jiray
Dalxiis way ku wacantee
Dulmi maaha socodkuye
Diilalyada bal reeboo
Duruqsi iyo bali-dhiig
Oodweyne dooxii
Waraabeeye dabaqabad
Ka durduuro caanaha
Doomaarta wacaniyo
Dabaqorile aadoo
Dooxa beer halkay hayd
Caladhiyaha darkiisii
Udugiisi daaraa
Geed-xamarki dihinaa
Baryo yara dawaafoo
Udugiisi dooraa
Sanka daawasho ugee
Cadarbuu la dabaqyee
*******
Dalka wadamaroo orod
Buuhoodle dacalkiyo
Qori lugud dusheediyo
Dixidii qoryaaliyo
Dureemadii artala iyo
Sinti dabadi buur dhaab
Unuun lay darkeedii
Dulmadoobe aradkii
Taariikhdi duugayd
Koofil uu ku duugnaa
Dalxiis oo bal soo arag
*******
Intaas oo dal aan maray
Dogobkay shidaayaan
Halka uu ka daarmaa
Burco,dagalki raaxada
Ninka daymo daymada
Togdheer oo dhan dacalada
Dalxiis wacan ka laba daga
Naftu waa u dagaysaa
*******
V. Afrikaba dal waxa jira
Dagaalkii qadhaadhaa
Markii laysu dadab galay
Dohda laysu jiifsaday
Daartii ugu horaysee
Dusha laga rusheeyee
Loo diray dayuurada
Taleex waa dalkeenee
Mahadhada ka doondoon
*******
Dalxiiskana ku raacdee
Caynaba darkeedii
Dawliskiyo ceelkii
Xudun iyo danlaytiyo
Kirir yara dalxiisoo
Baholihii dabraayiyo
Xargaga daawashada gee
*******
Awrka doobinaayiyo
Ramad geela dhalay iyo
Danankaa fardaha iyo
Kaymaha dirsooca ah
Waayo soo dulmeeroo
Dugsi laaski caanood
Sool oodhan duuduub
Dunjigeeda soo arag
Duxda caanaheeediyo
Dufan baad ku imanoo
Naftu waa dagaysaa
*******
VI. Dhul dalxiis ku wacanoo
Aasaarta duuga ah
Daayin deeq u siiyoo
Dunidaba dhif uun ku ah
Dadsamee haday tahay
Ama kuwa dabiiciga
Ninka yara daneeyee
Daalo iyo dhirteedii
Ka dulmara daruuraha
Dayibka iyo beeyada
Fooxa daaran udugiyo
Kuwa cadar ka doorka ah
Caafimaad dawo ah iyo
Dabiibikii dhirteeniyo
Shanbogsiye ka doon doon
*******
Surad daafaheediyo
Siraadlay docdeediyo
Buurtii dawaafkood
Shinburuhu duldagi jiray
Badda dogobka ku ahayd
Rabshigii dushiisiyo
Calmadaw dulmeeroo
Deexadeeda laas qoray
Ka daldalo kaluunkoo
Dhahar daafaheedii
Ceelaayo dacalkale
Iyo dagalki badhaneed
Ka durduuro caanaha
*******
Dayaxiyo garadag iyo
Dagalkii qadiimkee
Odayada duntoodiyo
Qabrigood ku duugnaa
Xiis daaqsinkeediyo
Dakadeeda maydh aad
Aad dirkeena baratide
*******
Xoolaha dareeree
Meesinkeena duunyada
geela kuruska dabaqiyo
Dibyar adhiga gurigiyo
Dudo maqasha tuban iyo
Deegaw fardaha wacan
Danan kooda soo maqal
*******
Duurjoog ugaadhaa
Deeradiyo baciidkiyo
Garanuugta duushiyo
Dubka iyo garigaba
Dunjigooda soo baro
*******
Dermo ceel afweyn iyo
Dooxadii buraan iyo
Docolkii madheedh kiyo
Deexadii sanaag iyo
Daaski ceeri gaabiyo
Daarihii haadaftimo
Ninka daymo aadee
Baryo soo dalxiisee
Deegaanta wacan iyo
Cimilada dirsooca ah
Hadba daansho daanshood
Dacalada ka laba mara
Dalkalaba madooneen
*******
Aniguna dantaydiyo
Maansada da’layda ah
Dacwadeedu waxay tahay
Adigoo dalkaa laad
Waagii dilaacaba
Aad ka sii dabayshaa
Duli aad ka jeceshahay
Malabkaa durdurayaad
Dacar aad ka doontaa
Dulinimo xanuun laad
Debed yaal utahayoo
Duleedbaad ku orodaa
Aad dawarsanaysoo
Dalaayad uu nin leeyaad
Hadhka aad ka doontaa
Dad waxaad ku tahaybaad
Aad ka sii durkaysaa
Liidnimaad dugsanaysaa
*******
Aniguna dabuubtii
Deelaydi maansada
Waxaan deelka kaga baxay
Deeqtoon ayaan nahay
Dalkeenaa barwaaqo ah
Dayaxiyo daruuraha
Inagaa dul mari karna
Hadaan maanka dugsanoo
Maskaxdeena daarano
*******
Ninkaan dawarsanaynaa
Isba hooya dihatee
Dadka waan lasimanee
Liidnimada daciifkiyo
Dulinimada an reebnoo
Daljir wada ahaanoo
Dalka aan dhaqaajino
*******
Wa biaalhi tawfiiq
5 |
