KULMIYE: Dimoqraadiyad Afka Baarkiisa ah

Akhriste in badan ayay hogaamiyayaasha Xisbiga Kulmiye ee Mucaaridka u weyni inoo sawireen in danta iyo badbaadada Somaliland ay ku jirto Xisbiga Kulmiye sababta oo ah- waa sida ay hadalka u dhigaane- waa xisbi dhexdiisa dimoqraadiyadu biyo dhigtay. Gudoomiyaha Xisbiga Kulmiye Axmed Siilaanyo ayaa isagu madal walba la soo taagnaa in xisbigiisu kaga duwan yahay axsaabta kale ee Somaliland wada tashiga, isku tanaasulka iyo mabaad'ida aasaasiga ah ee dimoqraadiyada oo si dhab ah uga jirta xisbiga Kulmiye dhexdiisa.

Nasiib daro dhacdooyinka iyo waayaha dunidu waxa ay ina barayaan xaqiiq taasi ka duwan iyo in waxasi oo dhami ay yihiin uun afka baarkiisa iyo beer laxawsi siyaasadeed oo lagu dagihayo cida hadba loo dan leeyahay. Runta biyo kama dhibcaanka ahina waxa ay tahay in aanu Somaliland ka jirin xisbi ku kale dimoqraadiyad, wada tashi iyo isku tanaasul ugu faani kara!

Dhacdadii ugu danbaysay ee daaha ka rogaysa beenta qaawan ee Gudoomiyaha Kulmiye dadweynaha ka iibinayey waa doorashada murashaxiinta uu xisbigu u soo sharaxayo tartanka Madaxweyanaha iyo K/xigeenka. Waxa cadaatay in xisbiga Kulmiye hogaankiisa sare cid u xidhan yahay isla markaana aan lagula loolami Karin Odayga xisbiga madaxda ka ah. Tani waxa ay sida dharaarta oo kale u sii cadaatay markii Xildhibaan Maxamed Cali Xirsi, oo ah aqoonyahan da'yar oo damac ka galay jagada hogaanka sare ee Xisbiga si cad iyo si dadbanba loogu sheegay inaanu jagadaasi geyin, aakhiritaankiina soo dedejisay in xildhibaanku damaciisii la noqdo, candhuuftiisana dib u liqo ka dib markuu quus ka soo istaagay jawigii tartan iyo loolan xalaal ahi ku suurta gali lahaa. Sidoo kale waxa iyana laga wada dheregsan yahay halka uu ku danbeeyey masiirkii Dr. Axmed Xuseen Ciise oo ahaa xubin miisaan culus ku leh xisbiga Kulmiye dhexdiisa, ahaana u-qeybsanaha Arimaha Dibeda ee xisbigaasi. Dr. Axmed Xuseen Ciise waxa laga raacay ka dib markii uu cadeeyey hamigiisa ah inuu loolan u galo murashaxa xisbiga ee Doorashooyinka la filayo. Waxa la wada ogyahay in iska dhaaf murashaxnimo uu aqoonyahanku hunguri ka galo'e, si dhib iyo sasabasho leh loogu soo xaasiliyey xubinimadiisii Golaha Dhexe.

Akhriste tibaaxda ugu danbaysa ee si cad inoogu muujinaysa in aanay sinaan, wada tashi iyo xisbinimo ka jirin Kulmiye dhexdiisa waxa weeyi loolankii loo galay jagada murashaxa Madaxweyne ku xigeenka ee xisbiga. Jagadani waxa isku soo sharaxay afar murashax oo kala ah: 1. Cabdiraxman Aw Cali Faarax 2. Axmed Xaaji Cali Cadami 3. Prof. Ismcaaiil Muumin Aare iyo 4. Cabdiraxman Cabdilaahi Ismaacil (Saylici). Afarta murashax hadii aynu mid mid u qiimayno waxa aynu arki karnaa in masalan Cabdiraxman Aw Cali yahay siyaasi ruug cadaa ah, in badan dalkan u soo halgamay, soo qabtay jagada Madaxweyne ku xigeen, dhinaca aqoontana ah khabiir xaga diyaaradaha ah. Axmed Xaji Cali Cadami waa oday hormuud ka soo ahaa Gudigii hore ee Doorashooyinka Qaranka, waxana uu xiligaasi dad badan ka kasbaday kalsooni iyo ixtiraam uu ku helay kaalintiisii hogaamineed. Waxa kale oo Cadami uu baal dahab ah kaga jiraa dib u heshiisiinta iyo dib u yagleelkii Somaliland. Prof. Ismacil Aare waa aqoonyahan sida la sheegay in badan ka soo shaqeeyay hay'adaha caalamiga ah, duruufaha nololeed ee dhabta ah ee dadkana si fiican ula socda. Cabdiraxman Saylici waa ninka ugu aqoon liita raga tartamayey, waayo aragnimo siyaasadeedna ka wata 5 sano oo uu xildhibaan gole deegaan ahaa.

Malaha isaga oo Axmed Siilaanyo ku doorbidaya Saylici khibrad yaridiisa siyaasadeed, iyo heerka aqoontiisa ee hooseeya marka la barbar dhigo raga tartanku ka dhexeeyo, ayuu si badheedh ah u soo faragaliyey hanaankii doorasho ee si sinnaan ah loogu xaqsoori lahaa murashaxiinta xisbiga, olole qaawanna u qaaday murashax Cabdiraxman Saylici. Ha yeeshee, farigalintani ayaan-darada ahi waxa ay dhalisay in rag culus oo miisaan ku leh xisbigu ay gaashaanka ku dhuftaan talo maroorsiga iyo kali talisnimada Siilaanyo.

Gunaanadkii maqaalkan kooban, waxa soo ifbaxay isla markaana sida cadceeda oo kale u soo daahiray beentii qaawanayd ee Oday Siilaanyo la soo taagnaa hadh iyo habeen kuna sheegan jiray in xisbigiisu cid walba u furan yahay. Dhacdadani u danbaysay ee ka dhacday Burco waxa ay ina tusaystaa sida Odaygu si badheedh ah adhaxda uga jabiyey xisbigiisii.

Keyse Maxamed Biixi
keybiixi@yahoo.com
Hargeysa