Labada Guddoomiye-mucaarid oo Dalka ka Dhoofay Wakhti ay Taaganyihiin Duruufo Siyaasaddeed

Labada hogaamiye ee xisbiyada mucaaridka ah Md. Axmed Maxamed Maxa muud (Siilaanyo) iyo Eng. Faysal Cali-waraabe ayaa dalka debeda uga baxay iyadoo ay weli taaganyihiin duruufihii muranka siyaasadeed ee ka dhashay dib-u-dhaca doorashada madaxtooyada Somaliland.

Guddoomiyaha xisbiga mucaaridka ah ee UCID Faysal Cali-waraabe ayaa isagu hore dalka uga dhoofey, isagoo haatan ku sugan dalka Imaaraadka Carabta, halka Guddoomiyaha xisbiga KULMIYE Axmed Siilaanyo lagu wado in uu maanta dalka ka amba-baxo, isagoo u kucitimaya dalka Ingiriska, mana jiro war rasmiya oo ka soo baxay labada xisbi-mucaarid oo ku saabsan socdaalka guddoomiyayaasha oo ku soo beegmay xilli aan si rasmi ah xal looga gaahdin murranka siyaasadeed ee dalka hadheeyey.

Maqnaanshaha labada guddoomiye-mucaarid ayaa u muuqata mid sii wiiqaya xal rasmiya oo laga gaadho khilaafaadka siyaasadeed, maadaama talada xisbiyada mucaaridku badanaa ka go’do guddoomiyaasha oo keliya, inta ay maqanyihiina aan la filayn furdaaminta duufaanada muranka siyaasadeed ee u dhexeeya iyaga iyo xukuumadda xilka haysa.

Tegitaanka labada guddoomiye-mucaarid ayaa dadka siyaasada falanqeeyaa waxa ay sal uga dhigayaan hungo iyo guul-darroi siyaasadeed oo ay kala kulmeen loollankii siyaasadeed ee u dhexeeyey madaxweyne Daahir Rayaale Kaahin, kuna hungoobey ka midho-dhallinta damacoodii siyaasadeed ee ay hamiyayeen in at talada dalka qabtaan oo doorashaduna dhacdo wakhti ka horeeya kan immika Guurtida iyo Komiishanku asteeyeen.

Bixitaankooduna waxa uu ka danbeeyey maalin ka dib markii labada xisbi ay si wada jir ah u soo saareen war-saxaafadeed ay ku dhaleecaynayaan xukuumadda, gaar ahaana madaxweyne Rayaale, iyagoo ku sifeeyey saxeex la’aantii madaxweynaha ee qoddobadii guddida dhexdhexaadintu ka soo saareen khilaafaadka siyaasiga ah heshiis la’aan, taas oo macnaheedu noqonayo in aanu jirin wax heshiis ah oo lagu so oaf-jaray khilaafaadkaas.

War Saxaafadeedkaasi oo ay wada jir u saxeexeen Gudoomiyaha Xisbiga Kulmiye Axmed Maxamed Maxamuud (Siilaanyo) iyo K/s Gudoomiyaha Xisbiga UCID Aadan Maxamed Mire (Waqaf) waxay ku yidhaahdeen:

“Qaabka qarannimada iyo hannaanka dawladnimo ee JSL, waxa aasaas u ah Dastuurka Qaranka. Tiir dhexaadka diimoqraadiyaduna waa wada tashi iyo talo wadaag in lagu maamulo arrimaha dawladeed, isla markaana lagu maareeyo khilaafaadka ka dhex dhasha hay’adaha siyaasadeed iyo sharci-dejineed ee dawladda. Khilaafaadka muddadan dambe ka taagnaa Somaliland waxa sababta ugu weyni tahay marka uu M/weyne Daahir Rayaale Kaahin uu si buuxda u diidey in la wada yeesho wada tashi sida uu Dastuurku ku tilmaamayo qodobkiisa 9aad ee ugu muhiimsan oo tilmaamaya “ Nidaamka siyaasadeed ee JSL waxa saldhig u ah, nabad, talo wadaag, dimoqraadiyad, iyo hannaanka xisbiyada badan”.

Labada xisbi qaran ee UCID iyo KULMIYE, iyagoo tixgelinaya danta guud ee qaranka, waxay ogolaadeen go’aamadii ka soo baxay guddida dhexdhexaadinta ee ay sababtay muddo kordhinta is daba jooga ahayd iyo dib u dhacyadii doorashada madaxweynaha.

Labada xisbi qaran waxay aaminsanyihiin in go’aamada guddida dhexdhexaadintu ay dhamaystir noqon karaan marka:

a) Dhinacyada khilaafku dhexmaray ay dhamaantood si rasmi ah u wada saxeexaan.

b) Qodobada uu ka koobanyahay go’aanka guddidu qodob qodob looga wada hadlo farsamo ahaan, loona dhaqan geliyo.

Labada xisbi qaran waxay soo dhoweynayaan haddii ay dhab ka tahay hadalkiisii ku saabsanaa in doorashadii Madaxweynuhu ay dhacayso 27/09/2009 oo aanay ka dambaynayn, iyo in server-ku haddii uu liiska kama dambaysta ah ee cod-bixiyayaasha uu soo saari waayo ugu dambayn 15/06/2009, inay xisbiyadu isaga iman doonaan, talo wada jir ahna ka gaadhi doonaan.

Waxaase lagama maarmaan ah in la dhamaystiro ka hor intaan doorashada la gaadhin qodobadii guddida dhexdhexaadinta oo ay ka mid yihiin qodobadan soo socda:

Magacaabista Guddi heer qaran ee ilaalinta hantida qaranka iyo warbaahinta qaranka.

Ka wada tashiga arrimaha Komishanka Doorashooyinka.

Ansixinta muddo kordhin la’aanta Madaxweynaha.

Miisaaniyadda doorashada oo 25% oo ilaa hadda ay ka sugayaan deeq-bixiyayaashu.

Iwm.

Waxa M/weynaha looga fadhiyaa hirgelinta qodobada heshiiska, gudoomiye xisbi ahaan iyo madax xukuumad ahaanba inuu ka fuliyo wixii ku aadan dhinaciisa.

Bulsho weynta reer Somaliland waxaanu u sheegaynaa in labadayada xisbi qaran ay diyaar u yihiin inay dhinacooda ka hirgelinayaan qodobada heshiis kaas, sidoo kalena waxaa idinkana la idinka rabaa inaad ka markhaati kacda an, kalana xisaabtantaan cidii heshiiskaa dhinaceeda ka fulin wayda.

“SAXEEX LA’AAN WAA HESHIIS LA’AAN”

“BALLAN LA’AANA WAA DIIN LA’AAN”

 

Waaheen