XUSKA APRIL 6: MAALINTA SNM IYO XUSUUS TAARIIKHEED
By: Ahmed Hassan Arwo
Waxay ahayd 6/6/1981, maalintii aasaaska SNM, goob joogbaan u ahaa.
Waxaan ku jiray
jaamacadda London oon ka samaynaayey MSc London School of
Economics.Waxa gurigayga ku soo degay Alle ha u naxariistee
Guddoomiyihii u horeeyey ee SNM, Muj. Axmed Jimcaale.Waxay ahayd
maalin dareenka dadku isku jir yahay. Maalin farxad iyo werwer isagu
jirtay. Waxa rag badan oo u badan odayaashii ku raagay dalkan oo
dacaayad xoog leh laga dhaadhiciyey ay aad uga baqayeen waxa loogu
yeedhay u shaqaynta cadowga iyo nabad la'aanta ka dhalan karta
halganka.
Dadka warka dalka u dhow, iyo dhallintu waxay u ahayd maalin guul
iyo xorriyad saadinaysa.
Socodku waa taalaabooyin isku biiray. Waxay arkayeen, in talaabada
maanta la qaaday noqon doonto tii dalka ka badbaadin lahayd dulmiga
iyo boobka gaamuray. Tii iftiimin lahayd dariiqa rajada iyo
ididiilada.Waxay ahayd maalin wufuudda ka timid qurbojooga reer
Somaliland aan lagu soo xulin jib iyo qaybin qabiil. Waxay ahyd
dulmi gaar loo calaamadsaday iyo intii ka gadooday. Waxa isku keenay
badbaado iyo naf la carar. Waxa loogu soo galay godkii ugu dambeeyey
iyo gurigoodii. Ma ahayn dad dagaal jecel ee wey ka maarmi waayeen,
kolkii xukunkii jiray go'aansaday dil, dhac iyo burbur iyo barakac
cid gaar ah la birtilmaansaday.
Qiimaha iyo qiirada dhismaha SNM waxa si cad u muujiyey habka wacan
ee wufuudda loo soo xulay. Waxa ka yimid Jeddah, Riyaad, Abu-Dhabay,Kuwait,
Qadar iyo magaalooyinka Ingiriiska, rag aan loo qaybsan beelo, rag
loo eegay kaalinta ay kaga jireen halganka. Ma jirin wafdiga
imisaynu ku leenahay. May jirin golaha, ayaa inoogu jiraa, ma ay
jirin wax ka badan magacaabid aan cidini ku tartamin. Waxay ahayd
garasho sare, oo ka dhalatay damqasho taabatay dhammaantood. Reeraha
maanta Internetka isu galay waxay ahaayeen rag isku duuban, runta
isu sheega oon qabiil u xagliyin. Waxa loo dhaqmaayey sida qoys
keliya oo walaal,aabe iyo hooyo ka kooban.Ixtiraam ka weyne leeyahay,
ka wax yaqaan laga dambeeyo, ka jilicsan loo naxo, ka yar la
taakuliyo, ka jiran loo jarmaado. Wa xusuus damqaysa xididada
maskaxda oo kicinaysa garaaca wadnaha.
Waxa aan xusuustaa maalin aanu fadhinay gurigayga oo nin golaha
fulinta ee SNM loo doortay oonu qoys hoose isku nahay si xun ula
hadlay guddoomihii SNM, kolkaas waxa si la yab leh u booday Xasan
Ciise Jaamac oo isna ka tirsanaa golaha fulinta, isagoo hadal birta
ka adag ninkii ku yidhi, kuna kalifay inuu xaal bixiyo. Waxa la ahaa
walaalo, aan abtirsiin silsiladaysan lahayn. Ab keliya iyo hadaf
keliya leh. Xasan Ciise odhaah dahab ah ayuu yidhi" Hebalow haddaad
kuwan iga kaa xiga aad ku haysato dil casri jaahiligii dhac iyo
boqolaal sano, anaga ood madax noo tahay hadh ma noo jiideysaa..."
Wuu khajilay oo uu madaxa ka dhunkaday Axmed Jimcaale. Ma ahayn sida
maanta muran muran ka hor gee, ma ahyn dafiraad, ma ahyn gar diid,
ma ahyn is giijin iyo been la subko. Qaladka dhaca si hawl yar ayaa
looga bogsanaayey, waayo himmilo sare ayaa la tiigsanaayey.
Waxa soo dhacaayey telefoono afarta jihaba ka imanaayay. Wa bushaare
iyo bogaadin, waa farxad iyo reynreyn loo dhan yahay. Waxa toosay
dareen wax badan hurday.Waxa is taagay geesiyadii naftooda nacay.
Waxa bilaabmay dariiqii xoriyadda, waxaana isla markaas bilaabmay
burburkii faqashta.Waxa laga ladi waayey, guryahii lagu dhistay
booli qaran. Waxa bilaabmay gaaf-wareeg iyo hurda la'aan ku habsatay
kuwii xaaraanta xalaashaday.
Laba cisho ka dib, waxa aan arkay gabadh uu dhalay Xuseen Kulmiye oo
ahaa Madaxweyne ku xigeenkii faqashta oo ahayd 2nd Secretary
Safaaradda London.Waxay ahayd qof aad u fiican oo waxtar wadani
leh.Waxaa dhacday in loo diido ragii bad maax aha (seamen) in loo
jadiidiyo basaboorada. Iyada ayaan u gayn jiray oo si hoose noogu
jadiidin jirtay. Hadaba maalintaas, waxay ii sheegtay in safaaraddii
fadhi la'day oo canaan iyo cay uga imanayso Xamar, la leeyahay waa
inaad wax kasta samaysaan ood ku joojisaan dhaqdhaqaaq SNM, waxa loo
soo diray lacag siyaade ah oo arrintan lagu fuliyo. Waxa la adkeeyey
basabooradii. Waxay se taasi dhalisay arrin la yaab leh. Badmaaxa oo
ku faani jiaray Somalinimada diidaynay inay jinsiyadda dalkan
qaataan, ayaa markiiba tan dalbaday. Waxay helayn dhalashada
Ingiriiska si dhekhso ah. Waxaan bilaabantay in laga maarmo
hanjabaadii iyo dulaysigii guriga jahliga iyo dulmiga.Waxayna
dhaxantii ka duulisay intii arrinta baasaboorku ku kaliftay inay SNM
ka maagaan.
Bal sawirkaas ag dhig maanta.Waxaad arkaysaa inaan weli la gaaadhin
hadafkii, in dad badani daalay, in ay jiraan dar ku hawlan jid
goyn.Waxa jira cadow debed iyo gudaba u heelan burburka intan la
gaaadhay.Waxaad arkaysaa sida loo kala jabinaayo raggii dhufayska ku
walaaloobay.
Geedigu wuu socdaa, waxaana horseed u ah isla kuwii hore u
dhaqaajiyey dalka. Ninkii daalaa dalka kama dhalan. Bohol
kasta,booraan kasta iyo buur kastaba waa la jiidhi oo la fuuli.Habka
loo diriraa ma aha qorigoo keliya. Kaas weynu ka gudubnay. Waxa
maanta loo bahan yahay inaan qalinka, iyo fikirka isu gayno. Inaan
codka shacbiga uruurino. In foodka lagu muujiyo habkii lagu gaadhi
lahaa hanashada himilada dadweynaha. Waa inaan iska jirnaa hebel
hebal ka hor keen, reerna reer ka hor keen, qoysna qoys ka hor
keen.Marka wax laguu sheego ha la boodin, baadh, ka baaran deg, oo
miyir u qiimee. Is weydii waayo? Maxay? Halkee?Sidee?.Hubsiimo
halbaa la siistaa.Talada aan la ruugin waa lagu rafaadaa. Rog rog
deedna u dooro ninka hiigsigaas ku gaadhsiin kara.
Maanta waxa inala gudboon inaynu wacyiga siyaasiga kor u qaadno.
Inaan furfurnaanta shacbiga ka dheeraano. Inaynu qabsano tiirka
distoorka iyo sharciga. Inaan cisayno ciddii halganka inoo
horseeday, inaynu u mahadnaqno geesiyadii SNM ee guusha inta la
gaadhay u dhimatay, u dhaawacantay una maal beeshay.Waa inaan
baranaa sida aynu ugu mahadnaqno shaqaalaha dawladda inta hawshooda
bogata, macalimiinta ubadka inoo korisa, .Waa inaan kala garanaa ka
u damqada dadkiisa shalay iyo maanta.
Weli meynu gaadhin guushii, waxaan hiigsiga ummadda gaadhsiin kara
kuwii u jeexay marinka guusha. Iyagaa dhaliyey wanaaga aynu ku
naaloonaynu. Waxay qotomiyeen tiirka doorashada madaxdeena iyo habka
dimuquraadiga ah. Waxay SNM noqotay jabhadda keliya ee madaxdeeda
doorasho iyo tartan furan ku soo saarta. Waa taas tan inoo
fududeysay inaynu Afrika kaga horeynu nidaamka xisbiyada iyo
doorshooyinka xorta ah. Dadweynow ku aamin masiirkaaga nin
nolashaada kula wadaaga, nin garanaaya geed kasta inta hood joogta
iyo inta hareero joogta, iyo dalka taako taako u yaqaan, iyo dhaqan
miyi iyo magaalo leh, nin khibrad siyaasadeed leh, nin heer kasta
ood maraysay kula joogay ahaana nin u darbaanaa xil gudasho kolba
kaalinta ay joogtay.
Geediga inta ha furaayo ku aamin ninkii sahanka u ahaa.
Ku qiimee kaalinta uu siyaasiga maantu ka qaatay halgankii. Maalinta
ay qadhaadheed, maalintii madfaca iyo hoobiyahu madaxa shacbiga lagu
guraayey.
Ugu dambayn, waxaan tahniyad u diriyaa halyeeyadii SNM ee dhaliyey
dalka Somaliland.La'aantood ma jirteen Somalilaand. Kumaankunkii
dhintay Illaahay ha u naxariisto, kuwa dhaawacmay Illah ha daweeyo,
agoonta Allah ha abaalmariyo. Ha la qiimeeyo agoonta, ha ixtiraamo
qof kasta oo halganka qayb ka ahaa. Waxa iman maalin loo hiiliyo
taariikhda oo qalin dahab ah lagu qoro masiirka ummadda.
Taariikhdeena ma aha SNM keliya ee halgankii gumeysiga kii xisbiyada
SNL, NUF iyo USP dhammaan waa inaynu xusnaa oon manhajka iskuulada
galinaa. Dadka taariikhda ayaa mideysa oo abuurta dareen qarannimo.
Guusha aynu gaadhay xus cidda unuktay ee u hawl gashay, Allena ha
kaashatay. Allow waa mahaddaa.
Ahmed Arwo
samotalis@gmail.com
http://samotalis.blogspot.com/
http://samotalis.blogspot.com/
|